Экология ҳәм қоршаған орталықты қорғаў бойынша мәмлекетлик комитети тәрепинен 746 лаўазымлы хызметкер ҳәм пуқараларға мәжбүрий шаралар көрилди

2017-жылдың 21-апрелинде «Экология ҳәм қоршаған орталықты қорғаў саласында мәмлекетлик басқарыў системасын жети­лис­тириў ҳаққында»ғы Өзбекистан Республикасы Президентиниң Пәрманы қабыл етилип, оған муўапық бул тараўда үлкен өзгерислерди әмелге асырыў белгиленген.

Атап айтқанда, үлкемизде экологиялық қәўипсизликти тәмийинлеў ҳәм қоршаған орталықты қорғаў саласында мәмлекетлик басқарыўды түп-тийкарынан жетилистириў, экологиялық жағдайды жақсылаў, шығындылардың адамлардың денсаўлығына унамсыз тәсириниң алдын алыў, халықтың турмыс дәрежесин ҳәм сапасын арттырыў ушын қолайлы шараятлар жаратыў, турмыслық шығындыларды жыйнаў, сақлаў, тасыў, утилизациялаў ҳәм көмиў системасын буннан былай да жетилистириў нәзерде тутылған. Ал, Өзбекистан Республикасы Тәбиятты қорғаў бойынша мәмлекетлик комитети болса, Өзбекистан Республикасы Экология ҳәм қоршаған орталықты қорғаў бойынша мәмлекетлик комитети етип қайта шөлкемлестирилди. Сондай-ақ, пәрманға муўапық, Қарақалпақстан Республикасы Экология ҳәм қоршаған орталықты қорғаў бойынша мәмлекетлик комитетиниң орайлық аппаратында шығындылардың пайда болыўы, оларды топлаў, сақлаў, тасып апарыў, утилизация, қайта ислеў, көмиў ҳәм реализациялаў бойынша қадағалаў инспекциялары, «Таза аймақ» мәмлекетлик унитар кәрханасы, қала ҳәм районларда оның филиаллары шөлкемлестирилип атыр. Мәмлекетлик комитет усы жылдың өткен алты айы даўамында Өзбекистан Республикасы Министрлер Кабинетиниң 2013-жыл 27-майдағы «2013-2017-жылларда қоршаған орталықты қорғаў ҳәрекетлер бағдарламасы ҳаққында»ғы қарарының орынланыўы бойынша қадағалаўшы уйымлардың жумысларын муўапықластырыўшы республикалық Кеңесинде 2017-жыл ушын келисилген реже-кесте тийкарында төрт кәрханада режели тексериўлер өткерди ҳәм анықланған кемшиликлер бойынша 10 лаўазымлы хызметкерге ҳәкимшилик шаралары көрилди.

Ал, Өзбекистан Республикасы Әдиллик министрлигинде 2006-жылы 6-майда дизимнен өткен «Қадағалаўшы уйымлар тәрепинен исбилерменлик субъектлери жумысларын қадағалаў тәртиби ҳаққында»ғы режеге тийкарланып нызамсыз түрде жапырақ жағыўдың, арнаўлы үскенесиз битум еритиўдиң ҳәм ихтиофауна ресурсларынан пайдаланыўдың алдын алыў мақсетинде шөлкемлестирилген 444 рейдлер нәтийжесинде болса, нызам талапларының бузылыўларына жол қойғаны ушын 911 лаўазымлы хызметкерлерге 96148,7 мың сумлық нызамлы шаралар көрилди.

Улыўма өткен ярым жыл даўамында барлық түрдеги тексериў жумысларының нәтийжесинде 746 лаўазымлы хызметкер ҳәм пуқараларға 107531,40 мың сумлық мәжбүрий шаралар көрилди ҳәм олардан 94289,085 мың сумы өндирилди. Комитет тәрепинен халқымыз, әсиресе, жаслар арасында экологиялық тәлим-тәрбия, үгит-нәсият жумысларын жүргизиў мақсетинде республикамыздың жоқары ҳәм орта арнаўлы оқыў орынларында, кәрхана ҳәм мәкемелерде илимий-әмелий конференциялар, семинар ҳәм ушырасыўлар өткерилмекте.

Жоқарыда атап өтилген бул пәрманның турмысымызға енгизилиўи оғада үлкен әҳмийетке ийе болып, қоршаған орталықты қорғаў ҳәм тәбийғый ресурслардан ақылға уғрас пайдаланыў тараўында жумыс ислеп атырған мәмлекетлик қадағалаў ҳәм басқарыў уйымларының системалы жумыс алып барыў нәтийжелилигин арттырып, экология ҳәм қоршаған орталықты қорғаў саласындағы ведомстволараралық бирге ислесиўдиң нәтийжелилигин тәмийинлейди.

Қ.ЮСУПОВ,

Қарақалпақстан Республикасы Экология ҳәм қоршаған орталықты

қорғаў бойынша мәмлекетлик комитети консультанты

Дерек: erkinkarakalpak.uz

скачать dle 10.6фильмы бесплатно



  • 24-08-2017, 14:46 |
  • 381