Суў тармақларына жалғаныў ҳәм есаплаў үскенелерин пломбалаў хызметлери енди мәмлекетлик хызметлер орайы тәрепинен көрсетиледи

Өзбекстан Республикасы Президентиниң «Халыққа мәмлекетлик хызметлерин  көрсетиўдың миллий системасын түптен реформалаў ис-иләжлары ҳаққында»ғы 2017-жыл 12-декабрь күнги ПФ-5278-санлы Пәрманына ҳәм инженер-коммуникация тармақларына жалғаныў бойынша мәмлекетлик хызметлерин көрсетиў системасын жәнеде жетилистириў мақсетинде Өзбекстан Республикасы Министрлер Кабинетиниң 2018-жыл 31-март күнги 256-санлы қарарына муўапық Ҳәкимшилик регламенти тастыйықланды.

Регламентке муўапық, юридикалық ҳәм физикалық шахслардың (кейинги орынларда тутыныўшы деп айтылады) суў тармақларына жалғаныў үшын техникалық шәртлерин ислеп шығыў, суў тәмийнаты ҳәм суўды шығарып таслаў жойбарын ислеп шығыў ҳәм келисиў, қурылыс-монтаж жумысларын әмелге асырыў, суў есаплаў үскенелерин пломбалаў тәртиплери белгилеп қойылған.

Мүрәжатшы суў тармақларына жалғаныў ушын 2 түрли усылда мүрәжат етиўи мүмкин.

1-Мәмлекетлик хызметлер орайына өзи барған ҳалда.

2-Өзбекстан Республикасының бирден-бир интерактив мәмлекетлик хызметлер порталынан дизимнен өткен ҳалда.

Бул еки усылда да электрон санлы имза талап етиледи. Электрон санлы имзаны мәмлекетлик хызметлер орайына өз пуқаралық паспорты ҳәм флешкарта менен барып алынады. Мәмлекетлик хызметлер орайындағы көрсетилип атырған хызметлердиң барлығына электрон санлы имза талап етиледи, ҳәр бир пуқараға берилип атырған электрон санлы имза мүддети 2 жыл.

Мүрәжатшы суў тармақларына жалғаныў ушын биринши нәўбетте суў тармақлары бөлиминен 2 мағлыўматнама:

1) Жалғанып атырған объекттиң (турақ жай, имәрат) суўдан пайдаланыў түрлери, сондай-ақ өрт өшириў бойынша көрсеткишлери сәўлелендирилген суў тутыныўы ҳәм суўды шығарып таслаў көлеми ҳаққындағы мағлыўмат.

2) Басқа физикалық ҳәм юридикалық шахслардың мүлкинде болған суў тармақлары – суўды шығарып таслаў тармақларына жалғаныў ушын рухсатнама.

Архитектура ҳәм қурылыс бөлиминен объекттиң халық жасаў орнына байланыслы жайласыўы сәўлелендирилген ҳалат режеси (тарийхынан көширме нусқасы).

Жоқарыда көрсетилген мағлыўматларды алып, пуқара мәмлекетлик хызметлер орайына келеди ҳәм бул жерде қәнигелерге суў тармақларына жалғаныўы керек болған имараттың кадастр ҳүжжетлерин усынады, мүрәжатшыдан электрон санлы имза бар яки жоқлығы соралып, жоқ болса жаңадан алынады, бар болса сол имзадан пайдаланылады. Суў тармақларына жалғаныў ушын (мүрәжатты көрип шығыў ушын ең кем айлық ис-ҳақының 10% муғдарында бажы талап етиледи), суў есаплаў үскенесин пломбалаў ушын (бийпул) сораўнамалар электрон көринисте толтырылады ҳәм толтырылған сораўнама мүрәжатшының электрон санлы имзасы менен тастыйықланып суў тармақлары бөлимине жибериледи. Суў тармақлары бөлими мүрәжат келип түскен күннен баслап 3 жумыс күни ишинде техникалық шәртлерин ҳәм жойбарластырыў, қурылыс-монтаж жумысларын алып барыў ушын өзлериниң коммерциялық шәртнамаларын усынады, мүрәжатшы техникалық шәртлери келгенлиги ҳаққында орай тәрепинен хабарландырылады ҳәм мәмлекетлик хызметлер орайына келип техникалық шәртти алып кетеди.

Пуқаралардыӊ Мәмлекетлик хызметлерден пайдаланыўы оларға ўақыттан утыў менен бир қатарда басқа да қолайлылықлар жаратып береди. Бул хызметлерден пайдаланыўға ҳәм жақынларыңызға жеткериўге шақырып қаламыз.

 

Б.Даўлетмуратов

Шоманай районы Мәмлекетлик хызметлер орайы Мәмлекетлик

дизимге алыў ҳәм рухсат бериўши ҳүжжетлерди рәсмийлестириў

бөлими баслығы

                                                  

скачать dle 10.6фильмы бесплатно



  • 17-07-2018, 20:18 |
  • 131