Қазақстанға кириў. Ковидке тестти қалай, қай жерде тапсырыў мүмкин? Сораўларға жуўап беремиз

Хабарыңыз бар, 2020-жылдың 1-октябрь күнинен баслап Өзбекстан шегараларын ашады. Бул дегени енди, пуқараларымыз Өзбекстан Республикасы пуқараларын елине кириўге рухсат берген барлық еллерге барыўы (Россия еле рухсат бермеди), ал, сырт ел пуқараларының болса Өзбекстанға орнатылған тәртип бойынша кириўи мүмкин екенин билдиреди. Бир бирақ деген жери бар, шегараны кесип өтиўде пуқаралар өзлери менен бирге ковидке тапсырған тесттиң терис нәтийжеси бар мағлыўматнамасын усыныўы керек болады. Усы мағлыўматнаманы қай жерден аламыз, неше сўмға аламыз, деген мәселе көпшиликли ойландырып жүр. Мақалада буған жуўап беремиз.

 

Қазақстан Өзбекстан пуқарасын қандай тәртипте киргизеди?

 

Ковидке тапсырылатуғын тест ҳаққындағы сораўға жуўап берместен алдын бир мәселеге дыққатыңызды қаратпақшымыз.

 

Қазақстан ҳүкимети мәмлекетке шет елден киятырғанлар ушын талапларды өзгертти. Яғный, қәўиплилик дәрежесине қарап қоңсы ел мәмлекетлерди екиге бөлди. Биринши топарға кирген (Қытай, Таиланд, Монголия, Малайзия, Египет, Гонконг,  Қубла Корея, Япония,  Сингапур, Германия, Беларус,  Әзербайжан) мәмлекетлерден келгенлер тек ғана термометр тексериўи ҳәм анкеталастырыўдан өтеди.

Өзбекстан бул топарда жоқ, ол екинши топарға кирген (Швейцария, Уллы Британия, Польша, Италия, Венгрия, Австрия,  Нидерландия, Швеция,  Румыния, Чехия, Греция,  Туркия, БАА, Саудия Арабстаны, Индия, Армения,  Россия Федерациясы,  Өзбекстан, Украина, Қырғызстан, Тәжикстан). Бул мәмлекеттен келгенлер термометрия ҳәм анкеталастырыўдан тысқары, коронавирус анықланбағаны ҳаққындағы мағлыўматнаманы көрсетиўи керек болады. Мағлыўматнама 5 күннен артық болмаған ўақытта берилген болыўы керек. Егер де мағлыўматнама болмаса, келген шет елли шегарада ПЦР тестин тапсырады. Covid-19 ушын тексериўге жетерли материаллар топланғанан кейин, келген адамлар өз бағдарында даўам етебереди.

 

Бул жерде итибар бериў керек болған нәрсе, мүддети 5 күннен өтип кетпеген Өзбекстан пуқарасы коронавирус анықланбағаны ҳаққындағы мағлыўматнаманы көрсетиўи кереклиги. (Егер де мағлыўматнама болмаса, келген шет елли шегарада ПЦР тестин тапсырады – делингени менен, Қазақстанда-ақ ПЦР тест тапсырса болады екен деп жолға шығыў тәўекелшилик. Шегарада жағдай қандай болары бир Аллаға белгили). Енди биз усы ПЦР тест бойынша сораўға жуўап бериўди баслаймыз.

 

Тестти қай жаққа тапсырса болады?

 

Пуқараларда өз-өзинен еки вариант бар. Бириншиси, бийпул Рес СЭСке (Республика Санитария-эпидемиологиялық тынышлық орайы) тест тапсырыў, екиншиси ақша төлеп жеке меншик клиникаларға тапсырыў. Биринши жағдайда, хызмет бийпул болғаны менен жүриў ҳәм күтиў ўақытты алады. Екиншиси, айырым пуқаралар ушын ең оптимал жол.

Биринши нәўбетте соны аңлап алыў керек, Рес СЭС аты менен мәмлекетлик орай болғаны ушын бул жер өзи ушын мәмлекет тәрепинен орнатып берилген тәртип бойынша төмендеги адамлардан тест қабыллайды:

1-наўқас адамлардан;

2-коронавирусқа клиникалық белгилери бар адамлардан;

3-коронавирусқа гүман етилген адамлар менен қатнаста болғанлардан;

4-шегара аймағынан кирип келиўши жүк машина басқарыўшыларынан;

5-емлеўханаларда емленип атырғанлардан (буның ишине емлеўханаға/бөлистириў орайларына келип түскен, коронавирустан тәўир болып емлеўхана/бөлистириў орайларынан шығып баратырған адамлар да киреди).

 

Жоқарыдағылардан келип шығып, Рес СЭС күниге мыңнан аслам тест қабыллайды ҳәм соны 4 лабораторияға бөлистирип жибереди, оның биреўи Қоңырат районында қалғанлары Нөкис қаласында жайласқан. Бул орайға тест тапсырыў Нөкис қаласында жайласқан тоғыз поликлиникада әмелге асырылады. Тестти де туўры тек тест тапсыражақ едим, деп барып тапсырыўдың имканы жоқ. Буның ушын адамда коронавирустың клиникалық белгилери болыўы ҳәм поликлиникадағы шыпакерлердиң көригинен бир қатар өтип шығыў тийис. Тест тапсырылғаннан кейин оның жуўабы узағы менен еки, тез болғанда 1 күнде шығады. Барлық алынған жуўаплар тест тапсырған жердеги поликлиникаларға жибериледи. Пуқара қәлесе телефон арқалы тест нәтийжесин аўызеки поликлиникасынан сорап билиўи, егер жазылған қағазы керек десе Рес СЭСтиң өзине барып мағлыўматнаманы алыўы мүмкин. Бул хызмет жоқарыда айтқанымыздай бийпул әмелге асырылады.

 

Рес СЭСке жүклетилген ўазыйпалардың көплигинен мәмлекет Өзбекстан шегарасын ашатуғын қарар қабыл еткенде буны есапқа алған ҳәм Өзбекстандағы авиа ҳәм темир жол компанияларына коронавирусқа тест алыўға лицензиясы бар исбилерменлик субъектлери менен шәртнама дүзиўин ҳәм өз аймағында елге кирип келиўши ҳәм шығып кетиўши пуқаралардан тест тапсырыў имканиятын жаратыўды тапсырма етип берген. Бул тапсырманың орынланғаны бизиң кейинги темамыз.

 

Жеке меншик клиникаларда тест тапсырыў

Жеке меншик клиникаларда тест тапсырыў баҳасы 220 мың сўм, жуўабы бир күнде тайын болады.  

 

Рес СЭСтиң де жеке меншик клиниканың да коронавирусқа терис деп берген мағлыўматнамасы менен шет елге шығыў мүмкин.

 

Умытпаң, қайсы жерге тест тапсырсаңыз да өзиңиз бенен пуқаралық паспортыңызды алып барыўыңыз керек. Және, мағлыўматнама рус тилинде жазылған болыўына итибар бериң.

 

Лалагүл Қаллыханова,

журналист

скачать dle 10.6фильмы бесплатно



  • 26-09-2020, 13:47 |
  • 3 641