"Пайтахтымыздағы жалғыз туннель пулы 1 жыл 10 айдан берли елеге шекем төлеп берилмеди" яки исбилерменлер мүрәжаты қашан көрип шығылады?

KRuz.uz'ға мүрәжат!

 

"Ҳүрметли KRuz.uz сайты жәмәәти! Усы мүрәжатымыз арқалы сизден төмендеги мәселе бойынша әмелий жәрдем бериўиңизди сораймыз.

"Нөкис дийқан базары" алдында жайласқан туннель үстине 2018-жыл 14-ноябрь күни кәрханамыз "Kardar Ishlab chiqarish mahsulotlari" тәрепинен "навес" (темир зонтиклер) қурып, орнатып берилген еди. Бирақ, усы күнге шекем буйыртпашы "QR Jollardan paydalaniw unitar karxanasi" тәрепинен 188 440 931 сўм муғдарындағы қарыздарлық усы күнге шекем төлеп берилмеди.

 

Усы мәселе бойынша экономикалық судқа бизиң кириткен даўа арзамыз толық қанаатландырылып, атқарыў ушын Нөкис қалалық Мәжбүрий орынлаў бюросына тапсырылған еди. Жуўап болмады. Президентимиздиң Пәрманына муўапық шөлкемлестирилген исбилерменлер мүрәжатын көрип шығатуғын Бас министр қабыллаўханасына да мүрәжат еттик. Бирақ, нәтийже болмаған соң, сизиң сайтыңызға мүрәжат етиўге мәжбүр болмақтамыз."

 

Елимизде "исбилеменлерге кең имканиятлар жаратылып атыр, жеңилликли кредитлер берилип атыр, олардың искерлиги қоллап-қуўатланбақта" деген сөзлерди турақлы еситемиз. Дерлик ҳәр күни. Қәне??? Мүрәжатқа келгенде, қаржыға тақалғанда көрип шығатуғынлар, қоллап-қуўатлаўшылар қайерде қалды? Исбилермен басқа мәкеме банкрот болса яки төлемнен қашса өз қаржыларын алалмай, кредитлерин жаба алмай жүре береди ме?

 

Еслетип өтиўди мақул көрдик, Президентимиз "2 жумыс орнын жаратқан исбилерменди басыма көтериўге таярман" деген еди. Қолында қаржысы болмаған исбилермен қалай жаңа жумыс орынларын жаратады? Қаржыларын ҳәр кимнен алалмай жүрген инсан исбилермен болыўды қәлерме еди?

 

Мүрәжат тийисли тараў ўәкиллери тәрепинен унамлы шешиледи ҳәм бул бойынша рәсмий мағлыўмат бериледи деп үмит етип қаламыз!

 

Каналға ағза болыў: @KRuzuz

скачать dle 10.6фильмы бесплатно



  • 25-09-2020, 10:50 |
  • 1 094