#Маршрутка

 

Ассалаўма алейкум ҳүрметли заманласлар ҳәм Транспорт министрлигине сораўы менен мүрәжаты бар пуқаралар!

Бүгин кеште де жумыстан (оқыўдан ҳ.т.б) үйге қайтарда жәмийетлик транспорт мәселесинде машқалаға дусласқаныңыз анық. Кешки ўақыт «Базар стоянка» ҳақыйқый мәнисте «САЎАШ МАЙДАНЫ»на айланады. Себеби өзим де бул саўаштың қатнасыўшысыман.

Биз усы жылдың 26-март күни сиз әзиз оқыўшылар менен бул мәселени көтерип шығыўға ҳәрекет еттик. Бирақ, айтарлықтай нәтийже шықпады. Болса да, байрағы еки айға жеткен жоқ. Журналист Сағынбай ОРАЗЫМБЕТОВтың айтқанындай жәмийетлик транспорттағы аўрыўды жақсылап емлемесе бул тағы қайталана беретуғын аўрыўға айланды.

Транспорт министрлиги өткеретуғын пресс конференцияның ертең саат 9:30 басланып бир-еки саатта тамамланыўы усы ўақытқа шекем топланып қалған машқалаларды шешиўине жәрдем береди деп айта алмайман. Жеке болжаўым бойынша ертең, «мүрәжатыңыз қабылланды, үйренип шығып шешимин айтамыз», деген ўәделер бериледи. Ямаса, март айындағы табличкалар менен болған тактика және атқарылады.

Сонлықтан, бул мәселени бир жола шешиў, сондай-ақ, усы мәмлекеттиң салық төлеўшиси сыпатында ҳуқықларымыздан толық пайдаланыў ушын жәмийетлик транспорт бойынша кимде қандай шағым/усыныс/мүрәжат болса @Makanuz_bot қа жазыўыңызды сорайман.

 

Бул мәселеге тек ғана Транспорт министрлиги емес ал, депутат болып сайланыў нийетинде жүрген талабанлардың дыққат пенен қатнаста болыўын сорар едим. Пикиримше, халыққа пайдасы тийетуғын жәрдем екеў болса, соның биреўи жәмийетлик транспортты жақсылаў, биреў болса ол да жәмийетлик транспортты жақсылаў болады. Қыстың суўығында көшеде маршруткаға мине алмай турған ҳәр бир адамның ойынан өтетуғын нәрсе «неге бизлердиң елимизде усындай?», «қашан бул жөнге түсер екен» деген сораўлар.

Ҳүрметли ҳүрметлилер! Бос сөзлер ҳәм бийпайда ўәделерден көзге көринетуғын жумысқа өтиў ўақты келди.

 

Егер сизде жөнелисли такси бойынша сораў ямаса мүрәжат болатуғын болса @Makanuz_bot каналына жоллаўыңызды сораймыз.

Мағлыўмат жоллаў шәрти:

1-Жөнелис номери (маршрутка, автобус).

2-Машқала неден ибарат.

3-Атыңыз фамилияңыз, телефон номериңиз. Аноним деген болмайды.

Мүрәжат жоллаўдың мүддети ШЕКЛЕНБЕГЕН. Машқалаға дуслассаңыз болды, ЖАЗА БЕРИҢ.

 

Лола Қаллыханова,

журналист

скачать dle 10.6фильмы бесплатно



  • 29-10-2019, 19:58 |
  • 1 507