Қарақалпақстанлы каратэшилер Токиодағы 13-жәҳән чемпионатында 1 алтын, 3 гүмис, 1 қола жеңди

Бүгин пүткил республикамыз бойлап кеңнен белгиленип атырған мәмлекетимиз ғәрезсизлигиниң 26 жыллық байрамы қарсаңында республикамыздың каратэ шеберлери байрам кейпиятына және бир қуўаныш инам етти. Қарақалпақстан Республикасы Каратэ федерациясының ўәкиллери Гулназ Султашева, Алламурат Орынбаев, Айбек Әўезовлар Өзбекистан сайланды командасы қурамында усы жылдың 14-20-август күнлери Япония пайтахты Токио қаласында болып өткен шотокан каратэ-до бойынша 13-жәҳән чемпионатына қатнасып, 1 алтын, 3 гүмис, 1 қола медалларын қолға киргизип қайтты. Бул ҳаққында «Еркин Қарақалпақстан» газетасының рәсмий сайты хабар бермекте.

Усы мүнәсибет пенен Нөкис темир жол вокзалында спортшыларды күтип алыў салтанаты болып өтти. Оған тараў басшылары, спортшылардың устазлары, жақынлары ҳәм кең жәмийетшилик ўәкиллери қатнасты.

Г.Султашева бул чемпионатта командалық кумитэ беллесиўлеринде бир алтын, командалық ката беллесиўлеринде бир гүмис, жеке ката беллесиўлеринде болса бир қола медалларын жеңип алып, жәҳән чемпионатының комплект медалларын қолға киргизди. Ал, А.Орынбаев командалық кумитэде, А.Әўезов командалық ката беллесиўлеринде гүмис медалларын жеңип алды.

— Мениң бул жеңислерим бүгин елимизде спортқа, әсиресе, ҳаял-қызлар спортына қаратылып атырған дыққат-итибардың нәтийжесинде деп билемен. Устазым Полат Базарбаевтың қол астында барлық қолайлықларға ийе спорт залларында 9 жылдан берли шынығыў ислеп киятырман. Буны қолға киргизиўиме жақыннан жәрдем берген устазларыма, ата-анама, жақынларыма, республикамыз басшыларына өз миннетдаршылығымды билдиремен. Мәмлекетимиз ғәрезсизлигиниң 26 жыллық байрамы қарсаңында қолға киргизген бул жетискенлигимди ең уллы, ең әзиз байрамымызға азғана болса да саўға болғанына жүдә қуўанышлыман,-дейди Гулназ Султашева.

Дүньяның 38 мәмлекетинен спортшылар қатнас­қан бул жәҳән чемпионатында Өзбекистан сайланды командасы улыўма командалық есапта екинши орынды қолға киргизди.

Дүньяның 38 мәмлекетинен спортшылар қатнас­қан бул жәҳән чемпионатында Өзбекистан сайланды командасы улыўма командалық есапта екинши орынды қолға киргизди.

Әлбетте, булардың ҳәммесин мәмлекетимиздеги спорт түрлерине, әсиресе, шығыс жекпе-жек спорт түрлериниң кең ен жайыўы, раўажланыўы мысалында көремиз. Биз де өз гезегинде жас каратэшилеримиздиң жеңиси менен қутлықлап, алдағы ўақытлары да елимиз байрағын жәҳән ареналарында жоқары көтере бериўин тилеймиз.

 

Р.АРЗИЕВ 

 

скачать dle 10.6фильмы бесплатно



  • 28-08-2017, 11:50 |
  • 379