Сырт елге шығыў паспорты ҳаққында билгиңиз келген мағлыўматлар

Тийкары

2019-жыл 1-январьдан баслап сырт елге шығыў ушын бөлек паспорт енгизилиўи Президенттиң 2017-жыл 16-августтағы «Өзбекстан Республикасы пуқараларының сырт елге шығыў тәртибин жетилистириўге байланыслы әҳмийетли ис-илажлары ҳаққында»ғы Пәрманында белгиленген. Сырт елге шығыў паспортының әмелдеги паспорттан парқы сонда, ол 48 беттен ибарат (әмелдеги паспорт 36 беттен ибарат), реңи тоқ қызыл рең. Ҳүжжеттиң әмел етиў мүддети 10 жыл.

Сырт елге шығыў паспорты ҳаққында билгиңиз келген мағлыўматлар

 

Пуқаралар 2021-жылдың 1-январына шекем Өзбекстан Республикасының халық аралық шәртнамаларға муўапық, кириў визаларын рәсмийлестириў талап етилмейтуғын мәмлекетлер аймағына Өзбекстан Республикасы пуқараларының әмелде қолланылып атырған 2011-жыл үлгисиндеги биометрикалық паспорттан пайдаланған ҳалда мәмлекеттен шығыўы мүмкин.

Бирақ, кириў визаларын рәсмийлестириў талап етилмейтуғын мәмлекетлерде болып турған Өзбекстан Республикасы пуқаралары ушын паспортлардан рухсат жазыўы стикериниң әмел етиў мүддети тамамланғаннан соң, Өзбекстан Республикасының халық аралық шәртнамаларына муўапық, кириў визаларын рәсмийлестириў талап етилетуғын мәмлекетлерге кириў ушын әмелдеги паспорты ҳақыйқый есапланбайды.

 

Әмелдеги паспорт пенен қайсы еллерге барыў мүмкин?

Визасыз режим орнатылған 9 яғный, Ғәрезсиз мәмлекетлер дослық аўқамы мәмлекетлерине рухсат бериў стикерисиз де шығыў мүмкин. Олар:

  1. Азербайжан,
  2. Армения,
  3. Беларусь,
  4. Қазақстан,
  5. Қырғызстан,
  6. Молдова, 
  7. Россия,
  8. Тәжикстан,
  9. Өзбекстан.

(Рәсмий түрде 2019-жылда ҒМДА мәмлекетлерине 9 ел киреди. Ал, Түркменстан менен Украина ҒМДА шәртнамасын тастыйықламаған мәмлекетлер статусындағы еллер есапланады).

 

Сырт елге шығыў паспорты енгизилди, енди бул тәртип сақлана ма?

Пәрманда белгиленгениндей, Өзбекстан Республикасы пуқаралары 2021-жылдың 1-январына шекем Өзбекстан Республикасының халық аралық шәртнамаларына муўапық, кириў визаларын рәсмийлестириў талап етилмейтуғын мәмлекетлер аймағына Өзбекстан Республикасы пуқарасының әмелде қолланылып атырған 2011-жыл үлгисиндеги биометрикалық паспортынан пайдаланған ҳалда Өзбекстан Республикасынан шығыўы мүмкин.

 

Неге әмелдеги паспортты шет елге шығыўшы ҳүжжет сыпатында тән алынбайды?

Биометрикалық паспорт талапқа жуўап бермегенлиги ушын сырт елге шығыў ушын бөлек паспорт енгизилди, деген пикир надурыс. Жәҳан тәжирийбеси үйренилгенде, ишки ҳәм сыртқы пайдаланыў ушын еки түрдеги ҳүжжет жүргизиледи ҳәм бул Халық аралық пуқара авиациясы шөлкеми (IKAO)ның талабы да саналады.

 

Сыртта оқыў, жумыс бойынша жүрген жерлеслеримиздиң паспортлардағы стикериниң мүддети таўсылған болса, олардың шет елде жасап жүриўи нызамсыз ба?

Яқ, олар Өзбекстанға келип, және шет елге шығып баратырғанында сырт елге шығыў паспортың рәсмийлестириўи мүмкин.

 

Қандай ҳалларда сырт елге шығыў паспорты берилмейди?

Пуқара үстинен жынайый ис ашылған ҳәм оның суд процесси тамамланбаған болса, алимент төлемин әмелге асырмаған болса ҳәм нызамда белгиленген жағдайларда сырт елге шығыў паспортын бериў бийкар етиледи. Дерек: kun.uz

 

Қанша төлеймиз?

Сырт елге шығыў паспорты ушын төленетуғын бажы муғдары Өзбекстан Республикасы Президенти Шавкат Мирзиёев қол қойған «2019-жылғы тийкарғы макроэкономикалық көрсеткишлери прогнозы ҳәм мәмлекет бюджети параметрлери ҳәм 2020-2021-жылларға бюджет бағдарлары ҳаққында»ғы қарарында белгилеп қойылды. Ҳүжжетке тийкарланып: - Сырт елге шығыў паспортын алыў ушын төленетуғын мәмлекет бажы – ең кем айлық ис ҳақысының 120 процентин қурайды (есаплағанда 243 276 сўм болады).

- 16 жасқа толмаған шахсларға сырт елге шығыў паспортын бериў ушын төленетуғын мәмлекет бажы – ең кем ис ҳақысының 80 процентин қурайды (162 184 сўм).

- Өзбекстан Республикасында турақлы жасайтуғын пуқаралығы жоқ шахсларға, сондай-ақ, 16 жасқа толмаған шахсларға шет елге шығыў паспортын бериў ушын төленетуғын мәмлекет бажы – ең кем айлық ис ҳақысының 100 процентин қурайды (202 730 сўм).

 

Қай жерден, қалай аламыз?

Сырт елге шығыў паспортын алыў ушын пуқаралар жасаў орнындағы Ишки ислер бөлимине хабарласыўы, жумыс орны, оқыў орны ямаса жергиликли өзин-өзи басқарыў мәкемелери тәрепинен тастыйықланатуғын анкета-арзаны тапсырыўы керек болады. Сондай-ақ, 3,5х4,5 см өлшемдеги фотосүўрет, паспорт нусхасы, әскерий бөлимнен мағлыўматнама да (әскерий хызметке мәжбүрлер ушын) усынылады. Дерек: parstoday.com

 

Интернет материаллары тийкарында makan.uz таярлады.

Сораўларыңыз қалған болса ботымыз бар:  @Makanuz_bot усыған жазың.

скачать dle 10.6фильмы бесплатно



  • 8-02-2019, 22:34 |
  • 1 325