«Тесип шыққан» теңгелер ямаса «Дийқан базары» аймағындағы «Валютчик» усланды

«Тесип шыққан» теңгелер ямаса «Дийқан базары» аймағындағы «Валютчик»  усланды

Өзбекистан Республикасы Жоқарғы суды Пленумының 2000-жыл 28-апрельде қабыл етилген «Валюта байлықларын нызамға қайшы рәўиште алыў ямаса өткериў ислери бойынша суд тәжирийбеси ҳаққында»ғы 8-санлы қарарының 4-пунктинде «Валюта байлықларын нызамға қайшы рәўиште алыў ямаса өткериў деп, Өзбекистан Республикасы аймағында усы ҳәрекетлер исленген ўақытта валюта байлықларын белгиленген тәртиплерди бузған ҳалда сатып алыў, сатыў ямаса алмастырыў түсиниледи» деп көрсетилген. Буны Нөкис қаласы турғыны, 1984-жылы туўылған пуқара Қ.К. оқып көрмеген қусайды. Болмаса, усындай нызамсыз ҳәрекетке қол урып, ҳуқық қорғаў уйымларының қырағы нәзерине илинбес еди.

2015-жыл 29-ноябрь күни Өзбекистан Республикасы Бас прокуратурасы жанындағы СВБЖҳЖДЛҚГ департаменти Қарақалпақстан Республикасы басқармасы Нөкис қалалық бөлими ҳәм Нөкис қалалық ишки ислер бөлими тәрепинен өткерилген оператив илажлар барысында Қ.К. Нөкис қаласы «Дийқан базары» аймағында ҳеш қандай ҳүжжетсиз, нызамсыз түрде 253 000 (еки жүз елиў үш мың) Қазақстан теңгесин пуқара Ж.Б. ҳәр бир теңгени 19 сумнан есаплап, жәми 4 807 000 (төрт миллион сегиз жүз жети мың) сумға сатып атырғанында иркилип, 253 000 Қазақстан теңгеси айғақлы зат ретинде алынған.

Жынаят ислери бойынша Нөкис қалалық судында болып өткен ашық суд мәжилисинде тергеў материаллары ҳәм гүўалардың көрсетпелери нәтийжесинде Қ.К. айыбы мойнына қойылды ҳәм ол Өзбекистан Республикасы нызамшылығына муўапық, тийисли жазаға тартылды.
Қ.К. басынан кешкен бул ҳәдийсе көпшилик ушын сабақ болады деп ойлаймыз.

Ж.ҚУРБАНБАЕВ,
Өзбекистан Республикасы Бас прокуратурасы жанындағы
СВБЖҳЖДЛҚГ департаменти Қарақалпақстан Республикасы
басқармасы Нөкис қалалық бөлими инспекторы, 3-дәрежели юрист


Дерек: erkinkarakalpak.uz

Фото: region.ej.by
скачать dle 10.6фильмы бесплатно



  • 2-05-2017, 16:55 |
  • 777