Нөкисте жөнелисли транспортлардың жол ҳақы баҳасы көтерилди ме?

 

Нөкисте жөнелисли транспортлардың жол ҳақы баҳасы көтерилди ме?

 

Хабарыңыз бар, бүгин, 2019-жыл 15-август күнинен баслап ҳүкиметлик қарарға муўапық, республикамыз бойынша жанармай-энергетикалық ресурслардың баҳасы көтерилди.

Усы мүнәсибет пенен, 15-августтан баслап Өзбекстанның айырым аймақларында, атап айтқанда, Ташкент қаласында жөнелисли автобуслардың жол кирей баҳасы 1200 сумнан 1400 сумға көтерилгени мәлим етилди.

Нөкис қаласындағы  жөнелисли маршрутларда жол кирей баҳасының 1000 сумнан 1500 сумға көтерилгени ҳаққында хабарлар тарқалып, айырым жөнелислерде жолаўшыларға бул бойынша надурыс мағлыўматлар тарқатылғаны ҳаққында хабарлар келмекте.

Қарақалпақстан хабар агентлигиниң шолыўшысы Ислам Матеков жағдайға анықлық киргизиў мақсетинде Қарақалпақстан Республикасы Транспорт министрлиги менен байланысқан. Транспорт министри орынбасары Тимур Сарыбаевтың мәлим етиўинше, булар тийкарсыз гәп-сөзлер болып есапланады.

– 15-августтан баслап жөнелисли маршрутлардың жол ҳақы баҳалары көтерилмеди. Бирақ, жанармай-энергетикалық ресурслардың баҳасы қымбатлағаны себепли бул бойынша Қаржы министрлиги менен биргеликте усыныслар ислеп шығып атырмыз. Жол кирей баҳалары көтерилиўи бойынша кең жәмийетшиликке мағлыўматлар берилетуғынлығын айырықша атап өтпекшимиз. Рәсмий тәризде хабар тарқатылмаған екен, бундай хабарларға исенбеўди халқымыздан сорап қаламыз, – деди министр орынбасары.

Сондай-ақ, министр орынбасары Тимур Сарыбаев, егер тийкарсыз рәўиште жол ҳақы баҳаларының көтерилгени бойынша транспорт басқарыўшылары тәрепинен жолаўшылардан белгиленген баҳалардан артықша пул соралып атырған болса, пуқаралар Қарақалпақстан Республикасы Транспорт министрлигиниң +99861 225-70-36 исеним телефон номерине қоңыраў етип, мүрәжат етиўи мүмкинлигин, пуқаралардың мүрәжатлары өз ўақтында унамлы шешилиўин мәлим етти.

 

 

скачать dle 10.6фильмы бесплатно



  • 15-08-2019, 16:01 |
  • 3 117