«Бир айна» принципи бойынша қосымша 5 түрдеги мәмлекетлик хызмет көрсетиў жолға қойылды

Усы жылдың 1-февраль сәнесинде Өзбекистан Республикасы Президентиниң «Исбилерменлик субъектлерине мәмлекетлик хызметлерди көрсетиў механизмлерин жетилистириўге байланыслы қосымша ис-илажлар ҳаққында»ғы ПҚ-2750-санлы қарары қабыл етилди.

Усы қарарға тийкарланып ҳәкимликлер жанында шөлкемлестирилген исбилерменлик субъектлерине «Бир айна» принципи тийкарында мәмлекетлик хызметлерди көрсетиўши орайлар Әдиллик министрлиги қурамына өткерилди.

Банклер ҳәм кредит бюролары, олардың филиал, ўәкилханаларынан тысқары барлық исбилерменлик субъектлерин дизимнен өткериў «Бир айна» орайлары тәрепинен әмелге асырылыўы белгиленди.

Жәнеде әдиллик министрлигине бир қанша қосымша ўазыйпалар жүкленди. «Бир айна» орайлары искерлиги үстинен улыўма басшылықты әмелге асырыў, материаллық, техникалық базасын беккемлеў, «Бир айна» орайлары хызметкерлериниң маманлығын асырыў, нызам бузыўшылықлар жүз берген жағдайда себебин анықлаў, сапластырыў сыяқлы жумыслар. Исбилерменлик субьектлерин дизимнен өткериў ушын мәмлекетлик бажы сыпатында алынатуғын барлық қаржылар, «Бир айна» орайлары тәрепинен көрсетилетуғын мәмлекетлик хызметлер ушын төленетуғын мәмлекетлик бажылар ҳәм жыйымлар суммасының 10 пайызы муғдарындағы қаржы «Бир айна» орайы искерлигин қаржыландырыў дәреги сыпатында Өзбекистан Республикасы Әдиллик министрлиги атына ашылған арнаўлы есап бетке өткерилип, түскен қаржылар «Бир айна» орайларын сақлаў, материаллық-техникалық базасын беккемлеў хызметкерлер мийнетине ҳақы төлеў, хошаметлеў ушын жумсалатуғынлығы белгилеп берилген.

«Бир айна» орайлары арқалы рухсат бериўши, лицензияланатуғын жаңадан 86 түрдеги мәмлекетлик хызметлер көрсетилиўи белгиленди. Соннан 2017-жыл 1-июльдан баслап 18 түрдеги рухсат бериў өзгешелигине ийе болған ҳәм лицензияланатуғын искерлик түрлери бойынша мәмлекетлик хызметлер «Бир айна» орайлары арқалы көрсетилиўи нәзерде тутылған еди. Ҳәзирги күни «Бир айна» принципи бойынша қосымша 5 түрдеги мәмлекетлик хызмет көрсетиў «Бир айна» орайлары арқалы жолға қойылды:

1.Фармацевтика хызметин әмелге асырыў ҳуқықына ийе лицензия;

2.Медицина хызметин әмелге асырыў ҳуқықына ийе лицензия;

3.Ер жетпегенлерге мөлшерленген дәри дәрмақлар рекламасын жайластырыўға рухсатнама;

4.Өзбекистан Республикасына сырт ел жумысшы күшлерин тартыўға рухсатнама;

5.Өз тармағын жаратыў ҳуқықысыз мағлыўматларды узатыў тармақлары арқалы провайдер хызметлерин көрсетиўге лицензия.

Рухсат бериўши ҳүжжетлерди рәсмийлестириў системасын әпиўайыластырыў, электрон тәризде әмелге асырыў арқалы рухсат бериўши ҳүжжетлердиң бирден-бир формаларын белгилеў, рухсат бериўши ҳүжжетлерди алыў ушын арзалардың электрон тәризде берилиўи, рухсат бериўши ҳүжжетлердиң реестрин электрон тәризде жүритиў, рухсат бериўши ҳүжжетлердиң онлайн тәризде берилиўин тәмийинлеў арқалы исбилерменлик субъектлерине қолайлықлар жаратыў избе-излик пенен әмелге асырылмақта.

 

Е.ДОСАНОВ.

Қарақалпақстан Республикасы Әдиллик министрлиги хызметкери

 

скачать dle 10.6фильмы бесплатно



  • 29-09-2017, 09:58 |
  • 1 439