Мурсия – «Европаның қыйтақ жери»

Мурсия – «Европаның қыйтақ жери»

 

Мурсия – Испанияның қубла-шығысында жайласқан автономиялық ўәлаяттың ҳәкимшилик орайы. Қаланың қысы жыллы, жазы оғыры ыссы. Африка шөллеринен ушқан шаңлар Мурсияда думан пайда етип турады.

Мурсияны «Европаның қыйтақ жери» деп атайды. Себеби Мурсияда жетистирилген көп муғдардағы баў-бақша, мийўе ҳәм гүллер пүткил Европаға жеткериледи. Бул жерде де қурғақшылық болғанлықтан халық суўдан пайдаланыўда көп қыйыншылықларды бастан кеширген. Ҳәзирги күнде дүньядағы суўды тежеў технологияларының ең жетик үлгилери, яғный, тамшылатып суўғарыў бойынша қурылмалар ислеп шығарыўшы AZUD компаниясы ҳәм автоматластырылған ыссыханалар қурыўға қәнигелескен Novagric агросанаат компаниялары да усы Мурсия қаласында жайласқан.

AZUD компаниясына 1979-жылда тийкар салынған. Оның 5 мәмлекетте ислеп шығарыўшы цехлары бар ҳәм 90 нан артық мәмлекетте саўда тармақларына ийе.

Мурсия – «Европаның қыйтақ жери»

 

AZUD компаниясы тамшылатып суўғарыў технологиясын өткен әсирдиң 80-жыллары өндириске ендирген ең биринши компаниялардан бири саналады. Оның суў ва электр энергиясынан нәтийжели пайдаланыў, ҳәр бир өсимликке тең муғдарда суў жеткерип бериў имканиятын бериўши ирригациялық системаларды ислеп шығарады ҳәм әмелиятқа енгизеди.

Novagric компаниясы болса аўыл хожалығын «ақыллы» етиўге қаратылған, анығырақ айтқанда толық автоматластырылған ыссыханаларды жаратады ҳәм жеткерип береди. Бул жерде суўғарыў үскенелери, дренаж системалары, ықлымды басқары системалары, суўды тазалаў, өсимликлерди қорғаў қураллары, экранлар ҳәм аксессуарлар ислеп шығарылады.

Мурсияда ҳәр жылы фермерлер жарысы өткерилип турады екен. Биз сапарымыз даўамында усы жарысқа келген испан фермерлери менен ушырастық. Жас қыз-жигитлер өзлериниң фермер екенлигинен сондай дәрежеде мақтанады дейсең, өзиң де солардың қатарында болыўды арзыў етесең. Жарыста тийкарынан өнимлердиң сапасы ҳәм оны жетистириўде тәбийий ресурслардан қандай дәрежеде үнемли пайдаланғанлығы есапқа алынады екен.

Испания далаларында көплеп самал генераторларына көзиңиз түседи. Дийқанлар жерлерин басқарыўда ҳәм хожалығы ушын тийкарынан электр энергиясын самалдан ҳәм қуяштан алады.

Аўыл ҳәм суў хожалығын басқарыўда усындай әжайып жетискенликлерди киргизген мәмлекеттиң бундай бай тәжирийбеси биз ушын ҳақыйқат керек!

 

Испания туўралы қызықлы мағлыўматлар

Мадридке биз саат 15.00-лерде түстик. 6 млннан аслам адам жасайтуғын қала көшелеринде адам жоқ. Ҳайран қалдық. Сөйтсек, Испанияда күндиз саат 13.00-тен 17.00-ге шекем тынышлық ўақты екен. Буны «сиеста» деп атайды.Қаладағы ресторанларда, жәмийетлик аўқатланыў орынларында ыссы шай ишиў машқала. Яғный, испанлар дерлик шай ишпейди. Шайдың орнына кола, пиво яки шарап усыныўы мүмкин. Тийкарғы тағамы доңыз гөши болғанлықтан, ҳалал фуд излеп көшедерди көп гезген ўақытлар болды.

Қалаларында өмир кеште қайнайды. Үйлеринде ҳешким қалмайтуғын шығар деп ойлайсаң. Оның үстине жан-жақтан келип атырған туристлер де халық санын көбейтип турады.

«Сантьяго Бернабеу» («Реал Мадрид» ф/к стадионы) стадионына кириў 25 евро. Стадионға 100 мың адам сыйыўы мүмкин, лекин қәўипсизлик тәрепин есапқа алып, 70 мыңнан артық адам киргизбейди. Ҳәзирги ўақытта оңлаў-жөнлеў жумыслары алып барылып атыр, бирақ ушырасыў өткерилетуғын күнлери иске түседи.

Мурсия – «Европаның қыйтақ жери»

 

Испанияда эрамыздың басларына, яғный Рим империясы дәўирине тийисли 2 суў бөгетлери елеге шекем хызмет етип тур.

Халқы инглис тилин онша биле бермейди. Испан тилинде дүньяда 450 млн-ға шамалас адам сөйлеседи. Яғный, сөйлеўшилери жөнинен қытай тилинен кейинги екинши орында турады.

Кордова қаласында 784-жылы қурылған мешит бар.  Мешит араблар басып алғаннан кейин қурылған болып, сол дәўирлерде дүньядағы екинши орындағы ең үлкен мешит саналған. Бир ўақытлары бул қала мусылманлардың Қурдаба әмирлиги пайтахты болған. 1236-жылы қала католиклер тәрепинен басып алынып, мешит христиан шеркеўине айландырылған.

Испанияда ең жақсы сыйлық – бул зәйтүн майы. Бул мәмлекетте дүньядағы барлық зәйтүн майының ярымы жетистириледи.

Испанияда ЮНЕСКОның Жержүзилик мийраслары объекти дизимине 44 мәнзил кирген.

 

P.S.: Бүгинги күнде Испания коронавирус кеселлигинен ең көп жәбир шегип атырған мәмлекетлерден саналады. Өз гезегинде биз испан халқына сабыр-тақат, беккем күш-жигер тилеймиз. Әлбетте, тарийхта буннан да аўыр жағдайларды бастан кеширип, дүньяның ең күшли мәмлекетлери қатарында киятырған елдиң бул сынақларды да жақын күнлерде жеңип шығыўына исенимимиз кәмил.

 

Есимқан ҚАНААТОВ

«Ел хызметинде» газетасынан алынды

скачать dle 10.6фильмы бесплатно



  • 2-04-2020, 12:55 |
  • 398