«Бәркамал әўлад- 2017»: Қарақалпақстаннан 69 жас спортшы 14 спорт түри бойынша жарыста қатнасыўға Жиззахқа кетти

«Бәркамал әўлад- 2017»: Қарақалпақстаннан 69 жас спортшы 14 спорт түри бойынша жарыста қатнасыўға Жиззахқа кетти

 

 Мине, бир неше жыллардан берли елимиздиң түрли қалаларында «Бәркамал әўлад» спорт ойынлары өткерилип келинбекте. Бул жарысларда Қарақалпақстан жаслары да мүнәсип қатнасып жоқары орынларды ийелеп, жақсы нәтийжелерди қолға киргизип келмекте.

«Бәркамал әўлад» - 2017» спорт жарысларына таярлық көриў, жас спортшыларымыздың шеберлигин арттырыў мақсетинде республикамыздағы академиялық лицей ҳәм кәсип-өнер колледжлериниң оқыўшы-жаслары арасында өткен жылдың 21-29-ноябрь күнлери аралығында 7 спорт (баскетбол, волейбол, стол тенниси, футбол, қол тобы, жеңил атлетика ҳәм бадминтон) түри бойынша қалалық ҳәм районлық басқышлары болып өткен еди.

Жарыстың Қарақалпақстан Республикалық басқышы 2016-жылдың декабрь ҳәм усы жылдың январь айларында болып өтти. Онда спорттың 17 түри бойынша 1047 спортшы (соннан 307 си қызлар) қатнасты.

Бул жарысларда командалық есапта Нөкис спорт колледжиниң командасы биринши, Нөкис Олимпия резервлери колледжиниң командасы екинши, Нөкис медицина колледжиниң командасы үшинши орынды ийеледи. 2017-жылдың 27-март ҳәм 13-апрель күнлери спорттың 5 (гандбол, баскетбол, волейбол, футбол ҳәм бокс) түри бойынша Өзбекистан Республикасы таңлаў басқышлары өткерилип, спорттың гандбол түри бойынша ул балалардан дүзилген командамыз, баскетбол түри бойынша ул ҳәм қызлардан дүзилген командаларымыз жеңимпаз болып, жарыстың финал басқышына жоллама алды.

Хабарыңыз бар, 12 спорт түри бойынша қатнасып атырған спортшылар тиккелей финал басқышында қатнасыў ҳуқықына ийе. Булар спорттың аўыр атлетика, дзюдо, еркин гүрес, грек-рим гүреси, таэквондо ВТФ, жүзиў, стол тенниси, теннис, жеңил атлетика, бадминтон, көркем гимнастика ҳәм шахмат түрлери болып есапланады. Жыл басынан берли бизиң спортшыларымыз Өзбекистан ҳәм Азия чемпионатларында ҳәм басқа да жарысларда жақсы нәтийжелерди қолға киргизип келмекте. Атап айтқанда, усы жылдың 30-март 11-апрель күнлери Ташкент қаласында шахмат бойынша өткерилген Азия чемпионатында М.Оразмухаммедова (блис бағдары бойынша) екинши, ал, шахмат бойынша өткерилген «Камолот шахмат тахтасы» республика турниринде қатнасқан А.Әўезимбетов биринши орынды ийеледи.

Ҳәзир республикамыздан жәми 69 спортшы жасларымыз 14 спорт түри бойынша Жиззақ қаласында болып өтетуғын «Бәркамал әўлад- 2017» спорт жарысында қатнасыў ушын жөнеп кетпекте.

Спортшыларымызға әўмет тилеймиз ҳәм жақсы нәтийжелерди күтип қаламыз.

 

Ә.Жиемуратов,

Қарақалпақстан хабар агентлигиниң хабаршысы.

 

Дерек: sovminrk.gov.uz

Фото: usport.uz

 

 

скачать dle 10.6фильмы бесплатно



  • 25-05-2017, 08:03 |
  • 228