Рәсмий мүнәсибет

Рәсмий мүнәсибет

 

Нөкис қаласы пуқарасы Азиза Сапарниязованың Youtube социаллық тармағы арқалы материаллық жәрдем ҳәм Нөкис қаласынан жер орнын соранып Қарақалпақстан Республикасы Жоқары Кеңеси Баслығына жоллаған мүрәжатына Нөкис қаласы Мәҳәлле ҳәм шаңарақты қоллап-қуўатлаў бөлими төмендегише мүнәсибет билдиреди:

Пуқара Азиза Сапарниязова тийкарынан Нөкис қаласы «Алмазар» МПЖ аймағындағы Мәрдана көшеси 104-жай 1-ханада кемпир апасы Амангүл Арзиеваның үй мәнзилинде турақлы есапта турады. Бирақ, олар менен бир неше жыллардан берли бирге жасамай, ҳәр жерде ижарада турып келмекте. А.Сапарниязованың анасы Айқыз Сапарниязова да жоқарыда көрсетилген (Мәрдана көшеси 104-жай 1-ханада) мәнзилинде есапта турады, бирақ, ол да бир неше жыллардан берли бул мәнзилде жасамай, Қазақстан Республикасында жалланба тәризде жумыс ислеп келмекте.

А.Сапарниязоваға дәслеп 2019-жылдың февраль айынан «Алмазар» МПЖ тәрепинен баласы Д.Сапарниязов ушын еки жасқа шекемги бала күтими ушын берилетуғын напақа тайынланған. Бирақ, сол жылдың октябрь айында оның Қазақстан Республикасына шығып кетиўине байланыслы тийисли нызам талаплары тийкарында напақа пулының берилиўи тоқтатылған.  Соң,  Қазақстан Республикасынан қайтып келгенинен кейин «Берекет» МПЖ аймағында 22-киши район 9А-жай 5-ханада ижарада турған ҳәм усы пуқаралар жыйыны тәрепинен перзенти ушын еки жасқа шекемги бала күтими ушын напақа тайынланған.

Ал, пуқара А.Сапарниязованың жай менен тәмийинлениў мәселесине келсек, кем тәмийинленген, майыплығы болған турақ-жайға мүтәж ҳаял-қызларға жеңиллетилген тәртипте берилетуғын квартиралардан алыў ушын да – дәслеп зәрүрли ҳүжжетлерди топлаў, кейин сол квартираның жәми сўммасынан келип шығып белгиленген муғдарда төленетуғын дәслепки төлемин төлей алыў имканияты, кейин ҳәр айда төленетуғын төлемлери ушын да белгили бир табыс дереги болыўы керек… Бирақ, пуқара Азиза Сапарниязованың жеңиллетилген тәртипте көп қабатлы турақ-жайлардан квартира алыўы ушын ҳеш қандай имканияты, атап айтқанда, дәслепки төлеми, кейинги ҳәр айдаға төлемлерин төлеў ушын ҳеш қандай табыс дереги де жоқ.

Жер орнын сорап еткен мүрәжаты бойынша мағлыўмат беретуғын болсақ, ҳәзирги күнде пуқараларға жеке тәртиптеги турақ-жай қурылысы ушын жер орнын ажыратыў мәселеси қала ҳәм район ҳәкимликлериниң ўәкилликлеринен алынып, Өзбекстан Республикасы Министрлер Кабинетиниң 2019-жыл 28-январьдағы 63-санлы қарары менен тастыйықланған «Жеке тәртиптеги үй-жай қурыў ушын жер участкаларын ажыратып бериў ҳәм жер участкаларға мийрас етип қалдырылатуғын өмирлик ийелик етиў ҳуқықын реализация етиў тәртиби ҳаққында»ғы Режениң 4-пунктине муўапық жеке тәртиптеги турақ-жай қурылысы ушын жер орынлары «E-IJRO AUKSION» электрон саўда майданшасында өткерилетуғын аукцион саўдасы арқалы әмелге асырылатуғыны белгиленген.

Сондай-ақ, усы Режеге муўапық жеке тәртиптеги турақ-жай қурылысы ушын аукционсыз жер орынларын ажыратып бериў тек:

– қаза болған әскерий хызметкерлердиң шаңарағына;

– мәмлекетлик ҳәм меншик үй-жай фондындағы өзлери ийелеп турған үй-жайын қала яки район ҳәкимликлерине өткизетуғын (снос) пуқаралар ямаса мүлкдарларға бериледи.

Усыннан келип шығып, басқа ҳәр қандай пуқаралар жеке тәртиптеги турақ-жай қурылысы ушын жер орынларын жоқарыда атап өтилгениндей «E-IJRO AUKSION» электрон саўда майданшасында өткерилетуғын аукцион саўдасы арқалы алыўы мүмкин.

 

Г.Абибуллаева,

Нөкис қаласы Мәҳәлле ҳәм шаңарақты қоллап-қуўатлаў бөлими баслығы орынбасары.

 

Дерек: nukus.uz

 

скачать dle 10.6фильмы бесплатно



  • 7-07-2020, 17:55 |
  • 3 027