Makan.uz сайтына Кәсиплик аўқамларынан жуўап келди

Өзбекстан кәсиплик аўқамлары Федерациясының Қарақалпақстан кәсиплик аўқамлары шөлкемлери бирлеспеси кеңеси Makan.uz сайтының “Telegram” каналына “ТашМАУ Нөкис филиалы 3-июль күни Нөкис районы Мақсым қала аўылындағы магистр ҳәм докторантлар ушын арналған тәжрийбе хожалығына техник хызметкерлер ҳәм сипсекешлерди пахта отағына жибергенлигинен наразы болған ” мазмунда келген мүрәжат бойынша төмендегилерди мәлим етеди. (Мүрәжат тексти ең төменде берилген)

Мүрәжатта мүрәжат ийесиниң аты-фамилиясы ҳәм жасаў орны ҳаққындағы мағлыўматлар көрсетилмеген аноним мүрәжат болыўына қарамастан, хызметкерлердиң мәпин қорғаў ҳәм мәжбүрий мийнетке жол қоймаў мақсетинде Қарақалпақстан кәсиплик аўқамлары шөлкемлери бирлеспеси кеңеси тәрепинен 2020-жылы 3-июль күни исши топар дүзилип, 3- ҳәм 4-июль күнлери мүрәжат орнына барып үйренилди.

Мүрәжатты үйрениў барысында Ташкент мәмлекетлик аграр университети Нөкис филиалында жумыс ўақты саат 9:00 ден 17:00 ге шекем, бир күн дем алатуғын алты күнлик жумыс ҳәптеси белгиленген.

ТашМАУ Нөкис филиалының штат кестеси бойынша жәми 342,75 хызметкер болып, “Техникалық пайдаланыў ҳәм хожалық бөлими”нде 61,5 хызметкер ислеп, соннан 1 лаўазым вакант, бөлимдеги 5 хызметкер мийнет дем алысында.

Мүрәжат ийесиниң аты-фамилиясы ҳәм жасаў орны ҳаққындағы мағлыўматлар көрсетилмегенлиги себепли оның өзи менен ушырасыў имканы болмады. Нөкис районы, Қутанкөл АПЖ, Мақсым қала аўылындағы тәжрийбе хожалығына барғанымызда 5 гектарға тәжрийбе ушын пахта егилип, атыздың басында бир тракторшы жүргенлиги, оның менен сәўбетлескенимизде, ТашМАУ Нөкис филиалы техник хызметкерлери пахта отағына улыўма келмегенлиги ҳаққында түсиник хатында көрсетип өткен.

Сондай-ақ, филиалда жумыста жүрген хызметкерлер менен ушырасып, мүрәжатта көрсетилген мәселе жүзесинен сәўбетлесиў өткерилди. Олардан усы жағдай бойынша түсиник соралғанында, 3-июль күни Нөкис районы Мақсым қала аўылындағы тәжрийбе хожалығына пахта отағына бармағанлығын, сол күни өз жумыс орнында болмғанын мәлим еткен.

Солай етип, Ташкент мәмлекетлик аграр университети Нөкис филиалы техник хызметкерлер ҳәм сипсекешлер 3-июль күни Нөкис районы Мақсым қала аўылындағы тәжрийбе хожалығына пахта отағына барғанлығы ҳаққындағы мағлыўмат тастыйықланбады.

 

Makan.uz сайтына Кәсиплик аўқамларынан жуўап келди

 

Makan.uz’ға мүрәжат (03.07.2020-жылы @makan_uz каналында жәрияланған)

 

«Биз ТашМАУ Нөкис филиалы хызметкерлери жәрдем бериўиңизди соранамыз. Себеби, бизлерди карантин ўақтында пахта отағына жиберип атыр. Бүгин 3-июль күни Нөкис районы Мақсымқала аўылында магистр ҳәм докторантлар ушын арналған тәжирийбе жеринде техник хызметкерлер ҳәм сипсекешлер пахта отап атыр. 3,5-4 миллион айлық алатуғын докторантлар үйинде. Азанда 50-60 адам бир автобуста тығылып келдик. Дурыс, филиал аўыл хожалығына қәнигелескен, бирақ тәжирийбе ислеп атырғанлар дем алып атырса, айлығы 1 миллионға жетпейтуғынлар қыйналса инсаптан ба? Мектеп, балалар бақшасы ислемейди. Жас балаларымызды азаннан кешке шекем жалғыз таслап келдик. Себеби, жумыстан айрылып қалыўымыз мүмкин.

ТашМАУ Нөкис филиалы хызметкерлери».

Makan.uz’дан жуўмақ. Мәмлекетлик мәкемелерде мәжбүрий пахта отағы, пахта терими бар екенлиги ҳәммеге белгили. Мийнет кодексинде мәжбүрий мийнетке жол қойылмайтуғынын хызметкерлер билсе де өз ҳуқықын талап етиўден қорқады. Адамлар усы барыста жасай берсе – басшылардың хызметши ҳуқықларын бузыў жағдайлары даўам ете береди. Қолайлы жәмийетте жасаў да, усылай қыйналыў да ҳәр бир адамның өз таңлаўы.

 

Makan.uz сайтына Кәсиплик аўқамларынан жуўап келди

 

скачать dle 10.6фильмы бесплатно



  • 6-07-2020, 11:26 |
  • 3 828