Жыйналып барылатуғын пенсия системасы

Өзбекстан Республикасы Министрлер Кабинетиниң 2018-жыл 26-март күнги 238-санлы қарары менен Пуқараның жыйналып барылатуғын пенсия системасында есап­қа қойыў бойынша мәмлекетлик хызмет көрсетиўдиң ҳәкимшилик регламенти тастыйықланды.

Жыйналып барылатуғын пенсия системасында қатнасыў еки түрде әмелге асырылады:

- жумыс бериўшилер, сондай-ақ, жумысты мийнет шәртнамасы тийкарында әмелге асырыўшы пуқаралар ушын мәжбүрий. Есап­қа қойыўға мүрәжатты жумыс бериўши береди;

- юридикалық тәреп болмай турып исбилерменлик хызмети менен шуғылланыўшы жеке тәртиптеги исбилерменлер ҳәм дийқан хожалықларының ағзалары, сондай-ақ, басқа да пуқаралар ушын ықтыярлы тәртипте. Есапқа қойыўға мүрәжатты пуқара береди.

2018-жыл 1-апрельден баслап төменде баян етилген усыллардың биринде жыйналып барылатуғын пенсия системасында есап­қа қойыў бойынша мәмлекетлик хызметлерди алыў мүмкин.

Мәмлекетлик хызмет орайларына өзи келип мүрәжат етеди. Орай хызметкери арза бериўши атынан, белгиленген формадағы анкетаны электрон тәризде толтырады. Орай анкета толтырыл­ған ўақыттан баслап бир саат ишинде оны Халық банкине жибереди. Халық банки анкета келип түскеннен кейин бир күн ишинде Орайға хабарнаманы жибереди, Орай бир саат даўамында арза бериўшини жыйналып барылатуғын пенсия системасында есапқа қойылғанлығы ҳаққында хабардар етеди.

Бирден-бир интерактив мәмлекетлик хызметлер порталы арқалы дизимнен өтип, ти­йисли хызметти таңлағаннан кейин, анкета бийғәрез рәўиште толтырылады. Анкета автомат тәризде Халық банкине жибериледи. Арза бериўши оннан жыйналып барылатуғын пенсия системасында есапқа қойылғанлығы ҳаққындағы электрон хабарнаманы алады. Порталға ҳәр бир басқышта мүрәжатлардың көрип шығылыўын гүзетип барыў имканын бериўши функционал орнатылған.

Сондай-ақ, төмендегилерге итибар қаратыў лазым:

а) ҳәр еки жағдайда да хызметти алыў ушын электрон номерли имза талап етиледи. Орайға өзи келип мүрәжат еткенде электрон номерли имза орнында алыў мүмкин;

б) анкетада пуқараның идентификация номери (жеке код) көрсетиледи. Егер оның паспортында көрсетилмеген болса, арза бериўши жасаў мәнзили бойынша ишки ислер уйымларынан кодты сорап алады.

в) мәмлекетлик хызметтен бас тартыў ушын төмендегилер тийкар бола алады (басқа тийкарлар бойынша бас тартыў қадаған етиледи):

арза бериўшилерде электрон номерли имзаның жоқлығы ямаса оны алыўдан бас тартылғанлығы; анкетада надурыс мағлыўматлардың көрсетилиўи.

Ең тийкарғысы, мәмлекетлик хызмет орайы тәрепинен жыйналып барылатуғын пенсия системасына есапқа қойыў хызмети бийпул әмелге асырылады.

 

А.ОРАЗЫМБЕТОВ,

Мәмлекетлик хызметлер агентлиги Қарақалпақстан

Республикасы басқармасы Тақыятас районы

Мәмлекетлик хызмет орайының бөлим баслығы.

 

Дерек: «Еркин Қарақалпақстан» газетасы

скачать dle 10.6фильмы бесплатно



  • 25-04-2018, 11:18 |
  • 827