Пуқаралық қуралы ҳәм оның түрлери ҳаққында

Алдын хабар бергенимиздей, усы жылдың 21-июнь күни Олий Мажлис Сенатының 20-улыўмалық мәжилисинде Өзбекстан Республикасының «Қурал ҳаққында»ғы нызамының жойбары мақулланды.

Нызамның Сенат тәрепинен мақулланыўы кең жәмийетшилик ўәкиллери, әсиресе, социаллық тармақлардың пайдаланыўшыларының пикир-таласларын келтирип шығарды. Олар арасында нызамда келтирилген «Пуқаралық қурал не? Оған қандай қураллар киреди?» мазмунындағы сораўлар ҳәўиж алды.

Нызам бойынша қурал мақсети ҳәм тийкарғы параметрлери және классификацияларына қарай 3 түрге ажыратылды:

1) Пуқаралық қурал;

2) Хызмет қуралы;

3) Жаўынгерлик қурал.

Социаллық тармақлар пайдаланыўшыларының сораўларын есапқа алып нызамда пуқаралық қурал ҳаққындағы түсиндирмени келтирип өтпиўди мақул көрдик.

Пуқаралық қурал – аңшылық ҳәм спорт пенен шуғылланыў ушын, сондай-ақ, өзин-өзи қорғаў мақсетинде пайдаланыў ушын арналған қурал. Пуқаралық қурал аңшылық, спорт ҳәм өзин-өзи қорғаў қуралларына бөлинеди.

 Өзин-өзи қорғаў қуралы:

* Газли қурал – көзден жас ағызатуғын ямаса көзди ашытатуғын элементлер менен толтырылған газли баллоншалар, механикалық пүркеўишлер, аэрозоллы қурылмалар ҳәм басқа қурылмалар;

* Электрошок қурылмалары, ушқын шығарғышлар ҳәм зыян жеткериў тәсири электр энергиясынан пайдаланыўға тийкарланған басқа қурылмалар.

 Пуқаралық оқ атар қурал қатара оқ үзбейтуғын болыўы ҳәм барабанның сыйымлылығы он дана патроннан артық болмаўы керек.

 

Күнниң темасы: Пуқаралық ҳәм хызмет қуралларын қандай жағдайларда қолланыўға болады?

 

Өзбекстан аймағында қурал менен қатнас, оның ҳуқықый түсиндирмеси, түрлери ҳәм басқа қатнасықларға анықлық киргизилген усы нызамда пуқаралық ҳәм хызмет қуралынан пайдаланыў жағдайлары да белгилеп берилген.

Нызамның 26-статьясында атап өтилиўинше, пуқаралық ҳәм хызмет қуралын сақлаў және алып жүриў ҳуқықына ийе болған физикалық шахслар зәрүрли қорғаныў жағдайында ямаса оғада зәрүр жағдайда өз өмири ҳәм денсаўлығын, басқа пуқаралардың өмири ҳәм денсаўлығын және мүлклерин қорғаў ушын қуралды қолланыўы мүмкин.

Соның менен бирге, қуралды қолланыўдан алдын, қарсы қурал қолланып атырған адамды анық аңлатылған түрде ескертиў керек. Ескертиў имканы болмаса ямаса қуралды кешлеў қоллаўы пуқаралар ҳәм қурал ийесиниң өмирине тиккелей қәўип пайда етсе яки болмаса басқа аўыр ақыбетлерге алып келиўи мүмкин болғанда, ескертиўсиз қоллаўға рухсат бериледи.

Бирақ, қуралдың қолланыўы үшинши шахсларға зыян жеткермеўи керек.

Нызамның статьясында атап өтилиўинше, ҳәмиледарлық белгилери көринип турған ҳаяллар, майыплық белгилери көринип турған шахслар ямаса анық көринип турған яки ержетпегенлерге қарата пуқаралық ҳәм хызмет қуралын қоллаў қадаған етиледи. Бирақ, олар қураллы қарсылық көрсеткенде, пуқаралардың ямаса қуралды қолланып атырған адамның өмири ҳәм денсаўлығына қәўип салып ҳүжим еткенде, жоқарыдағы адамларға қарсы қуралды қолланыў мүмкин болады.

Сондай-ақ, қурал ийеси қуралын қоллаған, пуқаралардың өмири ҳәм денсаўлығына зыян жеткерген ҳәр бир жағдай ҳаққында қурал қолланылған орындағы ишки ислер мәкемесине дәрриў хабар бериўи шәрт және пуқаралардың денсаўлығына зыян жеткен жағдайда, оларға биринши медициналық  жәрдем көрсетиўи, биринши жәрдем берилиўи илажларын көриўи керек.

Ишки ислер мәкемеси болса, усы сыяқлы ҳәр бир жағдай бойынша прокурорға дәрриў хабар береди.

 

Ислам Матеков,

Қарақалпақстан хабар агентлигиниң шолыўшысы.

скачать dle 10.6фильмы бесплатно



  • 24-06-2019, 16:26 |
  • 775