Өзбекстандағы Гёте институты Аралдың қурғаған ултанын көклемзарластырыўға өз үлесин қосты

Гёте институты Германия Федеративлик Республикасындағы мәдений шөлкем болып, дүньяның көплеген мәмлекетлеринде өз ўәкилханаларына ийе.

Гёте институтының жумысы тийкарынан шет еллерде немис тилин ғалабаластырыў ҳәм мәденият тараўында  халықаралық шерикликти кеңейтиўге қаратылған. Гёте институты Германияның мәдений, экономикалық ҳәм сиясый турмысы ҳаққында ең соңғы мағлыўматларды усынады ҳәм бул арқалы пүткил дүнья жүзинде оған объектив көз-қарастың қәлиплесиўин әмелге асырады. Гёте институтының мәдений ҳәм ағартыўшылық дәстүрлери мәдениятлар аралық қатнасықларды ҳәм мәденият алмасыўды қоллап-қуўатлайды. Бул өз гезегинде пуқаралық жәмийетти ҳәм халықаралық ҳәрекетшеңликти раўажландырыўға үлес қосады.

60 жыл даўамында Гёте институтының шет еллердеги ўәкилханалары менен бир қатарда пүткил Германияны биринши рет таныстыратуғын мәдений орайлар, жәмийетлер, оқыў  заллары, сондай-ақ, имтихан ҳәм тил орайлары жумыс ислемекте.

Ташкенттеги Гёте институтының ең әҳмийетли мақсетлериниң бири бул- халықаралық мәдений бирге ислесиўди қоллап-қуўатлаў болып есапланады. Усыған муўапық, Ташкенттеги Гёте институтының мәдений дәстүрлер бөлими өзбекстанлы шериклер менен биргеликте кең көлемли илажлар өткизип келмекте. Конференциялар, лекциялар ҳәм семинарлар, концертлер менен шеберлик сабақлары көбинесе, заманагөй музыка, искусство, фотография, дизайн ҳәм архитектура жөнелисинде көргизбе ҳәм семинарларды шөлкемлестириў, заманагөй фильмлерди, ойын ҳәм театр шығармаларын көрсетиў арқалы мәденият алмасыўды әмелге асырмақта.

Жоқарыдағылар менен бир қатарда Гёте институты қайырхомлық илажларын әмелге асырыўда да белсенди қатнасып келмекте. Жақында институт, Өзбекстан Республикасы Президенти жанындағы Аралбойы халықаралық инновация орайы тәрепинен амелге асырылып атырған «Аралдағы бағым» (My garden in the Aral sea) жойбарын  қоллап-қуўатлаўға ҳәм бул арқалы Аралбойы халқының турмыс дәрежесин жақсылаўға өз үлесин қосыў мақсетинде қайырхомлық қаржыларын ажыратты. Атап өтиў орынлы, усы ажратылған қаржылар, бағ жаратыў ҳәм көклемзарластырыў жойбарының алға илгерилеўине ҳәм жойбарға кең жәмийетшиликтиң дыққат-итибарын қаратыў жумысларына көп жәрдемин тийгизди.

Бизлер пүткил Аралбойы халқы атынан Өзбекстандағы Гёте институтына  еткен қайырлы ислери ушын терең миннетдаршылық билдиремиз ҳәмде пурсаттан пайдаланып ҳәммени жойбарда қатнасыўға шақырып қаламыз. Жойбарда қатнасыўды қәлеўшилер ушын қосымша мағлыўматлар www.aralforest.org интернет сайтында жайластырылған.

 

скачать dle 10.6фильмы бесплатно



  • 20-05-2020, 22:05 |
  • 641