Очерк: Қараөзекли шыпакер Шәригүл Омарбаеваның мийнет жолына нәзер

Очерк: Қараөзекли шыпакер Шәригүл Омарбаеваның мийнет жолына нәзер

 

 

             Бүгингидей пәраўан турмыста мийнет етип, ел-халық ийгилиги жолында аянбай хызмет етип атырған ҳәр бир пуқараның алып барып атырған жумыслары мәмлекетимиз тәрепинен хошаметленип, мүнәсип баҳаланып келинбекте. Буныңдай исте қырық үш жылдан аслам медицина тараўында жемисли мийнет етип, қаншадан-қанша саламат перзентлерди дүньяға келтириўдей уллы исти минсиз атқарып киятырған, усы жылы Ғәрезсизлигимиздиң 26 жыллығы мүнәсибети менен  Президентимиздиң Пәрманына муўапық сыйлықланғанлар арасында «Өзбекистан Республикасына хызмет көрсеткен ден-саўлықты сақлаў хызметкери» атағына Қараөзек районлық бирлескен емлеўхана неонатолог  шыпакери Шәригүл Омарбаеваның мийнет жолы ҳәм кәсиплик тәжрийбесин үлги етсе арзыйды. Әсиресе, халық тәрепинен берилген алғыс ҳәм миннетдаршылықтан өзине күш алып, ҳәзирге шекем тараўда кәсиплеслерине үлги ҳәм бас болып жемисли мийнет  етип киятырған апамыз бүгинги сыйлықты халық алғысынан саға алған, елимизде саламат турмыс тәризин, әсиресе саламат ана ҳәм бала концепциясын әмелге асырыўдағы жумыслардың бир көриниси деп биледи.

            Ш.Омарбаева 1951 жылы Тахтакөпир районы Дәўқара аўылында дүньяға келип, аўылдағы мектепти табыслы тамамлаған соң сол пайытлардағы елимиздеги абырайлы жоқары оқыў орынларның бири Самарқандтағы медицина институтына оқыўға киреди. Институтта табыслы оқыған әпиўайы қарақалпақ қызы медицинаның уңқыл-шуңқылына дейин меңгериўди, өз аўылына қайтып хызмет етиўди мақсет еткен ҳалда әмелият пенен бирге билимин арттырып барады. Оқыў даўамында өз аўылласы, бирге оқыйтуғын болажақ шыпакер Бахытжан Ажимуратов пенен турмыс қурып, биргеликте халық саламатлығын асыраўға бел байлады. Табыслы оқыўдан соң, республикалық балалар емлеўханасында интернатурада тәжрийбе топлаған жас қәниге  Тахтакөпир районының бурынғы шетки аўылына ҳәзирги Қаразек районы «Бердақ» аўыл пуқаралар жыйынына микропедиатр шыпакер болып жумысқа жибериледи. Мине усы пайыттан баслап үйрениўден ҳеш жалықпастан, инсан саламатлығын асыраўдай машақатлы жумысты өмирлик жолдасы менен биргеликте  кәсиплик шеберлигин арттырып барды. 1980-жылдан ҳәзирге шекем районлық медицина бирлеспеси туўыў үйинде ҳәр бир шаңарақта туўылған балалардың саламатлығын асыраўда жумыс алып бармақта.

            - Усы кәсипти таңлағалы берли бир қанша инсанлар менен ислестим. Олардан устазларым Ж.Реймов, Ш.Сейтова, Д.Орынбаевалардың айрықша орны бар болып, үйрениўге, ибрат алыўға арзырлық инсанлар болды. Ҳәзирде өзим менен қатар жумыс алып барып атырған П.Бекбосынова, С.Бекниязова, Г.Жайбергеновалар пикирлесим болып, бирге жумыс алып бармақтамыз.

       

Очерк: Қараөзекли шыпакер Шәригүл Омарбаеваның мийнет жолына нәзер

 

Ҳәр бир ана менен жеке пикирлесиў арқалы туўыўға таярлаў, бүгингидей жаратылған шараят ҳәм имканиятлардан дурыс пайдаланып, туўылып атырған ҳәр бир перзенттиң саламатлығына ерисиўде кәсиплес шәкиртлериме үйретип, керек жеринде үйренип те келмектемен. Ҳәзир жаңа туўылған ҳәр бир нәрестени туўылыўдан анасының көкирегине тапсырыў усылы енгизилиўи арқалы мийримлилик, ана сүтиниң әҳмийетлилигин түсиндиремиз. Районымыз медицина бирлеспесине «Саламатлық-3» жойбары тийкарында алып келинген ең соңғы аппарат, техникалар жумысымызда әмелий нәтийжесин бермекте. Мениң бул табысым тараўға ҳәм кәсиплеслериме берилген итибар болып, айрықша жуўапкершилик ҳәм еледе инта менен жумыс алып барыўға ийтермелейди. Кәсиплеслеримди бүгинги байрам менен шын кеўлимнен өзимниң ҳәм шаңарағым атынан қутлықлап, ҳәр бирине кәсибинен камал табыўын тилеймен!, -деп биз бенен әлпайым ғана хошласқан апаның жумысқа болған интасын жас қәнигелерден кем көрмедим.

            Шәригүл апа шаңарағында да үлги аларлық инсан болып, өмирлик жолдасы Б.Ажимуратов пенен бирге алты перзентти камалға келтирип, он алты ақлық сүйген ҳүрметтеги аналарымыз қатарында. Апамыздың кәсибин даўам еткен қызлары Венера ҳәм Муҳаббатлар да медицина тараўында жемисли хызмет етсе, Махмуд, Элъвира, Гулмира ҳәм Махсудлар да халық хожалығының түрли тараўларында жумыс алып бармақта. Шыпакерлер шаңарағының дәстүрхан әтирапында баслы темасы тиккелей саламатлық мәселесинде болып, Шәригүл апаның ҳүрметли атаққа мүнәсип табылыўынан ҳәмме бирдей миннетдар. Ақлықлары да кәсип шыңына жетиўди мақсет еткен бул үлкен шаңарақтың қос арысы бүгинги күннен шүкиршиликте жасап мийнет етип келмекте.

 

 

Қ.Жақсымуратов

журналист

скачать dle 10.6фильмы бесплатно



  • 11-11-2017, 13:35 |
  • 246