Қайығың қырда жүрсе, заң-паңға бәле бар ма???

 

 

       Ашық айтыў керек, айырым ўақытлары мәмлекетлик басқарыў органларына басшы болып тайынланыўда әўмети жүрип кеткенлердиң тайынланып қалатуғынлығы әйне, ҳақыйқат. Бундайды әдетте «ешеги жорғалаған» деп те атайды. Лекин мақалада келтиргенлердиң бәршесин бул атқа теңеўден жырақпан, бирақ олар  басқарған тараў тәрепинен нызам бузыўшылыққа жол қойғанлығы дар ҳақыйқат. 

 

Қайығың қырда жүрсе, заң-паңға бәле бар ма???

 

       Көпшиликке белгили, соңғы ўақытта Орайлық Азия тарийхынан ойыл орын алған «қарақалпақ» деген уллы миллетти өткен де, кеткен де масқара ететуғын болып кетти. Бул ерси ҳәрекет интернет тармақларда бир ҳәпте, он күн тил, миллет жанкүйерлери тәрепинен айтылады, кейин ол да умытылып қала береди. Және бир әдет шықты, лаўазымлы шахслар нызам бузса ары кетсе кеширим сораў менен шекленип (бәри емес бираз) қалғанларын көремиз. Ал әпиўайы пуқара сондай ис ислесе, дәрҳал қамақ яки болмаса жәрийма жазасын салып шермендесин шығарады. 

 

       Мысал сыпатында жақында Қарақалпақстан халық артисти Ю.Усманова қарақалпақ миллети, халқы, бойынша жағымсыз пәтиўассыз сөзлер айтты, және биреў миллетимизди жерге урып «РЭП» жанрында қосық айтты, және биреў әскерий липасын көрсетип турпайы, мәдениятсыз сөзлер менен бир жигитти сөкти. Мине бул ҳәрекетлерден наразы болып биз, Нөкис әскерий  прокуроры Ф.Бегашев атына 29-апрель 2020-жылы сораўнама менен мүрәжат еткен едик.

 

       Мүрәжат бойынша прокуратура органы жоллаған хатымызды Арқа батыс әскерий округы қосыны сәркардасы Д.Чориев атына жоллаў менен қутылып қалды, биз усы округтың ҳәрекетин күттик.      

       Округ тәрепинен бизге берген жуўап та видеода көринген, Өзин әскерий округта ислеймен деген шахстың ким екенлигин ҳәзирше анықлайалмадық, бул бойынша ишки ислер органлары менен биргеликте жумыс алып барып атырмыз, жуўмағы бойынша жуўап беремиз деў менен шекленген еди.

       Буннан берли арадан бес ай ўақыт өтти. Бирақ елеберин, бир де бир органнан жуўап келген жоқ. Жеке өзим бул жуўапты «меннен кеткенше ийесине жеткенше» деген көзқарас пенен берген деп ойлайман, себеби ойланып көриң, Орган хызметкерлери ҳәттеки көрпе астында жатып сөйлеген адамның ким екенлигин дәрҳал таўып атырғанлығын көрип, билип жүрмиз. Лекин бети жүзин анық көрсетип ҳәттеки офицерлик кийимин көрсеткен шахсты усы күнге шекем таба алмағанлығына не десе болады? Редакция тәрепинен «әскермен» деген жигит пенен сөгискен шахс Қарақалпақстан Республикасы Экология ҳәм қоршаған орталықты қорғаў комитети инспекторы екенлигин, ол да өз гезегинде мәмлекетлик хызмет кийимин кийген шахс екенлигин анықладық. Бирақ ол да, бул да усы күнге шекем жазаға тартылмастан қалып кетти, егер жазаға тартылған болса редакцияға хабар бермеди.

       

Жеке өзим мәмлекетлик басқарыў органлары тәрепинен нызамның орынланыўын тәмийнлей алмаған басшыны, «ҳүрметли президентимиздиң талабын қастан орынламаған» деп олардың ийелеген лаўазымында қалай жүр екен деген қыялда боламан. Мәселен мәмлекет басшысы «Ғалаба хабар қурал ўәкиллери менен ислесе алмаған басшы маған керек емес» деп айтқан еди. Буннан тысқары, 26-январь күнги депутат ҳәм сенаторларға жоллаған мүрәжатында ғалаба хабар қураллары ҳәмийше төртинши ҳәкимият тымсалында ҳәрекет етеди, мен блогер ҳәм журналистлерге орынлардағы машқала ҳәм кемшиликлерди  ашық-айдын сәўлелендириўге шараят жаратып беремен деди. Мине усы орында сораў туўылады: Президент кимге исенип халыққа кепиллик береди, әлбетте орынлардағы басшыларға исенип кепил береди. Бирақ олар журтбасымыздың ҳәрбир сөзин, көкирегин қалқан етип жан күйдирип орынламаса ондай басшы кимге керек? 

