Бажыхана жаңалықлары: Электрон тәризде алдыннан хабардар етиў жолға қойылды

 

Бажыхана жаңалықлары: Электрон тәризде алдыннан хабардар етиў жолға қойылды

 

Өзбекистан Республикасы Министрлер Кабинетиниң «Автомобиль транспортында Өзбекистан Республикасының бажыхана шегарасы арқалы алып өтилетуғын товарлар ҳәм транспорт қураллары ҳаққында бажыхана органларын электрон тәризде алдыннан хабардар етиў ҳаққында»ғы 2015-жыл 30-октябрьдеги 307-санлы қарары менен тасыўшы­ларға, бажыхана брокерлерине яки басқа мәпдар шахс­ларға 2015-жыл 1-декабрьден автомобиль транспортында Өзбекистан Республикасының бажыхана шегарасы арқалы алып өтилетуғын товарлар ҳәм транспорт қураллары бойынша мәмлекетлик бажыхана органларын электрон тәризде алдыннан хабардар етиў ҳуқықы берилди.

Бул өз нәўбетинде автомобиль транспортында Өзбекистан Республикасының бажыхана шегарасы арқалы алып өтилетуғын товарлар ҳәм транспорт қуралларын бажыхана рәсмийлес­тириў ўақтын қысқартыў, сондай-ақ, олар бойынша мағлыўматлардың исенимлилигин асырыўға хызмет көрсетиўди әдеўир жеңил­лес­тирди.

Усы қарар менен автомобиль транспортында Өзбекистан Республикасының бажыхана шегарасы арқалы алып өтилетуғын товарлар ҳәм транспорт қураллары бойынша бажыхана органларын электрон тәризде алдыннан хабардар етиў, усынылатуғын мағлыўматлар дизими ҳәм де бажыхана органларын электрон тәризде алдыннан хабардар етиў тәртибин әмелге асырыў тәртиби тастыйықланды.

Электрон тәризде алдыннан хабардар етиўде бажыхана хызмети органларына усынылатуғын мағлыўматлар дизимине төмендегилер киреди:

- товарлар алып өтилетуғын автотранспорт қуралы бойынша мағлыўматлар (мәмлекетлик белгиси, дизимнен өткен мәмлекет);

- жүк тасыўшы ҳаққында мағлыўматлар (аты ҳәм мәнзили);

- товар тасыў ушын қабыл етилген мәмлекет ҳәм де жеткерип бериў ушын режелестирилген мәмлекет бойынша мағлыўматлар;

- товар жөнетилген мәмлекет ҳәм де товар жеткерип берилетуғын мәмлекет;

- товарды жөнетиўши ҳәм де қабыл етиўшиниң аты ҳәм мәнзили;

- товарлардың атамасы ҳәм кодлары ҳаққындағы мағлыўматлар, кеминде алты белги дәрежесинде;

- жүк орынларының саны ҳаққындағы мағлыўматлар;

- товарлардың брутто салмағы (килограмм), сондай-ақ, товардың көрсетилген ҳәр бир коды бойынша фактура баҳасы туўралы мағлыўматлар;

- контейнердиң идентификация тәртип саны ҳаққындағы мағлыўматлар;

- товар менен бирге жиберилетуғын ҳүжжетлерге муўапық товарларды жеткерип бериў пункти ҳаққындағы мағлыўматлар;

- товарлардың Өзбекистан Республикасы бажыхана шегарасына жетип келиў ўақты ҳәм орны бойынша мағлыўмат;

- товарлар халықаралық жүк жеткерип бериў китапшалары тийкарында тасылған жағдайда товарларды халықаралық тасыў ҳаққындағы Конвенцияға (Женева қаласы, 1975-жыл 14-ноябрь) муўапық жүк жеткерип бериў китапшасының тәртип номери.

Енди мәпдар шахслар автомобиль транспортында Өзбекистан Республикасының бажыхана шегарасы арқалы алып өтилетуғын товарлар ҳәм транспорт қураллары ҳаққында элек­трон тәризде алдыннан хабардар етиўде бажыхана хызмети органларына усынылатуғын мағлыўматларды бажыхана хызмети органларына усыныўдың автоматластырылған системасына Интернет тармағы арқалы автомобиль транспортында Өзбекистан Республикасы бажыхана шегарасы арқалы товарлар ҳәм транспорт қураллары алып өтилиўинен алдын яки алып өтиў ўақтында усыныўы мүмкин.

Сондай-ақ, бажыхана шегарасы арқалы товарлар ҳәм транспорт қуралларын алып өтиўде бажыхана хызмети алдыннан берилген мағлыўматларды олардың товар менен бирге жиберилетуғын ҳүжжетлерде көрсетилген мағлыўматларға муўапықлығын тексереди.

Мағлыўматлар электрон тәризде алдыннан берилсе ҳәм олар товар менен бирге усынылған ҳүжжетлерде көрсетилген мағлыўмат­ларға муўапық болса, бажыхана қадағалаўы ҳәм рәсмийлестириў бир саат ишинде әмелге асырылады.

 

Е.СЕРЖАНОВ,

Хожели шегара бажыхана посты инспекторы, аға лейтенант.

 

Дерек: «Еркин Қарақалпақстан» газетасы

скачать dle 10.6фильмы бесплатно



  • 17-11-2017, 14:54 |
  • 172