Ишимлик суў тутыныўшылары хатлаўдан өткерилмекте

Өзбекстан Республикасы Президентиниң «Суў тәмийнаты ҳәм суў шығарыў хызметин көрсетиў тараўында төлеў интизамын түп-тийкарынан жетилистириў ис-илажлары ҳаққында»ғы Пәрманының орынланыўын тәмийинлеў мақсетинде Өзбекстан Республикасы Бас про­ку­ра­турасы жанындағы Мәж­бүрий орынлаў Бюросы, Өзбекстан Республикасы Ишки ислер минис­трлиги, Әдиллик министрлиги, Мәмлекетлик салық инспекциясы, Жоқарғы суды, Қаржы министрлиги, Турақ жай коммунал хызмет көрсетиў министрлиги, Саўда-санаат палатасы, «Ўзбекэнерго», «Ўзтрансгаз» акционерлик жәмийетлери тәрепинен қабыл етилген бийлиги тийкарында энергия ресурслары, ишимлик суў ҳәм суў шығарыў хызмети бойынша өндирилиўи үмитсиз болған ҳәм де тутыныўшылар есабына тийкарсыз киргизилген қарыздарлықлардың хатлаўдан өткерилиўи белгиленген.

Бүгинги күнде суў ҳәм суў шығарыў хызмети бойынша хатлаў ислери Бюро хызметкерлери тәрепинен мәкан пуқаралар жыйыны ўәкиллери, «Түйемойын-Нөкис» РСҚПБ МУК хызметкерлери менен биргеликте ҳәр бир ишимлик суў тармағынан пайдаланыўшы хожалықларда өткерилип атыр.

Қарақалпақстан Республикасы аймағында жәми 172289 ишимлик суў тармағынан пайдаланыўшы тутыныўшылардан 169050и физикалық шахслар, 3239ы юридикалық шахслардан ибарат болып, 2018-жылы апрель айынан баслап бүгинги күнге шекем 4000 нан аслам физикалық шахслардың хожалықларында хатлаў ислери әмелге асырылды ҳәм даўам етпекте.

Хатлаў актин толтырыў барысында тийкарынан сол хожалық ийесиниң ҳүжжетлери, үй ҳүжжетлери, хожалықта жасаўшы адамлар саны, үй ҳайўанлары саны, үй қуслары саны, егислик ҳәм егислик емес жер майданы, автомобиль ҳәм бас­қа да арнаўлы техникалар саны, суў есаплағыш қурылмасы орнатылған болса, қурылманың маркасы, завод номери, ақырғы көрсеткиши және де қосымша мағлыўматлар хатлаў актине киргизилип барылады.

Тутыныўшылардың әмелге асыр­ған төлемлериниң Банк есап бетине дурыс түскенлиги ямаса киргизилмей қалған суммаларды анықлаў мақсетинде хатлаў өткерилип атырған хожалықтың абонент дәптершесиндеги 2015-2018-жыллар аралығындағы әмелге асырған төлеў квитанцияларының саны ҳәм де суммалары да хатлаў актине жазылып барылады.

Бул хатлаў актине жазылып атыр­ған ҳәр бир мағлыўмат бүгинги күнде иске түсип атырған «Биллинг» электрон мағлыўматлар базасына киргизилип, буннан былай ишимлик суў ҳәм суў шығарыў хызметинен пайдаланыўшы тутыныўшылардың есап-китабының дурыс жүргизилиўине, қарыздарлықлардың кемейиўине, тийкарсыз киргизилген (нореал) қарыздарлықлардың сапластырылыўына имканият жаратылады.

Жуўмақлап айтқанда, нызамлы түрде өткерилип атырған хатлаў ўақтында Бюро хызметкерлери тәрепинен тутыныўшылардан талап етилген ҳүжжетлер көрсетилсе, себепсиз наразылықлар билдирилмесе, хатлаўдың сапалы ҳәм толық өткерилиўине тосқынлық етилмесе, тиришилигимиз тийкары болған ишимлик суўының себепсиз ысырап болыўының алдын алған боламыз.      

 

Р.Абдиязов,

Мәжбүрий орынлаў Бюросы Қарақалпақстан Республикасы басқармасы Энергия ресурслары, суў ҳәм  суў шығарыў тараўында қарыздарлық өндириўин муўапық­ластырыў бөлими инспекторы.

 

 

Дерек: «Еркин Қарақалпақстан» газетасы

скачать dle 10.6фильмы бесплатно



  • 22-05-2018, 12:00 |
  • 253