Қум аўыл, Саманбай, Жеке терек, 25-киши район, Хожели ҳәм Мойнақ районы орайларына заманагөй телефон қурылмасы орнатылды

Жақында халқымыздың заманагөй мәлимлеме-коммуникация технологияларына болған талапларына муўапық Нөкиске «Өзбектелеком» АК Қарақалпақстан Республикасы филиалы тәрепинен «қала ҳәм аўыллық жерлерде заманагөй телекоммуникация хызметлерин енгизиў ҳәм инфраструктурасын буннан былай да раўажландырыў» бағдарламасы тийкарында Қытай Республикасының HUAWEI компаниясы тәрепинен ислеп шығарылған, улыўма сыйымлығы 5184 абонентке мөлшерленген заманагөй типтеги 8 дана MSAN қурылмалары алып келинди.

– Олардың 5 данасы Нөкис қаласының Қум аўыл, Саманбай, Жеке терек елатлары ҳәм  25-киши районға, 2 данасы Хожели районы орайына ҳәм 1 данаcы Мойнақ районы орайына орнатылды,-дейди филиал директоры Қ.Таженов. – Бүгинги күнде телефон тармақлары пуқаралардың үйлерине жалғанбақта.

Ал, пуқаралар жасайтуғын турақ жайларға үй телефонларын орнатыў 20700 сум болды. Усы телефон линиясынан тек сөйлесиў ушын ғана пайдаланбай, ҳәзирги ўақыттағы интернет тармағы, санлы телевидение (IP-TV) хызметинен де пайдаланыў мүмкиншилиги жаратылды.

Сондай-ақ, жақында интернет хызметиниң тарифлери бир неше есеге арзанлатылды. Интернет хызметиниң тезлиги 20 Мбит/сек.қа арттырылып, абонентлерге қолайлы тариф режелери ислеп шығылды.

Ҳәзирги ўақытта бул хызметтен пайдаланыўшыларының саны көбеймекте.

 

Ә.Жиемуратов,

Қарақалпақстан хабар агентлиги.

 

скачать dle 10.6фильмы бесплатно



  • 6-03-2019, 10:08 |
  • 772