Әмиў бойының қос арыўы

 

Әмиў бойының қос арыўы

 

Жәмийетимизде өзлериниң нәтийжели мийнетлери менен елимиз арасында бир қанша табысларды қолға киргизип киятырған ҳаял-қызларымыз шайыр анамыздың мүнәсип даўамшылары болып жетилиспекте.

Ҳәр бир тараўда өзлериниң табыслары менен журт­шылыққа танылып атырған қызларымыздың мийнетлерин баҳалаў мақсетинде Зульфия атындағы мәмлекетлик сыйлықтың енгизилиўи келешек әўладларымызға қаратылып атырған ўлкен итибардың белгиси. Өзбекстан Республикасы Президенти Ш.Мирзиёевтиң пәрманы менен мәмлекетимиздеги бир қанша қызларымыз мине усы сыйлық пенен сыйлықланды. Олардың қатарында жерлеслеримиз-Нөкис мәмлекетлик педагогикалық институтының 2-курс студенти Жоллыбаева Шаходат Қуралбай қызы ҳәм де Нөкис мәденият ҳәм көркем-өнер колледжиниң 2-курс оқыўшысы Утемуратова Наргиза Алиевналардың бар екенлиги биз ушын мақтаныш.

Бир нешше мәрте Өзбекстан чемпионы болған Ш.Жоллыбаеваның ең үлкен табысларының бири 2014-жылы 8-11-май күнлери еркин гүрес бойынша Таиландта болып өткен жарысқа елимиз сайланды командасы ағзасы сыпатында қатнасып, сыйлы 3-орынды ийелеге еристи ҳәм Нанькин қаласында болып өткен II жаслар Олимпиадасына қатнасып, қола медалын қолға киргизди.

Н.Утемуратова кишкенелигинен көркем-өнерге меҳир қойып өсти. Мектепте оқып жүрген пайытларында миллий саз әсбабы болған дуўтарға айрықша ықлас қойып, Хожели қаласындағы 5-санлы балалар музыка мектебинде  дәслепки билимлерди алған жас талант ийеси «Камалак жулдызлары» таңлаўының 2010-2012-жыллар аралығында лауреаты болып, буннан соң 2012-2014-жыллары Түркменстан Республикасына «Тонг ғунчалари» аяқ ойын труппасы менен биргеликте қатнасып, ол жерден де жақсы көрсеткишлер менен қайтты.

Хожели қаласындағы 65-санлы орта мектепти айрықша баҳалар менен питкерген ол ҳәзирги ўақытта Нөкис мәденият ҳәм көркем-өнер колледжинде Өзбекстан халық бақсысы Теңел Қәллиевтен қарақалпақ халық намаларының әлўан сырларын үйренип, дәстанларымыздан үзиндилер атқарыўды үйренип келмекте.

Соның менен бирге колледждеги устазы Гүлайым Рахмановадан шыңқобыз шертиўди де үйренип, 2017-жылы Москва қаласында өткерилген ETHNO APT FEST миллий өнерментшилик фестивалына қатнасып, лауреат болып қайтты. Сахнада «Яғлы бәҳәр» намасына «Қарақалпақта» қосығын жанлы ҳаўазда атқарып шыққан кишкене қыздың таланты жыйналған тамашагөйлерде айрықша тәсир қалдырды.

Елимиздиң үлкен сыйлығы менен сыйлықланған қызларымызды бул табыслары менен қутлықлаймыз.

 

Н.НУРИЕВА. 

Дерек: «Еркин Қарақалпақстан» газетасы

 

Сүўретте: Зульфия атындағы мәмлекетлик сыйлықтың

лауреатлары Ш.Жоллыбаева ҳәм Н.Утемуратовалар.

 

скачать dle 10.6фильмы бесплатно



  • 9-03-2018, 18:15 |
  • 514