Елликқалада жол ҳәрекети қағыйдасын бузғанлардан он ай ишинде 691 млн сўмнан артық жәрийма өндирилди

Елимизде автомобиль ислеп шығарыў жолға қойылғаны раўажланыўымыздың белгиси. Жолларды толтырып қатнап атырған автомашиналар көрген көзге жағымлы көринеди. Бирақ, бәрибир автотранспорт қуралын басқарыўшылар, жолларда ҳәрекетлениў қағыйдаларына бойсыныўды ҳеш қашан ядынан шығармаўы керек. Себеби, ҳәрқандай жол-транспорт ҳәдийсеси аянышлы ўақыяларға алып келиўи мүмкин.

Бизиң Елликқала районлық ИИБ жол ҳәрекети қәўипсизлиги бөлими хызметкерлери 2017-жылдың 10 айы даўамында жол ҳәрекети қәўипсизлигин тәми­йинлеў, жол-транспорт ҳәдийселериниң алдын алыў ҳәм жәмийетлик тәртипти сақлаў бағдарында жумыслар алып бармақта. Атап айтқанда, өткен ўақыт ишинде районымыз аймағында 20 жол-транспорт ҳәдийсеси жүз берип, 16 пуқара дене жарақатын алды. Бул ҳәдийселердиң келип шығыў себеплери үйренилди.

Үйрениўлер барысында көбинесе автомашинаны мәс ҳалында басқарыў, қуўып өтиў, жолаўшы тасыў қағыйдаларын бузыў, уялы телефонда сөйлесиў сыяқлы нызамбузыўшылықлар кеўилсиз ўақыяларды келтирип шығарғанлығы анықланды.

Өзбекистан Республикасы Министрлер Кабинетиниң тийисли қарарына тийкарланып, райондағы кәрханаларға қараслы 3130 транспорт қураллары техникалық жақтан тексериўден өткерилди. Буннан тыс­қары, район аймағында 7350 жол ҳәрекети қағыйдасын бузыўшылар анықланды. Сондай-ақ, 6865 қағыйдабузыўшылардан 5820 сына ҳәкимшилик протоколы дүзилип, бул бойынша өндирилген жәрийма муғдары 691.765.435 сумды қурады.

Ҳәр айдың жуўмағында жүз берген жол-транспорт ўақыяларын кең түрде үйренип шығыў, жол-патруль хызмети инс­пекторлары дыққатын автоавариялар келип шығыўына себепши телефон ҳәм мониторлардан пайдаланыў, жолаўшы тасыў қағыйдаларын бузыў жағдайларын итибарсыз қалдырмаў жуўапкерли ўазыйпа етип берилди.

Нызам алдында ҳәмме тең ҳуқыққа ийе. Жолларда ҳәрекетлениў қағыйдаларын ҳәр бир пуқара пуқта билиўи ҳәм де әмел етиўи тийис. Бул бағдарда үгит-нәсият, түсиндириў жумыслары унамлы нәтийжесин берери сөзсиз. Әсиресе, балалар ҳәм жас өспиримлер қатнасындағы жол-транспорт ўақыяларының алдын алыў бойынша кәсип-өнер колледжлери, академиялық лицей ҳәм мектеплер, аўыл ҳәм мәкан пуқаралар жыйынларында 158 мәрте ушырасыўлар өткерилди.

Өз нәўбетинде, бул илажлар нәтийже бермекте. Лекин, арқа­йынлыққа жол қойыўға болмайды. Биз, алдағы ўақытлары да илажларды даўам етиўди ўазыйпамыз деп санаймыз.

 

Е.ҮСЕНОВ,

Елликқала районлық ИИБ Жол ҳәрекети

қәўипсизлиги бөлими баслығы, майор.

 

Дерек: «Еркин Қарақалпақстан»

скачать dle 10.6фильмы бесплатно



  • 24-11-2017, 11:50 |
  • 549