Шортанбайда жүз берген ўақыя бойынша рәсмий мағлыўмат

 

Шортанбайда жүз берген ўақыя бойынша рәсмий мағлыўмат

 

Макан.уз сайтына газ жетиспеўшилиги себепли 22-ноябрь күни Шортанбай аўылында болып өткен жағдай бойынша Нөкис район ҳәкимлигинен рәсмий мағлыўмат берилди.

Усы жылы 22-ноябрь күни саат 11:30 шамасында Нөкис районы орайынан 8,5км узақлықта жайласқан “Қырантаў” АПЖ Шортанбай аўылында жасаўшы 1978- ҳәм 1973-жылы туўылған еки пуқара аймақ ишинен өтиўши жолдың бойына шығып, аймақ турғынларын наразылық митингине шығыўға шақырады.

Бул ҳәрекетине адамлардың дыққатын тартыў ушын асфальт жолға автомашинаның покришкасын жағады.

Ўақыя орнына 70 ке жақын адам жыйналған. Район ҳәкими Ажинияз Сейтахов ҳәм район прокуроры Шухрат Алламбергеновлар жағдайды ўақыя орнына барып үйренди.

Турғынлардың көмирге болған талабын үйренип шығып, усы күнниң өзинде 116 тонна көмир жеткерилди.

Қыс мәўсиминде  тәбийий газ толық жетип бармайтуғын социаллық объектлер ҳәм хожалықлардың дизими дүзилген болып, бул аймақларға басқа альтернатив энергия ресурсларын жеткерип бериў бойынша қарар қабыл етилген.

 Бул дизимге “Қырантаў” АПЖ аймағыда киргизилген.

 Ҳәзирги ўақытта бул аймаққа суйылтылған газ ҳәм көмир жеткерип берилмекте.

Бирақ аймақ турғынлары көмир сапасының төмен екенлигин айтып, сапасыз көмирди сатып алыўдан бас тартқан ҳәм аймақты тәбийий газ бенен тәмийинлеп бериўди талап еткен.

“Өзтрансгаз” АЖ “Қарақалпақстангаз” филиалы баслығы Х.Айманов ҳәм Қарақалпақстан Республикасы ИИМ Айтбай Темирхановлар наразы турғынлар менен сөйлесиўлер өткерип турғынларға тәбийий газ жетиспеўшилиги себеплерин, бул наразылық ҳәрекетлери Нызамға қайшы екенлигин түсиндирди.

Ҳәзирги ўақытта аймақ турғынларын альтернатив энергия ресурслары менен турақлы тәмийинлеў бойынша жумысшы топар дүзилип турақлы жумыс алып бармақта.

Турғынлардың суйылтылған газ ҳәм сапалы көмирге болған талабы есаплап шығылып, тез пурсатта жеткерип бериў шаралары көрилмекте.

Бүгинги күнде аймақта 1541 шаңарақ бар болып, соннан 420 жәрдемге мүтәж  ҳәр бир шаӊараққа 500 килограммнан көмир, 2 дана газ балонлары ҳәм 10 телешка қурғақ отын  бийпул берилди.

Қарақалпақстан Республикасы Министрлер Кеңеси баслығы Қахраман Сариевтиң тапсырмасы менен бул аймақта жайласқан социаллық объектлер усы жыл 1-декабрьге шекем соннан 3 мектеп, 1 балалар бақшасы ҳәм аўыллық медициналық пункти тәбийий газ тармағына жалғанатуғын болды.

Қыйып қойылған аймаққа газ жеткериўши 16 км газ трубасы тозыўы жеткен болып, жоқары басымдағы газге шыдам бере алмай айрықша жағдайларды келтирип  шығарыўы мүмкинлиги болғанлығы себепли, бул трубалар жаңасына алмастырылғаннан кейин аймақтағы хожалықларды басқышпа-басқыш тәбийий газ тармағына жалғаў ислери алып барылады.

Жоқарыда атап өтилген еки пуқараға адамлар арасында қорқыныш оятыўшы бундай жағдайларды келтирип шығарыўы надурыс ҳәм усындай жол менен мақсетке ерисип болмайтуғынлығы түсиндирилди.

 

 

скачать dle 10.6фильмы бесплатно



  • 23-11-2019, 23:02 |
  • 9 458