Қарақалпақ тилин «өлтирип» атырған мәкемелер

 

Makan.uz’да буннан былай қарақалпақ тилин «өлтирип» атырған мәмлекетлик мәкемелер ҳәм шөлкемлердиң телеграмдағы каналлары ҳаққында мағлыўмат берилип барылады. Ҳеш қайсы бир министрлик яки шөлкем нышанадан сыртта қалмайды, ҳәттеки, ол жерде өзимниң досларым ҳәм танысларым, тап жақынларым ислесе де.

 

Қарақалпақ тилинде мағлыўмат жеткериўге еринген, басқа каналлардан «переслать» етип, уялмай айлық алып отырған баспасөз хаткерлерин сынға аламыз. Жумысын дурыслап ислеп, айлығын ҳадаллап алыўға шақырамыз.

 

Бизди де сынға алыўшыларға айтарымыз, тилди, тарийхты сол арқалы миллетти жақлағанлардың ҳәммеси де сепаратист, нацист яки провокатор емес! Ислемей жүрген, ислеўге еринип отырған ямаса жуўапкершиликтен мойынтаўлық етип атырған қәнигелерди деп қарақалпақ тили, тарийхы, бара-бара миллети жоқ болып кетиўине үндемей қарап отырмаймыз.

 

Қарақалпақ тилин «өлтирип» атырған мәкемелер

 

Бүгинги сынға Қарақалпақстан Республикасы мәмлекетлик салық басқармасы түсти.

 

https://t.me/qrmsb каналы түсиндирмесинде былай жазылған: «QR MSB rasmiy kanal» болды басқа мағлыўмат жоқ. Каналда 231 адам бар (09.07.2020 саат 19:13 жағдайына бола).

Усы жылдың 1-июль сәнесинен баслап шығарылған 61 мағлыўматтан тек ғана 6 мағлыўмат қарақалпақ тилинде.

 

Соннан:

2 мақала kknews.uz сайтынан;

2 мақала karakalpakstan.uz сайтынан;

2 материалдын биреўи бир каналдан алынған, екиншиси Салық басқармасының өзи жазып шығарған.

 

Салық басқармасында арнаўлы баспасөз хызмети бар, оның үстине газетасы да бар. Басқа мәкемелердегидей, журналист емес қәнигеге баспасөздиң жумысын жүклеп қойыпты дейтуғындай сылтаўға қәжет жоқ. Телеграм каналды жүргизиў ушын қәниге кабинетте отырыўы шәрт емес, үйде отырып та ислеўге болады.

 

Тийкарынан салық басқармасы исбилерменлердиң досты болыўы керек, жақыннан баслап тек исбилермен емес, ал өзин-өзи бәнт еткен адамға да мийнет стажын жүргизиў ушын мәмлекетимизде жаратылған қолайлықларды кең түрде түсиндириўи де керек. Бирақ, @qrmsb каналында, бизиң нәзеримизде, тек ғана сол салық тараўында ислейтуғын адамлар жыйналған. Егер олай болмағанында, канал оқыўшылары менен қайта байланыс ушын телефон, электрон почта яки бот ашылып, ислеўи керек еди. Июль айының басынан берли жайғастырылған мағлыўматларда қарақалпақ тилиндеги мақалалардың азлығынан басқарма баспасөз хызмети қарақалпақ тилиниң мәмлекетлик тил екенин умытып атырғанын көриўге болады. Бул кемшилик Қарақалпақстан Республикасы мәмлекетлик салық басқармасы баслығы тәрепинен итибарға алынып, тез арада сапластырылады деп үмит етемиз.

 

Және бир зат, ҳүрметли баспасөз хаткерлери телеграм топарында отырған журналист кәсиплеслер! Сайтларда мәкемеңизге тийисли шыққан сын мақалаға тез жуўап бергениңиз ушын упай берилетуғынан хабарымыз бар. Сынға жуўапты упай ушын, мақалаға жуўап қайтарылды деген ат ушын емес, ал адамгершилик пенен обал-саўапты есапқа алып жуўап жазсаңыз жақсы болар еди. Рахмет!

 

Лалагүл Қаллыханова,

журналист

 

Қарақалпақ тилин «өлтирип» атырған мәкемелер

 

Қарақалпақ тилин «өлтирип» атырған мәкемелер

 

Қарақалпақ тилин «өлтирип» атырған мәкемелер

 

Қарақалпақ тилин «өлтирип» атырған мәкемелер

 

скачать dle 10.6фильмы бесплатно



  • 9-07-2020, 19:39 |
  • 3 154