Автомобиль транспортында жолаўшыларды ҳәм жүклерди тасыў искерлигин лицензиялаў

Өзбекстан Республикасы Президентиниң «Жүк ҳәм жолаўшы тасыў системасын түптен жетилистириў ис-иләжлары ҳаққында»ғы 4230-санлы қарарына муўапық Министрлер Кабинетиниң 2019-жыл 30-июль күнги «Автомобиль транспортында жолаўшыларды ҳәм жүклерди қалада, қала әтирапында, қалалар аралық ҳәм халықаралық жөнелислер бойынша тасыў искерлигин лицензиялаў бойынша мәмлекетлик хызметлерин көрсетиўдиң ҳәкимшилик регламентин тастыйықлаў ҳаққында»ғы қарары қабыл етилди. Қарарға тийкар автомобиль транспортында жолаўшыларды ҳәм жүклерди қалада, қала әтирапында, қалалар ара ҳәм халықаралық жөнелислер бойынша тасыў искерлигин лицензиялаў бойынша мәмлекетлик хызметлерин көрсетиўдиң ҳәкимшилик регламенти тастыйықланып, юридикалықалық шахслар ҳәм  жеке тәртиптеги исбилерменлер көрсетилетуғын мәмлекетлик хызметлеринен пайдаланыў ушын тек ғана мәмлекетлик хызметлер орайлары яки Бирден бир интерактив мәмлекетлик хызметлери  порталы арқалы мүрәжат етеди.

Бул регламентте төмендеги  түсиниклерден пайдаланылады:

-лицензия бети — лицензия талаплары ҳәм шәртлерине мәжбүрий тәризде әмел етилген ҳалда жолаўшылар ҳәм жүклерди тасыўда пайдаланатуғын ҳәр бир автотранспорт қурылмаларына лицензияланатуғын хызмет түрин әмелге асырыў ушын берилетуғын рухсатнама (лицензия);

-коммерциялық тийкарында жолаўшыларды ҳәм жүклерди тасыў — коммерциялық тийкарында, яғный исбилерменлик ҳәрекетин әмелге асырыў жолы менен автотранспорт қурылмаларында жолаўшыларды ҳәм жүклерди тасыў хызметин көрсетиў нәтийжесинде дәрамат алыў.

-коммерциялық тийкарында әмелге асырылатуғын жолаўшыларды ҳәм жүклерди қалада, қала әтирапында, қалалараралық ҳәм халықаралық жөнелислер бойынша тасыў хызмети лицензияланады ҳәмде юридикалық шахслар тәрепинен әмелге асырылады.

Халықтың турмысы ҳәм ден-саўлығын қәўип астына қойған тәбийғый апатлар, эпидемиялар, үлкен авариялар ақыбетлерин сапластырыў ҳәмде Ҳүкиметтиң қарарлары бойынша авария-қутқарыў ҳәм тиклеў ислери әмелге асырылыўы, мүриўбет жүклери жеткерип берилиўи талап етилиўи менен байланыслы тасыўларды әмелге асырыўға,  электрон коммерция арқалы реализация қылынған товарларды сатыўшыға ҳәм жеткерип бериўшиге жеке мүлк ҳәм басқа пайдаланыў ҳуқықына тийкар тийисли болған автомобиль транспортында Өзбекстан аймағы бойлап жеткерип бериўге, аэропорттан, темир жол вокзаллары, автостанциялардан, мийманханаға ҳәм оннан қайтыўға, өз мүтәжлиги ушын технологиялық тасыў ушын, сондай-ақ,  туризм объектлерине өзиниң ижарашыларына транспорт хызметин көрсетиў ушын ҳәмде «Искерликтиң айрым түрлерин лицензиялаў ҳаққында»ғы  Өзбекстан Республикасы Нызамының 9-статясында көрсетилген кәрханаларға лицензия алыў талап етилмейди, Нызам ҳүжжетлеринде белгиленген ҳалатлар буннан тысқары.

Лицензия бериў, сондай-ақ, Нызам ҳүжжетлеринде белгиленген талапларында лицензияның әмел қылыўын тоқтатып турыў яки улыўма тоқтатыў, сондай-ақ оны бийкар етиў ҳәм қайта рәсмийлестириў Өзбекстан Республикасы транспорт министрлиги, Қарақалпақстан Республикасы транспорт министрлиги, ўәлаятлар ҳәм Ташкент қаласы транспорт басқармалары тәрепинен тийисли қарарлар қабыллаў жолы менен әмелге асырылады.

