Шағым: Неге баланың напақа пулынан мал-мүлк ҳәм жер салығына ақша усланып атыр?

Сайтымыздың телеграмдағы бот мәнзилине биринши емес нешинши мәрте усы жоқарыдағы мазмунда мүрәжатлар келип түспекте. Олардың бирин келтиремиз:

«Ассалаўма алейкум makan.uz жәмәәти. Сизге илтимасым бар еди. Яғный, мениң 8 айлық бөпем бар. Ҳәзир мәмлекет тәрепинен бала 2 жасқа толаман дегенге шекем берилетуғын напақа алып атырман. Март айының напақа пулының 154 мың сўмын жеке пластик картама түсирген. Балаға берилетуғын 50 мың сўмды да өткерген. Жәми болып 204 мың сўм түсти. Балама өткен айда напақа (уход) пулымыз 484 мың сўм түскен еди. Ал, усы ай өткендегиден әдеўир кем. Себебин сорап өзим туратуғын Мәкан пуқаралар жыйынына бардым. Барсам, сизлерден мал-мүлк ҳәм жер салықларына услап қалдық деп жуўап берди. Мен мал-мүлк ҳәм жер салығынан ҳеш қандай қарызым жоқ екенлиги ҳаққында усы жылдың, яғный 2020-жылдың 28-февраль күни төлегенлигим ҳаққында квитанция апардым. Енди қашан қайтып аламыз десем, «Нөкис қаласы салық инспекциясына барып арза жазып кетесиз» деди.

23-март күни Салық инспекциясына барып арза жазып кеттим ҳәм сол ўақытта сорадым, - бул енди қашан түседи, - деп. «15 күннен кейин қаралады, ана қутышаға таслап кетиң арзаңызды» деп жуўап берди.

Енди мен ҳәм мен қусаған бала тәрбиясы ушын напақа (уход) алатуғын жас аналарды қызықтыратуғын сораў:

- Мәкан пуқаралар жыйынына ҚР Салық басқармасы тәрепинен қайсы хожалықлардың қанша муғдарда қарызы бар екенлиги ҳаққында фамилиясы, аты, мәнзили ҳәм қарыздарлық суммасы көрсетилген мағлыўматнама берилмей ме? Соларға тийкарланып қарызын услап қалмай ма? Ямаса, ҳәммеден усланыўы мәжбүрий деген қарар бар ма? Балаға берилетуғын напақадан услансын деген қарар бар ма ямаса? Енди Салық басқармасы 15 күн қашан қарайды деп баламызға керекли затын алып бере алмай отырамыз ба? Неге услап қалатуғын жағдай болса 1 күнде услап қалады, қәтелесип қайтарып беретуғын болса неге 15 күн күтиўимиз керек?

Ҳәзир карантин ўақтында онысыз да ақша керек баламызға витаминли тамақлар алып бериў, иммунитет көтериў ушын ушын.

Сизден илтимас усы теманы орталыққа алып шығып берсеңиз».

 

Бул сораўларға Салық басқармасынан жуўап күтип қаламыз.

скачать dle 10.6фильмы бесплатно



  • 26-03-2020, 15:43 |
  • 1 438