Жоғалған исеним ҳәм жаңа телефон

 

Жоғалған исеним ҳәм жаңа телефон

 

Бүгин Нөкис қалалық ишки ислер бөлимине саат 16:00де бардым. Ол жерде Қарақалпақстан Республикасы Жоқарғы Кеңеси баслығы Муса Ерниязовтың өлими ҳаққындағы өтирик мағлыўматты repost.uz сайтынан алып шығарғаным менен байланыслы 26-июль күни басланған «профилактикалық сәўбет»те алып қойылған телефонымды қайтарып алыў процесси болды. Қалыс гүўалар, Қарақалпақстан Республикасы мәлимлеме ҳәм ғалаба коммуникациялар басқармасы сектор баслығы, мен ҳәм тергеўши Р.Бабаназаровтың қатнасыўында телефоным ашып ишинде сол өтирик мағлыўматқа байланыслы не барын көрдик.

 

Тийисли жумыслар алып барылғаннан кейин телефон өзиме қайтарып берилди. Конверт көзимше ашылды. Бирақ, бир лийкини, сол ўақытта телефонымды алып қойыў акти дүзилгенде оған себеп етип, хром тарийхынан мениң repost.uz сайтына киргеним анықланбағаны, телеграмның ишки серверинен кирип көрилген жағдайды анықлаў тергеўшиниң қолынан келмегени ушын бул исти арнаўлы қәниге үйрениўи тийислиги жазылған еди. Сондай деп жазылған актке қол қойдым, оның нусқасы маған берилмеди, тек таныстырылды. Бүгин сол актте жазылған арнаўлы қәниге телефонды тексергенде болған жоқ, бул ретинде болса телефонымды Ишки ислердиң тергеўшиси ашып көзден өткерди. Күлкили тәрепи, прокуратурадағылар телефонымды өзи не мақсетте алып қалды ҳәм не мақсетте оны ишки ислер булайтып қайтарып берди, логиканы билмедим?!

 

Телефоныма исенбеймен

Телефонымды неге уқсатаман, айтайын ба? Биреўдиң қойнында үш күн жатып келген нашарға уқсатаман. Оған исенимим жоқ. Аппаратқа да, ишиндеги аккаунтларыма да. Конверт ашылмаған, қалай жабылса солай тур, бирақ мораллық жақтан бул телефонға менде 1 грамм исеним қалмады, Прокуратураға исенимим жоғалғандай. Екеўи де өз айыбы неде екенин билмейди.

 

Ишки ислердиң ақылына тән бердим

Билесиз, буннан алдын Қарақалпақстан Республикасы Жоқарғы Кеңеси баслығының орынбасары мени провокаторлықта айыплап Қарақалпақстан Республикасы Ишки ислер министрине хат шығарып, шара көриўди ҳәм оның нәтийжеси бойынша мағлыўмат бериўди сораған еди. Мениң Ишки ислер министрлигине тән берген жерим, олар Прокуратурадан көре анағурлым ақыллы екен. Яғный, олар да мени 6 машина менен алып кетиўине болар еди, яқ олай етпеди. Мәселени арнаўлы көрип шығатуғын ўәкиллиги бар орган Өзбекстан Республикасы Президенти администрациясы жанындағы Мәлимлеме ҳәм ғалаба коммуникациялар агентлигине экспертизаға жиберди. Мәселени олар шешип берди, изи патырат болған жоқ. Көп болса мен makan.uz’да мениң менен мынадай болды, дедим-дә қойдым. Кейин оны умыттық.

Соны айтыўым мүмкин, Ишки ислер берилген буйрықты шаш ал десе бас алып орынламады, ақыллы ис тутты. Прокуратураның айыбы болса ғалаба хабар қуралларының искерлигин тиккелей мониторинг ететуғын мәкеме Қарақалпақстанда да барын, олар менен ойласыў кереклигин умытты я итибарға алмады. Умытқанда да, итибарға алмағанда да, булар өзлериниң профилактикалық сәўбет өткериўге, адамның үйине түнги саат 12 де бастырып барыўға, журналисттиң затын тартып алыўға болмайтуғынын билмеди ме екен? Ал яхшы, буйрық пенен ислеген дегенде де, буйрық сол деп, нызамды мениң үйимниң төрин басқан сыяқлы басқылап кете бере ме екен?

Мен саўатсызбан тән аламан, бирақ усы саўатым менен өзим ушын емес, прокуратураның абырайсызланғанына қаттыға уялып атырман. Бир нәрсеге түсинбедим, неге Прокуратура өзи баслаған исти Ишки ислерге өткерип жиберди? Өзиниң себеби бар шығар буған да, егер ақырында Ишки ислерге өткереди екен, әўел бастан исти Ишки ислерге береғойса болмас па еди, деген ой келеди. Енди бул жағдайды да Ишки ислер шешип бериўи керек, жоғалған абырай менен исенимди бирақ олар сизлерге тиклеп бере алмайды.

 

Ишки ислерге сизлер де исенеди екенсиз, қалай ойлайсыз Ишки ислердиң министри Қарақалпақстанның прокуроры болыўыға анағурлым мүнәсип емес пе екен, ҳәзирги прокурорға қарағанда? Мениң өзим еки жағдайды анализлей отырып, ҳәзирги Ишки ислердиң министри юридикалық жақтан ҳәзирги прокурордан гөре анағурлым саўатлырақ ҳәм тактикалырақ деп ойлайман. Тек буйрықты орынлап қоймай жағдайды тәрезиге салып, ең оптимал шешим таба алады. Былай айтқанда, шахматтағы пияда емес.

 

Қарақалпақстан Республикасы Прокуратурасы мениң мына жазғаныма каналыңызда қудай ушын жуўап жазбай-ақ қойың, өтиниш. 26-июль күни түнимен болған патыратқа берген жуўабыңыздың қәтесин Ташкенттеги юристлер тапты. Кейингисинде, Ташкенттеги Бас Прокуратураға кеширим сорадық депсиз, ол да өтирик болып шықты. Қәте үстине қәте жамамаң.

 

Мен халықтан журналистлик жумысымда шалалық жибергеним ушын кеширим сорайман, бийабырай болдым, тән аламан. Көз алдыңызда үйренип атырман, сизлер тәрбиялап, тәжирийбе топлатып атырсыз, соған да рахмет айтаман! Енди буннан кейин келген информацияны 3 рет тексерип кейин шығараман!

 

Муса Ерниязовтың өлгени ҳаққындағы өтирик мағлыўмат бойынша ис жабылған жоқ. Еле процессте. Кәсибимдеги қәтем ушын жуўапкершиликтен қашпайман. 

 

Жоғалған исеним ҳәм жаңа телефон

 

Өткен қәтемнен жуўмақ шығарып, жумысымды жақсы нийетте жаңа телефон менен баслап атырман. Қарақалпақстанның Прокуратурасына да жаңа баслық тилеймен.  

 

Лалагүл Қаллыханова,

журналист

скачать dle 10.6фильмы бесплатно



  • 29-07-2020, 23:28 |
  • 4 516