Өтирик фирма дүзип кредитти келистиргенлер...

Нызамсыз ис тутыўына байланыслы жынайый жуўапкершиликке тартылған, айыплары толық тастыйықланып суд ҳүкими оқылған бул «азамат­лар»дың да өзлерине ылайық абырай-мәртебеси бәлент еди. Ҳәмел гүрсисинен өзлериниң мәплерине пайдаланыўды гөзлегенлердиң нызамсыз ҳәрекетлери узаққа бармай паш болады. 1962-жылы Төрткүл районында туўылған С.Т., 1975-жылы Беруний районында туўылған С.Қ., нөкисли Т.А., Кегейли районында туўылған Қ.Д. ҳәм Хожели районы, «Найманкөл» аўыл пуқаралар жыйыны аймағында жасаўшы М.А. топар болып ислеген нызамсыз ҳәрекети де осылмаған өкпедей қалқып шыға берди. Булардың ишинде Д.Қ.дан бас­қаларының ҳәммеси алдын еки-үш мәртеден жынайый жуўапкершиликке тартылып, суд уйым­лары тәрепинен жаза шаралары қолланылған. Бул рет Т.С. Қарақалпақстан Республикасы «Машина-трактор парклер бирлеспеси» ашық акционерлик жәмийети баслығы лаўазымында ислеп, исенип тапсырылған лаўазымнан өз мәпине пайдаланыўды гөзлеп, орынбасары Қ.С., Ташкент қаласында жайласқан шет ел кәрханасы түриндеги «Агромашхолдинг-Ташкент» жуўапкершилиги шекленген жәмийети баслығы басқа шахс, «Тахиаташ Агротехмаш» акционерлик жәмийети баслығы М.Т. пенен алдыннан жынайый тил бириктирип, Өзбекистан Республикасы Министрлер Кабинетиниң 2012-жыл 28-декабрьдеги жыйналыс баянламасында көрсетилген тапсырмаларды орынлаў нықабы астында ҳәрекет етеди. Қарақалпақстан Республикасы «Машина-трактор парклер бирлеспеси» ААЖ ҳәм «Тахиаташ Агротехмаш» АЖ қәнигелери қатнасында бирлеспе қурамында жаңа жәмийет шөлкемлестириў мақсетинде жалған, қәлбеки жыйналыс баянламасын дүздиреди. Усы баянламаға тийкар Т.С. бирлеспе ҳәм «Тахиаташ Агротехмаш» АЖ шөлкемлестириўинде 20.05.2013-жылы «QARAQALPAQ AGROTEXSERVIS» ЖШЖин дүзип, Д.Қ.ды рәсмий баслық етип тайынлайды ҳәм оған «Микрокредитбанк» АКБтиң республикалық филиалы баслығы атына жаңадан дүзилген жәмийетке 10 дана «Енисей-КЗС-954» маркалы комбайн техникаларын сатып алыў ушын 12 процент үстемеси ҳәм 7 жылда қайтарып бериў шәрти менен кредит сорап арза бергизеди. Бул нызамсыз ҳәрекетлерге жаңадан шөлкемлестирилген жәмийетке есапшы лаўазымына буйрық шықпастан жумысты баслап жиберген М.А. кредит алыў ушын банк тәрепинен талап етилген ҳүжжетлерди еки күнниң ишинде-ақ питкереди. Солай етип, жалған мағлыўматлар, қәлбеки ҳүжжетлер есесине «Микрокредитбанк» АКБтиң Қарақалпақстан Республикасы филиалы мәплерине жүдә көп муғдарда ­ 2 988 500 000 сумлық зыян келтирген.

Суўдың да сораўы болғанындай, елимиздиң раўажланыўы, халқымыздың абадан турмысы жолында мәмлекет тәрепинен ажыратылып атырған қаржылардың да есап-китабы, сораўы бар. Кредитти келистирген бул жигитлердиң де нызамсыз ҳәрекетлери суд уйымы тәрепинен ҳәр тәреплеме нызамлы көрип шығылып, тийисли жазаларға ҳүким етилди.

 

Я.МУН

 

Дерек: erkinkarakalpak.uz

 

скачать dle 10.6фильмы бесплатно



  • 16-08-2017, 09:30 |
  • 484