Қарақалпақстан Республикасы Транспорт министрлигиниң берген рәсмий жуўабынан кейин бир неше сораўлар пайда болмақта

Олардың айырымлары министрликке тийисли болса, ал айырымлары сенаторларға тийисли.

Транспорт министрлигине:

"Автотранс Шымбай" мәмлекетлик унитар кәрханасының жәми неше автобусы, газели бар? Олар қайсы жөнелислерге қойылған?

Қарақалпақстанда жумыс ислеўши исбилерменлик субъектлеринде неше автобус, газель бар? Олар ҳәзир қатнаўларды әмелге асырып атыр ма? Қайсы жөнелислерде?

 

Автобуслар аз муғдарда қойылған жөнелислерге газеллерди қойыўға бола ма? Егер болмаса, автобуслар санының аз, ал жолаўшы санының көплиги, социаллық аралықты сақлаўдың имканы болмай атырғанлығы себепли Дамас яки Газеллерге рухсат бериў ушын Республика арнаўлы комиссиясына усыныс берилди ме?

 

Сенаторларға:

Олий Мажлис Сенаты баслығы Танзила Нарбоева бүгин не айтқанынан хабарыңыз бар, ол орынлардағы сенаторлардың жәмийетте жүз берип атырған процесслер ҳәм қызғын додаланып атырған мәселелерди үндемей гүзетиўи, сондай-ақ, депутатлардың халық пенен сәўбетке кириспейтуғыны, олардың адамлардан өзин алып қашыўын сынға алды.

 

Қарақалпақстандағы машқалалардан хабарыңыз бар деп үмит етемиз. Кеше жақында ИИМ хызметкериниң такси шофёрының мед.нықапты деп бир жигиттиң қолын қайырып, оған күш ислеткени, ол жигит ҳәм таяқ жеп, ҳәм жәрийма төлегенине үндемедиңиз (биз бул жағдайға мүнәсибетиңизди сайтларда көрмедик), ҳә, яхшы. Бирақ, енди жәмийетлик транспорт мәселеси тек бир адамның емес, ал пүткил Қарақалпақстан Республикасының халқын қыйнап, ойландырып тур. 16-марттан берли халық карантинде жатып бир талай тарықты, диңкеси қурыды. Ҳәзир тек ғана базарға, районларға қатнап жүрген емес, күн-көриси Дамас/Газель айдаў менен байланыслы болған адамлардың да жағдайы жақсы емес. Бул транспортлардың ҳәрекетин тиклеў арқалы 38-40 градус ыссыда автобусқа тығылып миниўге мәжбүр болып атырған адамлардың, сондай-ақ, Дамас/Газель шофёрларының да күн көрисин жақсылаўға жәрдем берген боласыз. Мен исенемен, егер Дамас/Газельлерге рухсат берилсе, шофёрлар керекли санитариялық талапларды орынлаўға тайын.

Республика арнаўлы комиссиясына Қарақалпақстан Республикасы Транспорт министрлигиниң усыныс бериўге күши жетпесе, Қарақалпақстаннан сайланған сенаторлардың күши әлбетте жетеди. Егер сизлер халықтың мүшкилин жеңиллетиўге жәрдем берсеңиз халық сизден, әлбетте, разы болады.

Қарақалпақстаннан Олий Мажлис Сенатына сайланған сенаторлар дизими.

 

Қарақалпақстан Республикасы Жоқарғы Кеңесиниң депутаты, Қарақалпақстан Республикасы Жоқарғы Кеңесиниң Баслығы М.Ерниязов;

 

Халық депутатлары Нөкис қалалық Кеңесиниң депутаты, «Қарақалпақ әдебияты» газетасының Бас редакторы Г.Аннақлышева;

 

Қарақалпақстан Республикасы Жоқарғы Кеңесиниң депутаты, Ташкент  педиатрия медицина институты Нөкис филиалының директоры О.Атаниязова;

 

Қарақалпақстан Республикасы Жоқарғы Кеңесиниң депутаты, Өзбекстан жаслар аўқамы Қарақалпақстан Республикалық Кеңесиниң баслығы А.Данияров;

 

Халық депутатлары Төрткүл районлық Кеңесиниң депутаты,  Өзбекстан Республикасы Олий Мажлиси Сенатының комитет баслығы Б.Матмуратов;

 

Қарақалпақстан Республикасы Жоқарғы Кеңесиниң депутаты, «Нураний» қорының Қарақалпақстан Республикасы бөлиминиң баслығы Ш.Уснатдинов.

 

Қарақалпақстан Республикасы Транспорт министрлигиниң берген рәсмий жуўабынан кейин бир неше сораўлар пайда болмақта

 

Егер жәмийетлик транспорт мәселесиниң қаншелли әҳмийетли екенлигин билгиңиз келсе, қәлеген жөнелистеги бир автобусқа минип, ақырғы бәндиргиге шекем түспей барып көриң.

 

Лалагүл Қаллыханова,

журналист

 

скачать dle 10.6фильмы бесплатно



  • 19-06-2020, 17:53 |
  • 1 659