Алматыда жасап атырған Ермекбай менен Лалагүл туўралы қосымша мағлыўмат

Алматыда жасап атырған Ермекбай менен Лалагүл туўралы қосымша мағлыўмат

 

Сайтымыз арқалы «Муҳаббаты ушын гүрескен нөкисли жаслар ўақыясы» атамысында берилген мақала қәҳарманлары Ермекбай Қурбаниязов ҳәм оның жүкли ҳаялы Лалагүл Арзуева ҳаққында бизге Қазақстан Республикасының Родник жәмийетлик қорынан қосымша мағлыўмат келип түсти. Мақаламыз басында кеше бул шаңарақ туўралы YouTube каналына жайластырған видеомызды айырым ҳуқықый себеплерге бола өширгенимизди мәлим етпекшимиз.

«Родник» Шымкент қаласындағы «Сана сезим» мәмлекетлик емес жәмийетлик шөлкеминиң көмеги менен қаладан 60 км алыста жайласқан туўыў үйинен шаңарақтың ең кишкене баласына туўылғаны ҳаққында мағлыўматнама алыўға ерискен. Ертең азанда бул ҳүжжет Алматыға жеткериледи. Өзбекстан Республикасының Қазақстан Республикасы Алматы қаласындағы консулы шаңарақтың ең кишкене перзенти ушын ҳүжжет берген. Енди болса Родник Өзбекстан ҳәм Қазақстан ҳүкиметлери ортасындағы 2012-жыл 7-сентябрьдеги келисимине тийкар Ермекбай  ҳәм Лалагүлди перзентлери менен елине ҳеш қандай ҳәкимшилик жуўапкершиликке тартылмастан қайтарыўды күтпекте.

Бундағы мақсет илажи барынша бул шаңараққа жеңиллик жаратқан ҳалда елине аман-есен қайтарыў.

Нызамлы тәрептен алып қаралғанда, Өзбекстан пуқаралары Қазақстан шегарасын нызамсыз түрде кесип өткен. Егер еки елдиң Ҳүкиметлери  ортасындағы келисим болмағанында булардың ис ҳәрекети ушын олар Қазақстаннан шығарып жиберилен болар еди. Бул пуқаралардың перзентлери көп болғаны, оның үстине келиншектиң жүкли екенлигин есапқа алып Миграциялық полиция басқармасы буларға жеңиллик берген. Шаңарақты елине қайтарыў жумыслары 10-декабрьге шекем әмелге асыўы режелестирилген. Оларға тез арада самолёт пенен қайтыў ушын билетлер алыныўы белгиленген.

 

Соны да қосымша сыпатында мәлим етпекшимиз, Нөкис қаласында жасаўшы Базар Елемисова атлы апа сайтымызда жәрияланған мақаладан соң Алматы қаласындағы ағайинлерине шығып, қолдан келгенше бул шаңараққа жәрдем бериўди сораған. Өз нәўбетинде олар да усынысты мақуллап Ермекбай ҳәм Лалагүл менен ушырасып жағдайды өзлеринен сорап билген. Барахолка базарында ислеўши инсанлар қол көмеги сыпатында азы-кем қәрежет топлап, буннан тысқары, аймақтағы мешит пенен биргеликте екшемби күни шаңараққа жәрдем бериў нийетинде.

Шаңарақтың емлеўханада жатқан перзентлериниң биреўине ата-анасы жанына қайтыўына рухсат берилиўи күтилмекте.

Лалагүлдиң оларға жәрдем бермекши болған инсанларға телефон арқалы айтыўынша, олар келеси ҳәптениң дүйшемби күни жолға шығыўы күтилмекте екен. Көмек қолын созғанларға сайтымыз атынан рахмет айтамыз! Егер шаңарақ екшемби күни оларды видеоға түсириўге рухсат берсе бул видеоны әлбетте сайтымызда да жәриялаймыз. Егер разышылық билдирмесе оларды буған мәжбүрлеўге ҳақымыз жоқ екенин тән аламыз.

Ал, Өзбекстан Республикасы тәрепинен болса «Истиқболли авлод» Республика социаллық информациялық орайының Қарақалпақстан Республикасы бөлими бул шаңарақтың Өзбекстанға келиўи менен олар ушын керекли шәраятты жаратыўға таяр. Қайсы мәмлекетте жасаўды шешиў, әлбетте, Ермекбай менен Лалагүлдиң өз ықтыярында.

 

Жуўмақ орнына, ҳәр бир адам пикирлеў ҳуқықына ийе, бирақ бундай жағдайға түсип қалған инсанларды өз дүньяқарасынан келип шыққан ҳалда, мейли ол әшкара болсын, мейли ишлей, тәрезиге салып додалаў бизиң нәзеримизде дурыс емес. Биз тек ғана оларға жәрдем қолын созыўымыз, ямаса азар бермеўимиз мүмкин. Сөз бенен де азар бермеў көпшиликтиң нәзерине түскен адам ушын ең үлкен жәрдем болады.  

 

Лола Қаллыханова,

журналист

скачать dle 10.6фильмы бесплатно



  • 29-11-2019, 23:36 |
  • 2 947