Өз басымшалық пенен салынған яки рухсатнама алмастан қурылған турақ жайларды ҳүжжетлестириў бойынша бир мәртелик акциясы жәрияланды

Өзбекстан Республикасы Президентиниң 2018 жыл 20‑апрельдеги “Пуқараларды социаллық қоллап-қуўатлаў бойынша қосымша ис-илажлар ҳәмде өз басымшалық пенен қурылған турақ жайларға байланыслы мүлик ҳуқықын белгилеў бойынша бир мәртелик улыўма мәмлекетлик акциясын өткериў ҳаққында”ғы ПП-5421-санлы Пәрманы қабыл етилди.

Пәрманға муўапық өз басымшалық пенен ийелеп алынған жер участкаларында яки имарат қурыў ушын рухсатнама алмастан қурылған турақ жайларға байланыслы мүлик ҳуқықын белгилеў бойынша бир мәртелик улыўма мәмлекетлик акциясы жәрияланып, ол 2019-жыл 1-майға шекем даўам еттириледи.

Усы пәрман тийкарында ϴзбекстан Республикасы Министрлер Кабинетиниң
2018-жыл 21-июнь күнги 461-санлы қарары қабыл етилип, усы қарар менен көшпес мүликке байланыслы мүлик ҳуқықын белгилеў бойынша бир мәртелик улыўма мәмлекетлик акциясы шеңберинде көшпес мүликлерге байланыслы мүлик ҳуқықын белгилеў тәртиби ҳаққындағы Реже тастыйықланды.

Бунда физикалық шахслар (оның нызамлы ўәкиллери) өз басымшалық пенен қурылған имаратқа байланыслы мүлик ҳуқықын алыў ушын имарат жайласқан аймақтағы Мәмлекетлик хызметлер орайы арқалы район (қала) ҳәкиминиң атына арза менен мүрәжат етеди.

Арзаға төмендегилер қосымша қылынады:

1.Мүрәжат етиўшиниң паспорт нусқасы;

2.Мүрәжат етиўшиниң шаңарақ ағзалары ҳаққында ҳәмде жер участкасына ийелик еткен мүддетлери ҳәм имарат қурылған ўақыт ҳаққында пуқаралардың өзин-өзи басқарыў органларының мағлыўматнамалары.

Мүрәжат етиўши арзаны өз имзасы менен тастыйықлайды. Арзаны көрип шығыў ушын Мәмлекетлик хызметлер орайы тәрепинен жыйым пулы өндирилмейди, бир мәртелик төленетуғын жыйым пулынан басқа.

Мүрәжат етиўши тәрепинен жалған мағлыўматлар яки оған қосымша қылынатуғын ҳүжжетлер толық болмаса арза қабыл етилмейди.

Мүрәжат етиўши тәрепинен усынылған арза ҳәм оған қосымша қылынған ҳүжжетлер Мәмлекетлик хызметлер орайы хызметкери тәрепинен сканерленеди ҳәм бир саат даўамында система арқалы Қарақалпақстан Республикасы жер дүзиў ҳәм көшпес мүлик кадастры мәмлекетлик карханасының район (қала)лық филиалларына (кейинги орынларда комиссия исши органы деп аталады) жибериледи.

Комиссия исши органы арза келип түскеннен кейин 3 жумыс күни даўамында мүрәжат етиўшиниң арзасында көрсетилген орынға шыққан ҳалда өз басымшалық пенен қурылған имаратты үйренип, оның техник планын қәлиплестиреди ҳәмде усы техник планды комиссия ағзаларына арза ҳәм оған қосымша етилген ҳүжжетлер менен бирге ахборот-коммуникация тармақлары арқалы жибереди.

Комиссия ағзалары арза келип түскеннен кейин 5 календарь күни даўамында мүрәжат етиўшиниң өз басымшалық пенен қурылған имараты жайласқан орынға барған ҳалда үйренип шығады ҳәм үйрениў нәтийжелерине көре комиссия исши органына көшпес мүлик объекти бойынша өз жуўмақларын (мағлыўматнамаларын) система арқалы жибереди, район (қала) әдиллик бөлими баслығынан басқа.

Район (қала) әдиллик бөлими баслығы бир мәртелик акция даўамында өз басымшалық пенен қурылған имаратларға байланыслы мүлик ҳуқықын белгилеўде ҳуқықты қоллаў әмелиятын изшил ҳәм бирдей тәмийинлеў илажларын әмелге асырады, норматив-ҳуқықый ҳүжжетлерди қоллаў әмелиятын үйренеди ҳәм анықланған нызам ҳүжжетлери бузылыўларын, оларға имкан бериўши себеп ҳәм шәрт-шараятларды сапластырыў илажларын көреди.

