«Нукус-онлайн» блогери Мустафаның басына түскен ис

«Нукус-онлайн» блогери Мустафаның басына түскен ис

 (Мустафа. Фото сүўрет архивтен. Бул ўақыяға тиккелей байланысы жоқ)

«Нукус-онлайн»ды алып барыўшы блогер менен байланыс үзилип қалғанына 1 ҳәпте болды. Неге булай интернет тармақларда жоқ болып қалғанынан қәўетер алып, үйине излеп бардық. Билсек, Жол ҳәрекети қәўипсизлиги хызмети менен байланыслы бир даўлы машқалаға араласып қалған болып шықты. Мустафаның басынан өткен ўақыяны сөз етемиз.

Усы жылдың 12-ноябрь күни Мустафа Нөкис қалалық Жол ҳәрекети қәўипсизлиги бөлиминиң қасына жумыслары менен саат 11-30ларда барған. Сол жерде имарат қасындағы машиналар турар орнында 3.1 санлы жол белгисиниң (тек ғана хызмет бабындағы машиналар ушын) турғанын ҳәм турар орында жеке меншик автомашиналар қойылғанын көрген. Бул жағдайды саат 11-40 ларда Республикалық Жол ҳәрекети қәўиспизлиги басқармасына нәўбетшиге қоңыраў етип хабарлаған ҳәм нәўбетши ЖПХ хызметкерин жибериўин айтқан. Ўәде етилген ЖПХ хызметкерлери саат 16-46 да (!) келген. Минип келген жумыс автомашина номери 511 Ласетти. Келген ЖПХ хызметкерлериниң атлары Зафар Ибрагимов ҳәм Ислам Рейимбаев. Мустафа оларға болған жағдайды айтқан, яғный, хызмет автомашинасы туратуғын жерде жеке меншик автомашиналар турғанын. Еки ЖПХ хызметкери Мустафаның сөзлерин тыңлап болған соң, ол жерден кетпекши болған. Мустафа олардан егер усы жағдайға ҳеш қандай баянлама дүзбейтуғын болсаңыз, соны камераға айтың, деген. Еки ЖПХ хызметкери автомашинасынан түсип, «стоянка»ға биргеликте барған. Мустафа турар орында қалдырылған автомашина номерлерин ҳәм маркаларын айтып жүрип сүўретке алған. ЖПХ хызметкерлери бул көликлердиң ийелери жоқ болғаны ушын оларға баянлама дүзе алмайтуғынын, оның үстине бул көликлер ЖПХ хызметкерлериниң машиналары екенин айтқан. Бул сәўбеттен соң, ЖПХ хызметкерлери бул мәселени «стоянка» қасындағы имарат ишине кирип сөйлесип алыўды усыныс еткен. Имарат ишине киргеннен соң, ЖПХ хызметкерлериниң бири күш ислетип Мустафаның қолындағы камерасын алып қойған. Мустафаның айтыўы бойынша, «стоянка»да гүзетиў камерасы болған. Соның ушын, камераға түсиўи ушын имарат ишинен сыртқа шығып қолындағы телефоны менен сүўретке түсирип, оған күш ислетпеўин ҳәм камерасын қайтарып бериўин сораған. Соң, ЖПХ хызметкерлери күш ислетип қолындағы телефонын да алып қойған. Егер «стоянкадағы» камера түсирген болса бул жағдайды сол камерадан көриўге болады.

Буннан кейин, ЖПХ хызметкерлери Мустафаны Нөкис қалалық ишки ислер бөлимине апаратуғынын айтқан. Ол телефонымды қайтарып бериң, Ишки ислер хызметкерлерин өзим шақырып беремен сизлерге, деген. ЖПХ хызметкерлери оның сөзлерин тыңламай машинасына отырып кетип қалмақшы болған. Мустафа олар менен бирге Нөкис қалалық ишки ислер бөлимине барып, өзине тийисли мүлкти ҳәм бул мәселени шешиў ушын, ЖПХ хызметкерлери менен бирге кетиўге қайылшылық билдирген.

Ишки ислер бөлиминде Сейтназар яки Сейитбек атлы тергеўшиге жолыққан. Тергеўшиниң қабыллаўында ЖПХ хызметкерлери Мустафа түрмехананы түсирип жүрипти деген мағлыўматты айтқан.

Мустафа болған ўақыяны айтып, дәлийли видео камерасында бар екенин мәлим еткен.

Тергеўши камераны алып келиўди сораған. Мустафадан камерасын алып қойған ЖПХ хызметкери ҳәзир деп шығып кетип, еки саатқа шекем қайтып келмеген. Соған шекем оған қайта-қайта қоңыраў етип изленген. Камераны алып кетиўге кеткен ЖПХ хызметкери еки саат өткеннен соң Мустафаның камерасын алмағанын айтқан. Олай болса, телефондағы видеоны тексерейик, дегеннен соң, Ишки ислер бөлимине кирер жерде нәўбетшиге қалдырып кетилген Мустафаның телефоны алдырылған. Телефон алып қаралса ол блокировкаға салынғаны анықланған ҳәм улыўма ашылмаған. Нәтийжеде, Мустафа саат 19-30 ларда Ишки ислер бөлиминдеги тергеўшиге болған ўақыя туўралы түсиник хат жазып шыққан.

13-ноябрь күни Мустафа Нөкис қалалық Жол ҳәрекети қәўипсизлиги басқармасына барып баслықлары менен сөйлескен. Оның менен Байрам атлы командир сәўбетлескен. Мустафа сәўбетинде камерасының ишиндеги өзлерине тийисли видеоларды өширип, камерасын қайтарып бериўди соранған. Байрам хызметшисинен камераны алған болса қайтарып бериўин сораған. Бирақ, камераны алып қойған ЖПХ хызметкери камераны алғанын мойынламаған.

Мустафа 14-ноябрь күни Қарақалпақстан Республикасы Ишки ислер министрлигиндеги жеке қәўипсизлик бөлимине болған ўақыя туўралы арза жазып кеткен.

Мустафаның телефоны ҳәзир өзинде, бирақ ол ислемей тур.

makan.uz сайты бул ўақыяда ҳеш кимди ақлаў яки қаралаў принципинде емес. Бул жердеги мақсет пуқараның тыңланған болыўына имкан жаратып бериў.

Биз Қарақалпақстан Республикасы Жол ҳәрекети қәўипсизлиги басқармасының баспасөз хаткери менен телефон арқалы байланысып, бул ўақыя ҳаққында қандай мағлыўмат бере алыўы мүмкинлигин сорадық. Ол бул ўақыя ҳаққында жеке өзи ҳеш қандай хабардар емеслигин айтты. Ишки ислер министрлигинен рәсмий мағлыўматты күтемиз.

 

Лола Қаллыханова,

журналист

скачать dle 10.6фильмы бесплатно



  • 19-11-2019, 19:39 |
  • 4 824