Коронавирус болған анасын емлеўханаға жайғастыра алмай қыйналған жигит ўақыясы

Мен Нөкис қаласы турғыныман. Анам 1960-жылы туўылған. Усы жылдың 30-июль күни ден саўлығына байланыслы шағым етип, сол күни саат 16:00 шамасында қаламызда жайласқан медицина орайына барып рентгенге түсти. Нәтийжеси 30 минутта шықты.

Жазып берген нәтийжесинде өкпе пневмониясы деп берди. Сол күни саат 18:00 шамасында үйге келип 103 тез жәрдемге қоңыраў ете басладық. Оның менен ҳеш ким жуўап бермеди. Соннан 1005 Call centr’ға қоңыраў еттим. Олар да қайта-қайта шыға бергеннен кейин ярым саат шамасында телефонды алды. Сол 30-июль күни саат 22:00 шамасында Тез жәрдем машинасы келди үйге. Олар мамамды алып кетемиз деп турып алды. Соның ушын, өзимниң жеке автомашинамда Тез жәрдемниң изинен жүрдим. Жүргендеги мақсетим мамамды қай жерге жатқарады, дәри-дармақ керек болып қалар деген ойда едим. Оның менен саат 23:50 шамасына шекем мамамды ҳеш жерге жатқара алмай жүрдик. Биринши барған жеримиз Республикалық туберкулез емлеўханасы ол жер қабыл етпеди, себеби орын жоқ екен. Соннан түни менен емлеўханама-емлеўхана жүрдик, орын таба алмай жатқарыўға. Ең ақырында, түнниң бир ўағында «ГАИ»диң көшесиндеги «Рес.детский туберкулезный» емлеўханасына апарды. Ол жерде де орын жоқ деп, 1 саат дегенде зорға қабыллады.

Ол да тартыс пенен болды. 31-июль күни мамамнан анализ алынды. Жуўабы 1-август күни шықты. Жуўапта мамамнан коронавирус бар деп берген. Сол 1-август күни мамамды және ыссыда әўере қылып, Республикалық емлеўханаға апарған, оның менен 2 саат даўамында дәрўаза алдында турған, себеби ҳеш ким хабарласпаған. Оларға себеп орын жоқ болғаны.

Соның менен қайта-қайта 1105 Call centr’ға телефон қылып атырғанда Нөкис қалалық емлеўхана жайғастырды. Оның менен саат 22:00ге шекем ҳеш қандай бир шыпакер, ямаса адам келип мамамның жағдайынан хабар алмаған. Сизге айтажағым, халық усындай қыйналып жүрген ўақытта не қылады екен ҳәсте анамды буншама ыссыда қыйнап. Өзи жасы 60тан өтти. Сизден өтинишим, усы машқаланы алып шығың көтерип. Мениң бирден бир мақсетим, анам саў-саламат үйге қайтса болды. Ол менен, анамнан ҳеш қандай шыпакер хабар алмай атырған да».

 

Бул makan.uz’ға келип атырған биринши ўақыя емес. Емлеўханаларда орынның жоқлығы жасырып болмайтуғын дәрежеге келип жетти. Тез жәрдемниң нешше саатлап емлеўханалардан бос орын излеп ўақытты жоғалтып атырғаны бул хызметтиң жумысын «Тез» емес, «Кеш» жәрдемге айландырып атыр.

Болып атырған жағдай ойландырарлық, бирақ екинши тәрептен Ден саўлықты сақлаў министрлигинен ҳәзирги ўақытта көп нәрсени талап ете бериў бийпайда екенин сезип турмыз. Емлеўханалардағы қанша шыпакерлер, мийирбийкелер коронавирустан қайтыс болып кетти, қаншасы еле аўырып атыр бул жағы бизге белгисиз. Наўқасларға дурыслы қаралмай атырғаны болса өкинишли жағдай. Солай да болса, Ден саўлықты сақлаў министрлигинен мақул тапса бул ўақыяға өз мүнәсибетин билдириўин сораймыз.

Makan.uz

скачать dle 10.6фильмы бесплатно



  • 2-08-2020, 12:01 |
  • 4 656