Қанлыкөлде боян тамырын жетистириў бойынша семинар өткерилди

 

Қанлыкөлде боян тамырын жетистириў бойынша семинар өткерилди

Қанлыкөл районында «NUKUS LICORISE» Қарақалпақстан Уллы Британия жуўапкершилиги шекленген жәмийети, боян тамырын қазып алыў, қайта ислеў ҳәм боян экстрактын ислеп шығарыў қоспа кәрханасында Өзбекстан Республикасы Министрлер Кабинетиниң 2018-жыл 27-январьдағы «Өзбекстан Республикасында боян тамыр ҳәм басқа дәрилик өсимликлерди жетистириў ҳәмде санаат усылында қайта ислеўди жәнеде раўажландырыў ис-илажлары ҳаққында»ғы 63-санлы қарарында белгиленген тапсырмаларды додалаўға бағышланған семинар болып өтти. Бул ҳаққында район ҳәкимлиги хабар бермекте.

Семинарда тийкарынан, боян тамырын қайта ислеўши, егиў менен шуғылланыўшы кәрхана ҳәм фермер хожалықларының боян тамыр өсимлиги плантацияларын қәлиплестириў ҳәм тәрбиялаў, сондай-ақ, халықаралық талапларға муўапық, боян тамыр шийки өнимин кептириў ҳәм қадақлаў ушын арнаўлы техника әсбаплары менен киши технологияларды лизинг тийкарында сатып алыў ушын жеңиллетилген шәртлерде кредит қаржыларын ажыратыў мәселелери көрип шығылды.

Қанлыкөлде боян тамырын жетистириў бойынша семинар өткерилди

 

Сондай-ақ, боян тамыр ҳәм басқа да дәрилик өсимликлерди жетистириў, қайта ислеў шөлкемлери бирлеспеси баслығы тәрепинен районларда (Қанлыкөл, Қоңырат, Шоманай, Мойнақ) боян тамыр тараўында жумыс алып барылып атырған кәрханаларға түсиндириў жумыслары ҳәм жаратылған жеңилликлер ҳаққында мағлыўматлар берилди.

Семинар барысында, Өзбекстан Миллий банки Қарақалпақстан Республикасы бөлими қәнигеси тәрепинен қарардың 12-бәнти бойынша түсиниклер берилип, қарардың орынланыўы бойынша кредит алыў усынысын билдирген кәрханалардың келешекте раўажланыў жойбарлары ушын кредит қаржыларын  нызамда белгиленген тәртипте ажыратылатуғынлығы ҳаққында айтылды.

Семинарда, Қарақалпақстан Республикасы боян тамырын жетистириў ҳәм қайта ислеў бирлеспеси баслығы М.Ғайпов, Өзбекстан миллий банки Қарақалпақстан бөлими қәнигеси Қ.Узақов ҳәмде Қанлыкөл, Шоманай, Қоңырат, Мойнақ районлары ҳәкиминиң экономика ҳәм исбилерменлик мәселелери бойынша биринши орынбасарлары менен тийисли мекеме, кәрхана ҳәм шөлкемлер басшылары қатнасты.

скачать dle 10.6фильмы бесплатно



  • 23-04-2018, 14:18 |
  • 236