Туўыў үйинен тысқары медициналық жәрдемисиз туўылған баланың туўылғанлығын дизимге алыў қалай әмелге асырылады?

Өзбекистан Республикасы Министрлер Кабинетиниң 2016-жыл 14-ноябрьдеги қарары менен «Пуқаралық ҳалаты актлерин дизимге алыў Қағыйдалары» тасты­йықланды. Бул қарарға муўапық, ПҲАЖ бөлимлери тәрепинен пуқараларға ҳуқықый хызмет көрсетиўде бир қанша тәртип ҳәм қолайлылықлар жаратылмақта.

Онда 16 жастан ас­қан, лекин, туўылғанда дизимге алынбағанлардың туўылыўын дизимге алыў судтың қарары тийкарында, ал, туўыў үйинен тысқары медициналық жәрдемисиз туўылған баланың туўылғанлығын дизимге алыў болса, аймақлық шыпакери (фельд­шер, акушер) тәрепинен берилген мағлыўматнама тийкарында әмелге асырылады. Баланың туўылғанлығын дизимге алыўда оған фамилия, ата-анасының келисими менен әке ямаса ана фамилиясы, сондай-ақ, әке ямаса ана тәрептен атасының аты бойынша бериледи. 16 жасқа толмағанларға әкелик белгиленген жағдайда баланың әке аты әкесиниң исми бойынша жазылады. Егер, әкелик белгилеў 16 жасқа толғанларға қарата әмелге асырылған жағдайда, тек әке ҳаққында мағ­лыўмат­қа өзгерис киргизиледи. Ал, бала ҳаққындағы мағлыўматлар фамилия, аты ҳәм әке исмин өзгертиў тәртиби ҳәм қағыйдалары бойынша киргизиледи.  Анасының жасаў жерин анықлаўдың имканияты болмағанда ержетпеген балаға қарата әкелик белгилеў әмеңгерлик ҳәм қәўендерлик уйымының разылығы менен әкесиниң арзасына тийкарланып әмелге асырылады. Бундай жағдайда арзаға ананың бийдәрек жоғалған деп табыл­ғанлығы ҳаққындағы суд қарарының көширмеси усынылады. Алдын ишки ислер уйымының алты айдан артық мүддет даўамында анасы ҳаққында мағлыўмат жоқлығы туўралы мағлыўматнама талап етилер еди. Перзентликке алынып атырған баланың туўылғанлығы ҳаққындағы акт жазыўына өзгерислер перзентликке алынғанлығы ҳақ­қындағы суд қарарының өз күшине кирген күннен баслап он күн ишинде киргизиледи. Егер, белгиленген мүддет өткерилип жиберилген болса, суд қарарында усы қарар өз күшин жойытпағанлығы ҳаққында белги болыўы керек. Туўылғанлығы ҳаққында тәкирар гүўалықлар пуқаралық акт жазыўын рәсмийлестирилген тийисли шахстың өзине, ержетпегенлердиң ата-аналарына, нызамлы ўәкиллерине, сондай-ақ, нотариал тәртипте тастыйықланған исеним хаты тийкарында басқа адамларға, егер ата-анасы болмаған жағдайларда ержетпегенлерге яки паспорт алмағанларға, усы шахс­тың фотосүўрети жабыстырылған жасаў жериндеги пуқаралардың өзин-өзи басқарыў уйымы яки сол адам билим алып атырған оқыў орны тәрепинен берилген мағлыўматнама тийкарында бериледи.

 

И.ЕРЖАНОВА,

Кегейли районлық 1-санлы ПҲАЖ бөлими баслығы

 

Дерек: erkinkarakalpak.uz

 

скачать dle 10.6фильмы бесплатно



  • 15-08-2017, 11:28 |
  • 262