Автомобиль транспортында жолаўшыларды ҳәм жүклерди қалада, қала әтирапында, қалалар аралық ҳәм халықаралық жөнелислер бойынша тасыў хызметин лицензиялаў ҳуқықы ушын мүрәжат етиўшиниң сораўнамасына көре лицензия төмендеги хызмет түрлери ушын бериледи:

а) жолаўшыларды қалада автобусларда тасыў;

б) жолаўшыларды қалада киши автобусларда тасыў;

в) жолаўшыларды қалада жеңил автомобиллерде тасыў;

г) жолаўшыларды қала әтирапында автобусларда тасыў;

д) жолаўшыларды қала әтирапында киши автобусларда тасыў;

е) жолаўшыларды қала әтирапында жеңил автомобиллерде тасыў;

ж) жолаўшыларды қалалар аралық автобусларда тасыў;

з) жолаўшыларды қалалар аралық киши автобусларда тасыў;

и) жолаўшыларды қалалар аралық жеңил автомобиллерде тасыў;

й) жолаўшыларды халықаралық автобусларда тасыў;

к) жолаўшыларды халықаралық киши автобусларда тасыў;

л) жолаўшыларды халықаралық жеңил автомобиллерде тасыў;

м) жүклерди автомобиль транспортында қалада ҳәм қала әтирапында тасыў;

н) жүклерди автомобиль транспортында қалалар аралық тасыў;

о) жүклерди автомобиль транспортында халықаралық тасыў.

Сондай-ақ Өзбекстан Республикасында дизимге алынған жүк автомобиль  яки тиркемели автомобиль ҳәмде сырт ел мәмлекет аймағында дизимге алынған тиркеме яки ярым тиркемеден ибарат транспорт қурылмалары қурамынан пайдаланған ҳалда әмелге асырылатуғын халықаралық тасыўда жүк автомобили яки тиркемели автомобилге алынған лицензия бети транспорт қурылмаларының толық қурамы ушын әмел етеди.

Халықаралық жөнелислер бойынша жүклерди тасыўды әмелге асырыў ҳуқықын бериўши лицензия бетине ийе болған автомобильде миллий жүк тасыўшылар оған муўапық қалалар ара жөнелислерде жүк тасыўды әмелге асырыў ҳуқықына ийе болады.

Жүклерди автомобиль транспортында тасыўда пайдаланатуғын тиркемели автомобиллерге лицензия бетлери берилиўи ушын мәмлекетлик бажы талап етилмейди.

Қалалар аралық жөнелислер бойынша жолаўшыларды автобусларда яки киши автобусларда тасыў ҳуқықын бериўши лицензия бетине ийе болған автотранспорт қурылмаларынан жергиликли ҳәм сырт ел пуқараларын қалада ҳәм қала әтирапында туристлик-экскурсия қылыў жөнелислеринде (турақлы емес рәўиште) жолаўшы тасыўды әмелге асырыў ушын қосымша лицензия бетин алыў талап етилмейди.

Арза бериўши мәмлекетлик хызметлерден пайдаланыў ушын орайға өзи келип мүрәжат етеди яки мәмлекетлик хызметинен электрон тәризде пайдаланыў ушын Бирден бир интерактив мәмлекетлик хызметлери порталында дизимнен өтеди.

Лицензия алыў ушын арза бериўши мәмлекетлик хызметлер орайына төмендеги мағлыўматларды усынады:

юридикалықалық шахс ушын — юридикалықалық шахстың атамасы ҳәм шөлкемлестириў формасы, жайласқан орны (почта мәнзили), банк атамасы ҳәм банктеги есап бети;

физикалық шахс (жеке тәртиптеги исбилермен) ушын - жүк тасыў ҳуқықына лицензия алыўда — фамилияси, аты, әкесиниң аты, паспортқа ҳәмде автомобиль басқарыўшысы гүўалығына тийисли мағлыўматлар; искерлигиниң лицензияланатуғын түри (яки оның бир бөлими) көрсетилген ҳалда лицензия бериў ҳаққындағы сораўнама яки лицензия бетлерин алыў ушын кәрхана ықтыярында болған автотранспорт қурылмаларының дизими менен бирге автотранспорт қурылмаларының мүлк ҳуқықы, яки ижара тийкарында тийислилиги ҳаққында мағлыўматлар;

