Ѳзбекстан пуқараларына жеке мийнет шәртнамалары тийкарында шет елде мийнет етиўге рухсатнама бериў ҳаққында

Ҳәзирги күнде Ѳзбекстан Республикасы бирден-бир интерактив мәмлекетлик хызметлери порталы мәмлекетлик хызметлерди кѳрсетиў ушын бирден-бир хабар майданшасы сыпатында белгиленип, мүрәжат етиўшилер онлайн түрде бирден-бир интерактив мәмлекетлик хызметлери порталы арқалы (my.gov.uz) яки ѳзи жасап турған жердеги Мәмлекетлик хызметлер орайы арқалы мәмлекетлик хызметлерден пайдаланыўына барлық имканиятлар жаратылған.

Ѳзбекстан Республикасы Министрлер Кабинетиниӊ 2018-жыл 31-май күнги Ѳзбекстан Республикасы пуқараларына жеке мийнет шәртнамалары (контракт) тийкарында шет елде мийнет искерлигин әмелге асырыўға рухсатнама бериў (мүддетин узайттырыў) бойынша ўақтынша ҳәкимшилик регламенти” тастыйықланды.

Усы регламентке тийкар, мүрәжат етиўши  жергиликли мәмлекетлик хызметлер орайына келип мүрәжат еткенде орай хызметкери тәрепинен арза бериўшиниӊ атынан электрон сораўнаманы толтырылады. Сораўнаманы толтырыў ушын шет ел фирмадан (жумыс бериўши)ден алынған ҳәм мәмлекетлик тилине аўдармаланған барлық социаллық кепилликлер ҳәм медициналық қамсызландырыў көрсетилген, сондай-ақ мийнет визасы (EMPLOYMENT VIZA) менен тәмийинлеў барысында жумыс бериўшиниң миннетлемелери нәзерде тутылғанлығы ҳаққында нотариус тәрепинен тастыйықланған ҳәм апостиль қойылған контракт нусхасы (шет ел мәмлекетинде апостиль қойыў мүмкиншилиги болмаған жағдайда ҳүжжет Ѳзбекстан Республикасы шет ел консуллық мәкемеси тәрепинен легализация қылынған) ҳүжжетлер талап етиледи ҳәм өз электрон қол таңбасы менен тастыйықланады. Арза бериўшиден сораўнамада кѳрсетилмеген мағлыўматлар, басқа ҳүжжетлерди талап етиў қадаған етиледи.

Мәмлекетлик хызмет кѳрсетилгени ушын нызам ҳүжжетлеринде белгиленген тәртипте көрсетилген жыйым тѳлеми ѳндириледи. Арза бериўши тәрепинен сораўнамада надурыс мағлыўмат кѳрсетилиўи, мәмлекетлик хызмет кѳрсетилиўи ушын жыйымды тѳлемеў мәмлекетлик хызметти кѳрсетилмеўине тийкар болады. Сораўнама сол күни 20 минуттың  ишинде мәкемелер-ара электрон бирге ислесиў системасы арқалы ўәкилликли орган болған Ѳзбекстан Республикасы Бәнтлик ҳәм мийнет қатнасықлары Министрлиги жанындағы Сыртқы Мийнет Миграциясы Агентлигине  жибериледи. Ўәкилликли орган сораўнама келип түскен күнинен баслап 3 жумыс күни ишинде шәртнама шәртлериниң халықаралық мийнет стандартларына муўапықлылығын үйренеди ҳәм рухсатнаманы бериў яки рухсатнама бериўди бийкар етиў ҳаққында қарар қабыллайды. Рухсатнама бериўди бийкар етиў ҳаққында қарар қабыл  етилгенде анық себеплер ҳәм нызам ҳүжжетлери нормалары көрсетилиўи тийис.

Рухсатнама бериў бийкар етилген жағдайда, мүрәжат етиўши бийкар етилген ҳүжжетлерди қайта сапластырып ҳәм регламентте белгиленген тәртипте қайта мүрәжат етиў ҳуқықына ийе.

Рухсатнама бериў ҳаққында қарар қабылланғанда, Ѳзбекстан Республикасы Бәнтлик ҳәм мийнет қатнасықлары Министрлиги жанындағы Сыртқы Мийнет Миграциясы Агентлигиниң жуўапкер хызметкери 20 минут ишинде рухсатнаманы рәсмийлестиреди ҳәм Мәмлекетлик хызметлер орайына электрон тәризде жибереди.

Бул тәртиплер Ѳзбекстан Республикасы Әдиллик  Министрлиги менен келисилген ҳалда Ѳзбекстан Республикасы Бәнтлик ҳәм мийнет қатнасықлары Министрлиги жанындағы Сыртқы Мийнет Миграциясы Агентлиги тәрепинен тастыйықланады.

 

С.Ш.Салиева,

Нѳкис қаласы мәмлекетлик

хызметлер орайы

бас қәнигеси

 

скачать dle 10.6фильмы бесплатно



  • 11-07-2019, 20:24 |
  • 546