Ишки еки контурлы ысытыў қазан (аристон котёл) орнатыў бойынша сораў-жуўаплар

Қарақалпақстан Республикасы Үй-жай коммунал хызмет көрсетиў министрлигиниң Көп қабатлы үй-жай фондын эксплуатация қылыў, раўажландырыў ҳәм жеке меншик үй-жай мүлкдарлары ширкетлери жумысларын муўапықластырыў Басқармасы баслығы Нурсаид Султанов сораўларымызға жуўап береди.

Сораў: Ҳәзирги ўақытта Нөкис қаласындағы көп қабатлы турақ жай имаратларына еки контурлы ысытыў қазанларын орнатыў бойынша жумыслар алып барылып атыр усы бойынша түсиник берсеңиз?

 - Нөкис қаласында 143 көп квартиралы турақ жайлардағы 2 мың 866 квартираларға еки контурлы ысытыў қазанларын орнатыў бойынша тийисли министрликлер ҳәм коммерциялық банклер менен келисилген ҳалда Қарақалпақстан Республикасы Министрлер Кеңеси тәрепинен 2018-жыл 22-январь 01-09/6-01/83-сан менен Нөкис қаласындағы 143 көп квартиралы турақ жайлардың мәнзилли дизими тастыйықланды.

Сораў: Еки контурлы ысытыў қазанларын орнатыў ушын жойбар-смета ҳүжжетлери ким тәрепинен исленеди, қазанлардың орнатыў жумысларын ким алып барады ҳәм оларға ким сервис хызметин көрсетеди?

- Қарақалпақстан Республикасы Министрлер Кеңеси Жанылғы-энергетика, коммунал хожалығы ҳәм абаданластырыў мәселелери комплекси мәжилисиниң 2018-жыл 10-марттағы 03-08/6-03/147-санлы банянламасы менен 143 көп квартиралы турақ-жайлардағы 2 мың 866 квартираларға ысытыў қазанларын орнатыў жумысларын алып барыўда алты подрядчик (кесип алып ислеўши) кәрханалар меншиклестирилген турақ жай ийелери шерикликлери ҳәм ҳәр бир банк кесиминде бириктирилди.“ҚҚ ГАЗ ЖОЙБАР” ЖШЖ усы көп квартиралы турақ жайлардың жойбар-смета ҳүжжетлерин таярлаўшы жойбар кәрханасы етип белгиленди. “АIRFEL” маркалы еки контурлы ысытыў қазанларына “GOOD DEEDS” жеке меншик кәрханасы, “ARISTON” маркалы еки контурлы ысытыў қазанларына “Проект Строй Нукус” ЖШЖ кәрханасы ҳәм “VITECH” маркалы еки контурлы ысытыў қазанларына “Nukus montaj spets stroy” ЖШЖ сервис хызметин көрсетиўши кәрханалар етип белгиленди.

143 көп квартиралы турақ-жайлардағы 2 мың 866 квартиралар 25 типлерге ажыратылып, ҳәр бир тип кесиминде жойбарлаўшы “ҚҚ ГАЗ ЖОЙБАР” ЖШЖ тәрепинен жойбар-сметалары толығы менен ислеп шығылды.

Ҳалықтың көпшилик тәрепинен кызығыўшылық билдирип атырған “VITECH” маркалы еки контурлы ысытыў қазанларын жеткизип бериўши “Коммет Про” ЖШЖ, “AIRFEL” маркалы еки контурлы ысытыў қазанларын жеткизип бериўши “Нукус профил диллер” ЖШЖ кәрханасы,“ARISTON” маркалы еки контурлы ысытыў қазанларын жеткерип бериўши  “Сантех Суранек Сервис” ЖШЖ кәрханалары белгиленди.

Сораў: Бул қазанларды сатып алыў ушын қандай жеңилликлер бар?

- Усы еки контурлы ысытыў қазанларын орнатыўда жеке меншик турақ жай ийелери шерикликлери ағзаларына (көп квартиралы турақ жай ийелери)не олардың талапларына бола еки контурлы ысытыў қазанларын сатып алыў ҳәм орнатыў ушын Орайлық банктиң қайта қаржыландырыў ставкасы муғдарында жыллық 16% пенен басланғыш төлемлерсиз 5 жыл мүддетке жеңиллетилген тутыныў кредитлери ажыралылыўы белгиленген.

Сораў: Кредит алыў ушын қандай ҳүжжетлерди таярлаў керек?

- Коммерциялық банклерден жеңиллестирилген тутыныў кредитлерди алыў ушын төмендеги ҳүжжетлерди тапсырыўлары тийис:

1.Арза

2.МПЖ дан шаңарақ ағзалары ҳәм жасаўы ҳаққында мағлыўматнама;

3.Жумыс орнынан кейинги 12 ай даўамындағы алынған дәрамадлары ҳаққында мағлыўматнама;

4.Паспорт нусқасы;

5.ИНН, ИНПС нусқалары;

6.2 шахстың кепиллик хаты (кепиллик бериўши шахс болмаған жағдайда гиреў болыўы тийис, гиреўге көшетуғын мүлклер, техникалар, үскенелер).

2 шахс кепил болғанда төмендеги ҳүжжетлерди тапсырыўы тийис:

1.МПЖ дан шанарақ ағзалары ҳәм жасаў ҳаққында мағлыўматнам;

2.Жумыс орнынан кейинги 12 ай даўамында алынған дәрамадлары ҳаққында мағлыўмат;

3.Паспорт нусқасы;

4.ИНН, ИНПС нусқалары.

Сораў: Пуқаралар бул бойынша толық мағлыўматты қай жерден алыўы мүмкин?

- Ишки еки контурлы ысытыў қазанларын сатып алыў ушын кредитлерге хужжетлер таярлаўда, орнатыўда подрядчик кәрханалар мәселеси ҳәм басқа да өзиңизди қызықтырған ҳәр қандай мағлыўматларды Қарақалпақстан Републикасы Үй-жай коммунал хызмет көрсетиў министрлигиниң  (361) 223-94-54 телефон номерине қоныраў етип алыўыңызға болады.

 

Сәўбетлескен

Лола Қаллыханова,

журналист

 

 

скачать dle 10.6фильмы бесплатно



  • 10-10-2018, 18:35 |
  • 703