Шавкат Мирзиёев өнерментшиликти раўажландырыў ҳәм қоллап-қуўатлаўға арналған жыйналыс өткерди

 

Шавкат Мирзиёев өнерментшиликти раўажландырыў ҳәм қоллап-қуўатлаўға арналған жыйналыс өткерди

 

Өзбекистан Республикасы Президенти Шавкат Мирзиёев басшылығында 3-ноябрь күни өнерментшиликти еле де раўажландырыў, өнерментлерди ҳәр тәреплеме қоллап-қуўатлаў мәселелерине арналған жыйналыс өткерди, деп хабар берди ЎзА.

Мағлыўматларға қарағанда, бүгинги күни елимизде өнерментшиликтиң 34 түри бар.

Жыйналыста халық өнерментшилиги ҳәм әмелий көркем-өнерин раўажландырыў, өнерментлер тәрепинен өнимлер ислеп шығарыўды кеңейтиў, усы тийкарда жаңа жумыс орынларын жаратыў мәселелери додаланды.

Өнерментлердиң келешектеги жойбарларын қаржыландырыў, буның ушын оларға жеңилликли кредитлер бериў, тараўға халық аралық финанс институтлары инвестицияларын тартыў кереклиги атап өтилди. Өзбекистан Саўда-санаат палатасы, «Өнермент» бирлеспеси, «Микрокредитбанк» басшылары ҳәм район ҳәкимлериниң биринши орынбасарлары мойнына аймақлардың өзине жараса өзгешелигинен келип шығып, районлар кесиминде анық реже ислеп шығыў, ҳәр бир өнерментке жетип барыў ўазыйпасы қойылды.

Өнерментлерди мәмлекетлик дизимнен өткериў, оларға бос турған имаратларды жеңилликли түрде бериў, әсбап-үскенелер ҳәм шийки зат материаллары менен тәмийинлеў мәселелерине итибар қаратылды.

Өнерментлер орайлары жумысын кеңейтиў, олар ислеп шығарған өнимлерди қарыйдарларға жеткериўди аңсатласытырыў бойынша тапсырмалар берилди. Атап айтқанда, қолы гүл өнерментлердиң базар ҳәм супермаркетлерде сатыўы ушын кең имканият жаратыў кереклиги, қәлесе өз үйинде дүкан ашыўы мүмкин екени атап өтилди.

Турақлы саўда орнына ийе болмаған, ўақтынша орынларда саўда ислеп атырған өнерментлерге саўда ислеў қағыйдалары тийкарында талап етилетуғын касса аппараты ҳәм саўда терминалынан пайдаланыў ҳәм коммерциялық банклерге саўдадан түскен нақ пулды инкассация қылыў талаплары өз қәлеўине қарап етип белгиленеди.

Жыйналыста берилген тапсырмаларға муўапык, ҳәр бир ўәлаятта арнаўлы көргизбе ҳәм ярмаркалар шөлкемлестирилип, оларда өнерментлер бийпул қатнасады. Сондай-ақ, олардың шет ел мәмлекетлерде өткерилетуғын көргизбе, фестиваль ҳәм ярмаркаларда қатнасыўына көмек бериледи.

Өнерментлердиң экспорт жумысы да қаржыландырылады. Оларға өз өнимлерин экспорт қылыўдан түскен шет ел валютаны еркин басқарыў, атап айтқанда, банк есап бетлеринен шет ел валютаны нақ алыў ҳуқықы бериледи.

Өнерментшиликке кредитлер ажыратыўды көбейтиў бойынша тапсырмалар берилди.

Жыйналыста тараўда жеке исбилерменликти раўажландырыў, өнерментшиликти финанслық-шөлкемлестириў, халық бәнтлигин арттырыў ҳәм басқа әҳмийетли мәселелер додаланды.

 

Фото: President.uz

скачать dle 10.6фильмы бесплатно



  • 4-11-2017, 10:10 |
  • 331