Жер  ижарасы  шәртнамасы

Жер ижарасы бойынша  келип шығатуғын қатнасықлар Өзбекистан Республикасы Пуқаралық кодексиниң 34-бабы, Өзбекистан Республикасы Жер кодексиниң ғң-статьясы, Өзбекистан Республикасының  «Ижара ҳаққында»ғы Нызамы ҳәм басқа да бир қанша нызам асты ҳүжжетлер менен тәртипке салынады.

Усы Нызам талапларына бола,  жер ижарасы шәртнамасы жазба түрде дүзиледи.

Нызамшылық жер ижарасы шәртнамасы шәртлерин бузғанлық ушын жуўапкершиликти белгилейди.

Өзбекистан Республикасы Жер кодексиниң 36-статьясында жер участкасын ижараға алыў ҳуқықын бийкар етиў тийкарлары белгиленген болып, бул ҳалат жер ижарасы шәртнамасы шәртлерин бузыў нәтийжесинде келип шығыўы мүмкин. Яғный, жер ижарасы ҳуқықы жер участкасынан белгиленгенинен басқа мақсетлерде пайдаланыл­ғанда, жер участкасынан мақсетке муўапық пайдаланбағанда, бул аўыл хожалығына мөлшерленген жерлер ушын зүрәәтлилик дәрежеси үш жыл даўамында нормативтен пәс болғанда, жер участкасынан оның топырақ өнимдарлығының  пәсейиўине, химиялық ҳәм радиоактив өнимлер менен патасланыўына, экологиялық жағдайдың жаманласыўына алып келетуғын усыллар менен  пайдаланылғанда жер салығы, сондай-ақ, ижараға алыў шәртнамасында белгиленген мүддетлерде ижара ҳақы системалы түрде төленбей келгенде бийкар етилиўи мүмкин.

Аўыл хожалығына мөлшерленген жерлер ижарасында шәртнама шәртлеринен бири сыпатында зүрәәтлилик дәрежеси үш жыл даўамында нормативтен пәс болмаўы белгиленген. Мысалы, Өзбекистан Республикасы  «Фермер хожалығы ҳаққында»ғы Нызамының 5-статьясында  жер участкалары берилгенде фермер хожалығы өз мойнына аўыл хожалық егинлериниң зүрәәтлилигин (үш жыл ушын орташа жыллық өним есабында) жердиң кадастр баҳасынан кем болмаўын тәмийинлеў миннетин алады. Бул жер участ­касын ижараға алыў шәртнамасында да беккемленип қойылады.

Фермер хожалықларының ижара ҳуқықлары жер участкасы ижарасы шәртнамасының бийкар етилиўи мүнәсибети менен бийкарланады. Нызамшылық ижара шәртнамасы бийкар болыўының бир неше ҳалатларын беккемлейди.

Жер ижарасы шәртнамасына тийкар тәреплер ҳуқықлар ҳәм миннетлемелер бойынша шәртнама шәртлерин белгилеп алады. Өз-ара келисимге ерисилгеннен соң тәреплер бул шәртлерге әмел еткен ҳалда ҳәрекет етиўи лазым. Егер тәреплерден бири яки еки тәреп усы шәртлерди бузса, бундай жағдайда жер участкасы ижара шәртнамасы бийкар етиледи.

 

Г.Зарипова,

Қарақалпақстан Республикасы экономикалық суды судьясы.

Дерек: «Еркин Қарақалпақстан» газетасы

скачать dle 10.6фильмы бесплатно



  • 2-01-2018, 17:45 |
  • 308