Рухсатнама алмастан қурылған турақ жайларға мүлк ҳуқуқын бериў бойынша бир мəртелик улыўма мəмлекетлик акция

Ҳəзирги ўақытта халық арасында талап жоқары болған 103 түрдеги мəмлекетлик хызметлер Нөкис қаласы мəмлекетлик хызметлер орайы арқалы көрсетилип келинбекте. Орай тəрепинен мəмлекетлик хызметлер көрсетиў енгизилген күннен баслап ўəкилликли органлар тəрепинен мəмлекетлик хызметлерди көрсетиў ҳаққындағы арзаларды туўрыдан-туўры арза ийелеринен қабыл етиў қадаған етилди.   

Өзбекстан Республикасы Президентиниң 2018-жыл 20-апрель күнги “Пуқараларды социаллық қоллап-қуўатлаў бойынша қосымша ис-илəжлар ҳəмде өз басымшалық пенен қурылған турақ жайларға мүлк ҳуқықын бериў бойынша бир мəртелик акциясын өткериў ҳаққында”ғы ПФ-5421-санлы Пəрманы талапларыныӊ орынланыўын тəмийинлеў мақсетинде, Өзбекистан Республикасы Министрлер Кабинетиниӊ 2018-жыл 21-июнь күнги 461-санлы Қарары бойынша пуқаралардыӊ өз басымшалық пенен ийелеп алынған жер участкалары яки қурыў ушын рухсатнама алмастан қурылған турақ жайларға мүлк ҳуқуқын бериў бойынша бир мəртелик улыўма мəмлекетлик акциясы дағазаланды.

     Пəрман ҳəм қарардыӊ орынланыўы бойынша Нөкис қаласы ҳəкимлигиниӊ қарары қабыл етилип, өз басымшалық пенен қурылған көшпес мүлкке ийелик етиў ҳуқықын бериўши қалалық комиссия шөлкемлестирилген. Комиссияға қала ҳəкимлигиниӊ санаатты раўажландырыў, капитал қурылыс, коммуникациялар ҳəм коммунал хожалығы бойынша орынбасары басшылық етеди. Комиссия ағзалары сыпатында Нөкис қаласы жер дүзиў ҳəм көшпес мүлк кадастр мəмлекетлик кәрханасы бөлими, Нөкис қаласы қурылыс бөлими, Нөкис қаласы ишки ислер бөлими, Нөкис қаласы жол ҳəрекети қəўипсизлиги бөлими, Нөкис қаласы мəмлекетлик салық инспекциясы бөлими, Нөкис қаласы Экология ҳəм тəбиятты қорғаў инспекциясы, Нөкис қаласы мəмлекетлик санитария эпидемиология қадағалаў орайы, Нөкис қаласы әдиллик бөлими бириктирилген.

    Комиссияныӊ тийкарғы ўазыйпасы етип, бир мəртелик акция шеӊберинде көшпес мүлкке мүлк ҳуқықын белгилеў ушын келип түскен мүрəжатлерди көрип шығыў ҳəм олардыӊ нəтийжелери бойынша тийисли жуўмақ бериў ҳəм мүрəжатлерди көрип шығыўда көшпес мүлк объектин орынға шыққан ҳалда үйрениў жумысларын алып барыў белгиленген.

    Пуқаралар өз басымшалық пенен қурылған турақ жайына болған мүлк ҳуқықын алыў ушын мүрəжат етиўшиниӊ шаӊарақ ағзалары ҳаққында ҳəмде жер участкасына ийелик еткен мүддети, имарат қурылған ўақты бойынша өзин-өзи басқарыўшы уйымнан мағлыўаматнама менен сол имараты жайласқан аймақтағы мəмлекетлик хызметлер орайлары арқалы ҳəм Өзбекстан Республикасы бирден бир интерактив хызметлер порталы арқалы мүрəжат етиўине болады. Мəмлекетлик хызметлер орайы арқалы мүрəжат еткенде, орай хызметкери тəрепинен мурəжет етиўши пуқараға электрон санлы имза ашылып, dxa.gov.uz сайты арқалы мүрəжат етиўшиниӊ анкетасы толтырылады ҳəм сол ўақыттыӊ өзинде исши орган Нөкис қаласы жер дүзиў ҳəм көшпес мүлк кадастр мəмлекетлик кәрханасына жибериледи.

    Бул жерде исши орган-кадастр мәкемеси болып, оныӊ ўазыйпасы төмендегише:

    Исши орган мүрəжат етиўшиниӊ анкета ҳəм қосымша ҳүжжетлери келип түскен күннен баслап, үш ис күни ишинде озбасымша курылған көшпес мүлктиӊ техникалық планын таярлайды ҳəм анкетасына қосып, жоқарыдағы комиссия ағзаларына электрон бирге ислесиў системасы арқалы жибереди. Комиссияныӊ ҳəр бир ағзасы кадастрдан келген анкета ҳəм техникалық план бойынша 5 күнниӊ ишинде имарат жайласқан орынға барып үйренеди. Соӊ үйрениў нəтийжелери бойынша өз жуўмағын (мағлыўматнамаларын) таярлап, исши органға мəкемелераралық электрон бирге ислесиў системасы арқалы жоллайды. Исши орган үш ис күн ишинде комиссия ағзаларыныӊ  жуўмағынан келип шығып, өзбасымша қурылған турақ жайға мүлк ҳуқықын бериў яки бийкар етиў бойынша далалатнама рәсмийлестиреди ҳəм Комиссия тəрепинен тастыйықланады. Исши орган Комиссияныӊ жуўмағы менен өзбасымша қурылған имаратқа мүлк ҳуқықын бериў мүмкин деп табылған болса, бир мəртелик жыйымды төлетиў ушын электрон көрнистеги есапбети фактураны дәлалатнама менен қосып, мəмлекетлик хызметлер орайына жибереди.

    Егер өзбасымшалық пенен қурылған имаратқа болған мүлк ҳуқықын бериў мүмкин емес деп табылғанда комиссия исши органы кадастр тəрепинен бийкар етиў себеби көрсетилген хат таярлайды ҳəм акттыӊ нусқасын қосып электрон система арқалы мəмлекетлик хызметлер орайына жибереди.

     Мəмлекетлик хызметлер орайы исши органнан электрон система арқалы жуўап келген күнниӊ өзинде мүрəжат ийесине хабарлайды ҳəм таяр хүжжетти мүрəжат ийесине усынады.

Акция 2019-жыл 1-май күнине шекем даўам етеди. Сонлықтан, Нөкис қаласы Мәмлкетлик хызметлер орайы акцияда белсене қатнасыуыңызды сорайды.

 

Қ. Оспанова

З.Джумабаев

Нөкис қаласы мәмлекетлик хызметлер

орайының бас қәнигелери  

скачать dle 10.6фильмы бесплатно



  • 10-10-2018, 23:07 |
  • 414