1-сентябрден баслап жер асты суўларына қудықларды қазыў ушын рухсатнама алыў тәртиби ҳаққында

Ɵзбекстан Республикасы Президентиниң “Мәмлекетлик хызметлер көрсетиўдиң миллий системасын жәнеде комплекс раўажландырыў ис-иләжлары ҳаққында”ғы 2019-жыл 15-февральдағы ПҚ-4193-санлы қарары тийкарында 2019-жыл 14-август күни Министрлер Кабинетиниң “Жер асты суўларына қудықларды қазыў ушын рухсатнама бериў бойынша мәмлекетлик хызметлерди көрсетиўди жәнеде раўажландырыў ис-иләжлары ҳаққында”ғы 672-санлы қарары қабыл етилди.

Қарарға муўапық, 2019-жыл 1-сентябрден баслап, юридикалық шахслар жер асты суўларына қудықларды қазыўға рухсатнама алыў ушын Мәмлекетлик хызметлер орайлары ямаса Ɵзбекстан Республикасы бирден-бир интерактив мәмлекетлик хызметлер порталы арқалы мүрәжәт етеди.

Арза бериўши рухсатнама алыў ушын Мәмлекетлик хызметлер орайына өзи келип мүрәжәт етеди ямаса мәмлекетлик хызметлерден электрон түрде пайдаланыў ушын бирден-бир интерактив мәмлекетлик хызметлер порталында дизимнен өтеди.

Арзаға төмендеги ҳүжжетлер қосымша қылынады:

жер асты суўларына қудықларды қазыў ушын буйыртпа бериўши ҳәм арза бериўши ортасында дүзилген шәртнама ямаса келисиў нусқасы;

гидрогеологиялық жуўмақ:

мәмлекетлик экологиялық экспертизасының унамлы жуўмағы;

жер асты суўларына қудықларды қазыў ушын жойбар ҳүжжетлери;

арза бериўшиниң техникалық имканыятлары ҳаққында мағлыўмат, бар болған үскенелердиң техник паспортлары нусқалары ямаса зәрүр техника ҳәм үскенелерди ижараға алыў бойынша шәртнама нусқасы;

арза бериўши тийисли қәнийгениң (гидрогеолог) диплом нусқасы.

Арзаға зәрүр мағлыўматлар рәсмийлестирилип киритилгеннен кейин арза бериўши оны өзиниң электрон санлы имзасы менен тастыйықлайды.

Мәмлекетлик хызметлерди көрсетиў ушын базалық есаплаў муғдарының 30 пайызы муғдарында жыйым өндириледи.

Арза Мәмлекетлик хызметлер орайы тәрепинен Мәмлекетлик геология комитетине жиберилгеннен кейин 2 жумыс күни даўамында жер асты суўларына қудықларды қазыўдың мақсетке муўапықлығы үйренилип шығылады ҳәм гидрогеология кәрханаларына электрон түрде жибереди.

Гидрогеология кәрханалары 3 жумыс күни даўамында таңланған жер майданы ҳәм усыныс етилген қудық конструкциясын үйренип шығады ҳәм үйрениў нәтийжесинде тийисли жуўмақлар тийкарында таярлап, Мәмлекетлик геология комитетине электрон түрде жибереди.

Мәмлекетлик геология комитети гидрогеология кәрханалары тәрепинен таярланған мағлыўмат тийкарында бир жумыс күни даўамында рухсатнама бериў ямаса бериўди бийкар етиў бойынша жуўмақ таярлап, QR-код қойылған рухсатнаманы рәсмийлестиреди ҳәм оны өзиниң электрон санлы имзасы менен тастыйықлайды ҳәмде Мәмлекетлик хызметлер орайына жибереди.

 

Д.Куденов,

Қанлыкөл районы Мәмлекетлик хызметлер

орайы директоры

скачать dle 10.6фильмы бесплатно



  • 7-09-2019, 13:18 |
  • 1 002