Комиссия исши органы 3 календарь күни даўамында комиссия ағзаларының жуўмақларына тийкар көшпес мүлик объектин үйрениў бойынша тастыйықланған АКТти рәсмийлестиреди.

АКТте комиссия ағзаларының жуўмақлары қөрсетиледи ҳәмде өз басымшалық пенен қурылған имаратқа байланыслы мүлик ҳуқықын белгилеў мүмкинлиги яки мүмкин емеслиги, атап айтқанда имарат жайласқан жер участкасына мийрас қылып қалдырылатуғын өмирлик ийелик етиў ҳуқықы берилиўи мүмкинлиги яки мүмкин емеслиги көрсетиледи.

АКТ комиссия исши органы жуўаплы хызметкери тәрепинен имзаланады ҳәм комиссия баслығы тәрепинен тастыйықланады.

АКТке комиссия исши органы тәрепинен үйрениў даўамында дүзилген көшпес мүлик объектиниң планы қосымша қылынады.

Комссия тәрепинен шахстың өз басымшалық пенен қурылған имаратына байланыслы мүлик ҳуқықын белгилеў мүмкин деп табылғанда комиссия исши органы АКТ тастыйықланған күнниң өзинде Мәмлекетлик хызметлер орайына мүрәжат етиўши бир мәртелик жыйым пулды төлеўи ушын электрон тәризде счет-фактураны система арқалы жибереди.

Мәмлекетлик хызметлер орайы счет-фактура келип түскеннен кейин бир саат даўамында мүрәжат етиўшини ахборот-коммуникация системасы арқалы хабардар қылады ҳәмде счет-фактураға өз мөрин басып мүрәжат етиўшиге усынады.

Мүрәжат етиўши счет-фактураны алған күннен баслап 4 жумыс күни даўамында көрсетилген счет-фактурада көрсетилген төлемди (ең кем ис-ҳақының бес есеси муғдарындағы бир мәртелик жыйым пулы) әмелге асырады.

Мүрәжат етиўши тәрепинен бир мәртелик жыйым пулы белгиленген мүддетлерде төленбеген жағдайда, оның өз басымшалық пенен қурылған имаратына байланыслы мүлик ҳуқықын белгилеў ислери тоқтатылып турылады. Мүрәжат етиўши тәрепинен бир мәртелик акция мүддети өткенге шекем төлем әмелге асырылмаса өз басымшалық пенен қурылған имаратына байланыслы мүлик ҳуқықы белгиленбейди.

Комиссия исши органы мүрәжат етиўши тәрепинен бир мәртелик жыйым пулын төлегеннен кейин 2 календарь күни даўамында Комиссия баслығы тәрепинен тастыйықланған АТК тийкарында мүрәжат етиўшиниң өз басымшалық пенен қурылған имаратына мүлик ҳуқықын белгилеў ҳаққында район (қала) ҳәкиминиң қарары жойбарын таярлайды ҳәм тастыйықлаў ушын район (қала) ҳәкимине киритеди. Қарар жойбанырда өз басымшалық пенен қурылған имарат ийесине имарат қурылған жер участкасына (участканың бир бөлегине) мийрас қылып қалдырылатуғын өмирлик ийелик етиў ҳуқықын бериў де нәзерде тутылады.

Район (қала) ҳәкиминиң қарары 2 жумыс күни даўамында қабыл қылынады. Қарар нусқасы қабыл қылынған күннен баслап 1 жумыс күни даўамында комиссия исши органы тәрепинен Мәмлекетлик хызметлер орайына ахборот-коммуникация тармақлары арқалы жибериледи.

Мәлекетлик хызметлер орайы район (қала) ҳәкиминиң қарары нусқасы келип түскеннен кейин бир саат даўамында мүрәжат етиўшини ахборот-коммуникация тармақлары арқалы хабардар қылады ҳәмде қарар нусқасын өз мөрин басып, мүрәжат етиўшиге усынады.

ϴз басымшалық пенен қурылган имаратқа байланыслы мүлик ҳуқықын белгилеў ҳәмде жер участкасына өмирлик ийелик етиў ҳуқықын бериў ҳаққында район (қала) ҳақиминиң қарары көшпес мүликке болған мүлик ҳуқықын белгиленген тәртипте мәмлекетлик дизимнен өткериў ушын тийкар есапланады.

 

  Тахтакөпир районы

 Мәмлекетлик хызметлер орайы қәнигеси                              Т.Жусипов

 

Дерек: taxtakopir.rk.uz

 

скачать dle 10.6фильмы бесплатно



  • 4-07-2018, 14:59 |
  • 373