Рахмет саған, Ферял! Қарақалпақ қосығы түрк сахнасында (+видео)

Рахмет саған, Ферял! Қарақалпақ қосығы түрк сахнасында (+видео)

 

 Буннан 16-17 жыл бурын белгили қосықшы, Өзбекистан Республикасына хызмет көрсеткен артист Лариса Москалева тәрепинен қарақалпақ тилинде атқарылған «Қарақалпақтың неси бар» қосығы «Ёшлар» телеканалы арқалы эфирге берилгенде көкирегимизди мақтаныш сезимлери бийлегени күни кешегидей ядымызда.

Оннан берли де қарақалпақ халқының көркем-өнери менен мәдениятына жоқары баҳа берген елимизге белгили талант ийелери, атап айтқанда, Махмуд Намазов, Самандар Ҳамрақулов, Азатбек Назарбеков, Хосила Рахимова, сондай-ақ, қазақстанлы Қайрат Нуртас ҳәм басқалар бир қатар қарақалпақ қосықларын ана тилимизде атқарып, кеўлимизден шыққан еди. Қала берсе, жергиликли ат­қарыўшыларымыздың өзлери де сырт еллерде болып, қарақалпақ қосықшылық өнерин дүньяға танытып атырғаны сыр емес. Қулласы, мәдениятымыз ҳәм көркем-өнеримиз жәҳән бойлап тарамақта.

Жақында «Facebook» социаллық тармағы арқалы түрк қосықшысының да қарақалпақ тилинде қосық айтқаны ҳаққында мағлыўмат тарқалды. Тармаққа кирип көрсек, ҳақыйқатында да усылай екен. Түрк поп-музыкасы жулдызларының бири Ферял Басел қарақалпақ шайыры Аяпберген Муўсаевтың «Қарақалпақта» атлы қосығын «Кеңес» намасына салып, әжайып тәризде атқарып шыққан. Ферялдың қосықты жанлы тәризде, оның ырғақларын, ҳәўижге шығар жерлерин кәмине келтирип айтқаны, даўыс диапазонының кеңлиги тыңлаўшыға өзгеше кейпият бағышлайды.

 

Мағлыўмат ушын айтып өтсек, Ферял Басел 1975-жылы Түркияның Анкара қаласында туўылған. 1997-жылы Газа университетиниң журналистика факультетин тамамлаған. Ҳәзирги ўақытта Түркия Мәденият ҳәм туризм министрликлеринде хызмет етеди. Қосықшы сыпатында бир қатар халық­аралық таңлаўларға қатнасып, сыйлы орынларды ийе­леген.

 

Сағындық ЖАНИЕВ

Дерек: erkinkarakalpak.uz, 

фото: скриншот youtube

 

скачать dle 10.6фильмы бесплатно



  • 7-06-2017, 13:27 |
  • 776