арза бериўшиде автомобиль басқарыўшыларын медециналық көриктен ҳәм автотранспорт қурылмаларын техникалық көриктен өткериў яки арза бериўшиниң тийисли қәнигеликтеги шөлкем менен оған медециналық көрик ҳәм техникалық көриктен өтиў имкәнияты жаратылып берилиўи ҳаққындағы шәртнамасы бар болғанлығы ҳаққында мағлыўматлар.

Арза бериўши мағлыўматларын рәсмийлестиргеннен ҳәм сораўнамаға кириткеннен соң оны өз электрон санлы имзасы менен тастыйықлайды яки өзи келип мүрәжат еткен жағдайда сораўнаманы ЭРИ менен тастыйықлаў имкәнияты болмаған жағдайда тийисли имзалар идентификация қылыўдың басқа қурылмалары (дактилоскопия, электрон имза ҳәм басқалар) менен тастыйықланыўы мүмкин.

Мәмлекетлик хызметлерди көрсетиў ушын нызам ҳүжжетлеринде белгиленген ең кем ис ҳақының бир есеси муғдарында жыйым ҳәм автомобиль транспортында жолаўшыларды ҳәм жүклерди қалада, қала әтирапында, қалалар аралық ҳәм халықаралық жөнелислер бойынша тасыў хызметин әмелге асырыўда лицензия бетлерин бериў ушын Өзбекстан Республикасы Министрлер Кабинети тәрепинен белгиленген муғдарларда мәмлекетлик бажы өндириледи.

Мәмлекетлик хызметлер орайына өзи келип мүрәжат еткенде сораўнама толтырылғаннан кеийн бир саат ишинде сораўнама лицензия бериўши органға жибериледи.

Лицензия бериўши орган сораўнама түскен ўақыттан баслап бир жумыс күни ишинде:

электрон шериклик жолы менен Өзбекстан Республикасы Ишки ислер министрлигиниң жол ҳәрекети қәўипсизлиги басқармасына лицензия бетин алыў ушын усынылып атырған автотранспорт қурылмаларына тийисли мағлыўматларды электрон сораў арқалы алады;

электрон шериклик жолы менен Өзбекстан Республикасы Әдиллик министрлигинен мүлк ҳуқықы яки ижара шәртнамасы тийкарында бар болған автотранспорт қурылмалары ҳаққындағы мағлыўматларды алады;

лицензия бериўши орган усы Регламент тийкарында арза бериўши атынан усынылған мағлыўматлардың толықлығын ҳәм лицензия талапларына муўапықлығын үйренип шығады.

Арза бериўши мәмлекетлик хызметлери көрсетилгени ушын белгиленген муғдарларда төлемлер әмелге асырылыўын тәмийнлейди.

Мәмлекетлик хызметлер орайлары (өзи келип мүрәжаат еткенде) яки Бирден бир интерактив мәмлекетлик хызметлери порталы арқалы (электрон түрде мүрәжат еткен жағдайда) түскен сораўнамада мағлыўматлар толық усынылғаннан соң, жыйым ҳәм мәмлекетлик бажылар толық төленгенлиги тастыйықланғаннан кейин лицензия (лицензия бетлери) рәсмийлестирилип бериледи.

Лицензия бериўши орган мәмлекетлик бажы түскен ўақыттан баслап бир жумыс күни ишинде QR-код (матрик штрихли код) қойылған лицензия (лицензия бетлерин) рәсмийлестиреди ҳәм оны лицензия бериўши орган ўәкилликли шахстың ЭРИ менен тастыйықлап, тийисли мәмлекетлик хызметлер орайына (өзи келип мүрәжат еткен жағдайда) яки арза бериўшиге (электрон түрде мүрәжат еткен жағдайда) Бирден бир мәмлекетлик хызметлер порталы арқалы электрон тәризде жибереди.    

 

С.ОТЕГЕНОВ,

Кегейли районы Мәмлекетлик хызметлер орайы

бөлим баслығы

скачать dle 10.6фильмы бесплатно



  • 10-08-2019, 12:03 |
  • 1 111