Социаллық тармақларда жәрияланған Е.Қурбаниязов ҳәм Л.Арзуевалардың турмыс шараяты бойынша Нөкис қаласы ҳәкимлигиниң рәсмий мүнәсибети

Социаллық тармақларда жәрияланған Е.Қурбаниязов ҳәм Л.Арзуевалардың турмыс шараяты бойынша Нөкис қаласы ҳәкимлигиниң рәсмий мүнәсибети

Бәршемизге белгили «Makan.uz» телеграмм каналында «Ермекбай ҳәзир бир кафеде күниге 25 мың сўм ақшаға жумыс ислеп атыр. Лалагүл март айында босанады. Шаңарақ 200 мың сўмға Орақ балғада ижарада тур. Коммунал төлемлер ижара пулынан тысқары төленеди. Шаңарақтың жасаў жағдайы ҳаққында тез арада видео жәриялаймыз» атамасында, буннан кейин және де «Ўәдепаз мәканкомлар, итибарсыз женсоветлер, ақ жағалы депутатлар, түртпегенше қозғалмайтуғын сектор басшылар уйқылай бериң. Сизлер жақсы уйқылап атырсыз!» атамасында постлар жәрияланған еди.

Бул ўақыя, яғный, Ермекбай Қурбаниязов пенен Лола Арзуевалардың турмыс шаратына келетуғын болсақ, Қазақстан Республикасы, Алма-ата қаласынан 2019-жыл 17-декабрь күни «Ўатанға қайтыў гүўалығы» менен келген ҳәм ҳәзирги ўақытта Нөкис қаласы «Ата мәкан» мәкан пуқаралар жыйыны аймағындағы Сарбиназ көшеси, 36-жайда ижарада жасаўшы пуқаралар Е.Қурбаниязов ҳәм Л.Арзуевалардың жасаў жағдайы қалалық Мәҳәлле ҳәм шаңарақты қоллап-қуўатлаў мәселелери бөлими тәрепинен үйренилип шығылды.

Үйрениў даўамында Нөкис  қаласы «Ата мәкан» МПЖ аймағындағы Сәрбиназ көшеси 36-жайда есапта турыўшы 1989-жылы туўылған пуқара Арзуева Лола 2012-жылдың декабрь айында Қазақстан Республикасы, Алма-ата қаласына жумыс ислеў ушын кеткен ҳәм сол жақта Нөкис қаласы «Жаңа базар» МПЖ аймағында номерсиз жайда жасаўшы 1986-жылы туўылған пуқара Қурбаниязов Ермекбай менен нызамлы некеден өтпестен турмыс қурып, бирге жасаған. Усы бирге жасаған дәўиринде олар Арзуева Жасмина (2013-жылы туўылған), Арзуева Жанара (2015-жылы туўылған), Арзуева Жансая (2016-жылы туўылған), Арзуев Даўлетияр (2019-жылы туўылған) атлы 4 перзентли болған.

Пуқара Е.Қурбаниязов ҳәм Л.Арзуевалар «Истиқболли авлод» социаллық мәлимлеме орайы Қарақалпақстан Республикасы бөлими жәрдеминде 2019-жылдың 17-декабрь күни шаңарағы менен Қарақалпақстан Республикасы Нөкис қаласына қайтып келген. Сол күни Нөкис қалалық Ҳаял-қызлар комитети тәрепинен пуқара Е.Қурбаниязов ҳәм Л.Арзуевалар менен сәўбетлесиў өткерилип, Л.Арзуева 4 перзенти менен «Ата мәкан» МПЖ аймағындағы Сәрбиназ көшеси 36-жайда жасаўшы ата-анасының үйине, ал, Е.Қурбаниязов «Темир жол» МПЖ аймағындағы 22-киши район, 3-б жай, 1-ханада жасаўша әкесиниң туўысқан иниси Юсупов Артықбайдың үйине орналастырылды. Пуқара Е.Қурбаниязов соңынан «Жаңа базар» МПЖ аймағындағы номерсиз жайда жасаўшы әкеси Қурбаниязов Жеткербайдың үйинде бир ҳәпте даўамында жасаған. Усы мәнзилде жасаған дәўиринде пуқаралар жыйыны тәрепинен Е.Қурбаниязоқа пуқаралық паспортын алыўға жәрдем көрсетилди.

Ал, оның келиншеги Л.Арзуеваға «Ата мәкан» МПЖ тәрепинен пуқаралық паспортын алып бериўде жәрдем көрсетилди.

Е.Қурбаниязов ҳәм Л.Арзуевалар 4 перзенти менен бирге ҳәзирги күнде, яғный, 2020-жылдың январь айынан баслап «Ата мәкан» МПЖ аймағындағы Дослық байрағы көшеси, 31-санлы жайда ижарада жасап келмекте.

Нөкис қалалық ПҲАЖ бөлими тәрепинен Ермекбай Қурбаниязов ҳәм Лола Арзуевалардың Қазақстан Республикасы, Алма-ата қаласында 2015-жылы туўылған қызы Арзуева Жанара ҳәм 2016-жылы туўылған қызы Арзуева Жансаяның туўылғанлығы ҳаққындағы гүўалығын алып бериў бойынша 2020-жыл 28-январь күни Қазақстан Республикасына тийисли тәртипте сораўнама жиберилген. Соның менен бирге, 2019-жылы туўылған перзенти Арзуев Даўлетияр Ермекбаевичке Нөкис қалалық ПҲАЖ бөлими тәрепинен 2020-жыл 28-январьда туўылғанлығы ҳаққында гүўалық берилди.

Нөкис қалалық Бәнтликке көмеклесиў орайы тәрепинен пуқара Ермекбай Қурбаниязовқа тийисли тәртипте орайда бар болған бос жумыс орынлары менен таныстырылып, ҳәр айдың 5-сәнесинде орайда (ish.mehnat.uz) жаңаланып барылатуғын бос жумыслары ҳаққындағы мағлыўматлар менен турақлы танысып барыў ямаса усыныс етилген жумыслардың бирин таңлаў усынылды.

Пуқара Л.Арзуева Нөкис қаласы Медицина бирлеспесине қараслы 6-санлы шаңарақлық поликлиникасы тәрепинен 2019-жыл 20-декабрь күни ҳәмиледарлықтың 26-27-ҳәптелигинде дизимге алынған болып, шыпакерлердиң турақлы бақлаўына алынған. Ҳәмиледар Л.Арзуеваның туўыў ўақты 2020-жыл 14-март сәнесине белгиленген.

Пуқара Арзуева Лоланың 2020-жыл 5-февраль күнги 2 жасқа шекемги балалар напақасын алыўда жәрдем сорап жоллаған мүрәжаты «Ата мәкан» мәкан пуқаралар жыйыны жанындағы кем тәмийенленген шаңарақларды социаллық қоллап-қуўатлаў комиссиясы тәрепинен үйренип шығылып, 2020-жылдың март айынан баслап 2 жасқа шекемги балалар күтими напақасы тайынлаў ҳаққында шешим қабыл етилди.

 

Нөкис қаласы ҳәкимлигиниң Мәлимлеме хызмети.

 

скачать dle 10.6фильмы бесплатно



  • 29-02-2020, 14:32 |
  • 1 698