       Итибар бериң, елеге шекем «журналист болсаң өзиңе» деп кабинетинде мәмлекеттиң берген гүрсисин айланып тисин шуқлап отырған басшылар көп. 

       Усындай басшылардың алдына әпиўайы халық түўе журналистлер де кире алмайды. Мәселен, Редакция тәрепинен 9-июль күни Қарақалпақстан Республикасы Жоқарғы Кеңеси Баслығы атына, сол күни  Жазыўшылар аўқамы баслығы К.Кәримов атына «мәмлекетлик нышан есапланған гимнниң айырым сөз қатарлары өзгертилген бе?» деген мәниде мүрәжат етилди. Буннан соң усы мүрәжат бойынша шуғылланып атырған Жоқарғы Кеңес комитети баслығы атына аўызша түрде «мәмлекет нышаны есапланған гербтеги мәмлекетлик флаг көриниси өзгерген бе? деген сораў менен мүрәжат етилди. Соңынан Жоқарғы Кеңес баслығы орынбасары А.Давлетов атына және сораўнама менен мүрәжат еттик. Тилекке қарсы, бул мүрәжатлардың бирде-биреўине нешше мәрте «Устаз өтиниш жуўап бериң» деп өтинген болсақ та усы күнге шекем жуўап берилмеди. Не илаж, «Балық басынан ширийди» деп дана халқымыз бийкарға айтпаған екен дегим келип, тисимди қайраўдан басқа ҳеш әмел ете алмадым.

     

 Тап сондай 15-май күни Қарақалпақстан Республикасы Қаржы  министри М.Садықов атынада пуқара мәпин гөзлеп хат пенен мүрәжат еткен едик. Бирақ хатқа арадан үш айдан аслам ўақыт өтседе жуўап бермеди. Ақыр-ақыбет прокуратура органы жәрдеми менен жуўап алдық. Бәнтлик ҳәм мийнет қатнасықлары министри У.Сабуров атына 9-июнь күни мәжбүрий мийнет жүз берип атырғанлығы бойынша мүрәжат еткен едик. Лекин бул министрде «Ийт үрер кәрўан жүрер» дегендей нызамға қайшы ҳәрекетти айтсақ та ҳуқықбузарлықтың даўам етиўине жол қойып, ақыбетинде мүрәжатымызды кеше жақында прокуратура органы талабы менен зордан таўып берди, бирақ елеге шекем жуўап жоқ. 

       

Өзбекстан Республикасы Президенти жанындағы Исбилерменлик субьектлериниң ҳуқықлары ҳәм нызамлы мәплерин қорғаў бойынша Қарақалпақстан Республикасы ўәкилине, 15-июль күни, исбилермен ҳуқықын қорғап берген хатымызға усы күнге шекем түйирли жуўап алалмадық. Бәринен де өтип түскен Жол Ҳәрекети қәўипсизлиги басқармасын айтпаса да болады. Олардың кемшилигин бармақ бүгип таўса алмайсаң «Мен не деймен қобызым не дейди» дегендей мүрәжатқа қурдасына жуўап бергендей етип жуўап береди. Онда да қәлесе, сен юридикалық шахс болып мүрәжат етсең олар физикалық шахсқа берген етип жумысыңа емес, ал үйине пуқара сыпатында жуўап берип отыра береди.

 

       Мәҳәлле ҳәм шаңарақты қоллап қуўатлаў министри  С.Турманов атына 10-август күни пуқара мәпин гөзлеп хат пенен мүрәжат еткен едик, бирақ усы күнге шекем жуўап жоқ.    

      Қанлыкөл районы ҳәкими ўазыйпасын атқарыўшы Ш.Оспанов атына 26-август күни бирнеше пуқаралардың шағым арзасы бойынша сораўнама менен мүрәжат еткен болсақ, усы күнге сәлемге әлик жоқ. Ал пуқаралар болса, сергиздан. Нөкис қаласы абаданластырыў басқармасы баслығы Т.Халықназаров атына сораўнама менен мүрәжат еткен едик. Бирақ олар сораўнамаға не деп жуўап берерин билмей басын қасыў менен еле ләм-мим демей отыр.

       Соны да билдирип өтпекши едим, ғалаба хабар қуралларының сораўнамасына узағы менен жети күнлик мүддет ишинде жуўап бериў нызам менен кепилленген. Лекин нызамның бул талабы жоқарыда аты аталған мәмлекетлик басқарыў органлары тәрепинен бийпарўалық пенен яки писент етпеслик пенен қаралып келинбекте.

       Жуўмағына келгенде көрерсиз, бул мақала изинен ары барса-кишигирим лаўазымдағы шахсқа интизамий жаза бериў менен шекленеди яки болмаса өзимизди айыпкер етип өте шығады.  

 

Дәўлетмурат Тәжимуратов                        

«Ел хызметинде газетасы» Бас редакторы

 

https://t.me/el_xizmetinde 

скачать dle 10.6фильмы бесплатно



  • 18-09-2020, 15:12 |
  • 2 354