Нөкис районы прокурорының есабаты

Район прокуроры басшылық ететуғын 2-секторға қараслы «Қутанкөл» МПЖ ҳәм «Бақаншақлы» АПЖ аймақларында бүгинги күни 10987 халық жасайды.

Бүгинги күн жағдайына ра­йон прокурорына бириктирилген 2-сектор исши топары тәрепинен аймақтағы 1864 шаңарақтың барлығы да толық үйренип шығылды. Бул шаңарақларда жәми 448 машқала бар екенлиги анықланып, 427 машқаланың шешимин таўып, қалған 21 машқала «жол картасы»на киргизилди.

Атап айтқанда, «Қутанкөл» МПЖ, «Тоқымбет» аўылында жасаўшы Т.Қорғановтың пуқара­лық паспорты жаңа биометрикалық паспортқа өзгертилип берилген болса, усы аймақта жасаўшы Е.Қайыпбаевтың турақ жай имаратының жанып кетиўине байланыслы оның жасаў жағдайынан хабар алынып, оған азық-аўқат өнимлери жәрдем ретинде берилди. Сондай-ақ, 6-санлы мектепке шекемги билимлендириў мәкемесиниң филиалына тәбийғый газ тармағы тартылып, қайта оңлаў жумыслары әмелге асырылған болса, «Туўатай» аўылында жасаўшы кем тәми­йинленген шаңарақ А.Қошетерованың турақ жайына тәбий­ғый газ ҳәм электр тогы тармағы тартып берилди. 15-санлы улыўма орта билим бериў мектеби филиалының авариялық жағдайға келип қалғанлығы себепли, мектеп имаратына электр тармағы жаңадан тартылып, төбеси шиферланды ҳәм мектепке ири оңлаў жумыслары алып барылды.

 «Қутанкөл» МПЖ, «Мақсым қала» ҳәм «Тоқымбет» аўылларында жасаўшы пенсионерлер Н.Жумабаев ҳәм Б.Жумабаева­ларға ҳаса таяқлары, 1-топар ма­йыбы Ж.Исмайловқа, «Жаманша-1» ҳәм «Жаманша-2» аўылларында жасаўшы майып пуқаралар О.Оразымбетова ҳәм А.Ержановаларға майыплар арбашалары берилди.

«Бақаншақлы» АПЖ аймағында жасайтуғын үй шараятында оқып атырған жас өспиримлер Р.Амандурдыева, А.Хожабае­ва, А.Алланиязова, Б.Қуўанышбаев ҳәм Ю.Қуўанышбаевлардың жасаў жағдайларынан хабар алынып, ҳәр бири азық-аўқатлық затлар ҳәм оқыў қураллары менен тәмийинленди. Усы аймақтағы «Лакрица» аўылында жасаўшы 14 пуқараның турақ жайларына ҳәм ийелеп турған жер майданларына ийелик етиў ҳуқықын бериўши ҳүжжетлериниң рәсмийлестирилип берилиўине ерисилди.

«Қутанкөл» МПЖ аймағынан өтип турған орайлық көшениң бойындағы 500 метр аралыққа заманагөй жақтыландырыў бағаналары орнатылды.

Өзбекстан Республикасы Президентиниң 2018-жыл 29-март­тағы «Абат аўыл» бағдарламасы ҳаққындағы Пәрманы тийкарында «Бақаншақлы» АПЖ, «Ақмаңғыт» аўылы бағдарламаға киргизилип, бүгинги күни усы аймақтағы 1000 метр аралыққа таза ишимлик суўы қубырлары тартылып, 600 метр аралыққа ракушка қумы төселди. 2 дана жаңа трансформатор орнатылып, 2000 метр аралыққа электр сымы бағаналары тартылмақта. Усы аймақтағы 26-санлы улыўма орта билим бериў мектебиниң спорт залына ири оңлаў жумысларын алып барыў ушын 485 млн. сум муғдарында қаржы ажыратылып, бул жумыслар баслап жиберилди.

Бүгинги күнде 2-сектор аймағында сектор ағзаларының исши топары тәрепинен анықланған машқалаларды шешиў ушын тийисли мәкеме ҳәм кәрхана­ларға хатлар жиберилип, үйренилип шығылмақта.

 

Ш.АЛЛАМБЕРГЕНОВ,

Нөкис районы прокуроры, I дәрежели юрист.

 

Дерек: «Еркин Қарақалпақстан» газетасы

 

скачать dle 10.6фильмы бесплатно



  • 16-06-2018, 22:42 |
  • 316