Қарақалпақстанда 100 ден аслам исбилерменниң бузылған ҳуқықлары тикленди

Бәршемизге белгили, Президентимиздиң 2017-жыл 5-май күнги ПП-5037-санлы Пәрманына муўапық исбилерменлик субъектлериниң ҳуқық ҳәм нызамлы мәплерин қорғаўға қаратылған Өзбекстан Республикасы Президенти жанындағы Исбилерменлик субъектлариниң ҳуқықлары ҳәм нызамлы мәплерин қорғаў бойынша ўәкил институти шѳлкемлестирилген еди.

Усы тараўдың хуқықый қорғалыўын жәнеде беккемлениўин тәмийинлеў мақсетинде, 29.08.2017-жылда 440-санлы «Өзбекстан Республикасы Президенти жанындағы Исбилерменлик субъектлериниң хуқықлары ҳәм нызамлы мәплерин қорғаў бойынша Ўәкил ҳаққында»ғы Өзбекстан Республикасы Нызамы қабыл етилди.

Өзбекстан Республикасы Президенти жанындағы Исбилерменлик субъектлариниң ҳуқықлары ҳәм нызамлы мәплерин қорғаў бойынша Ўәкил исбилерменлик субъектлери ҳәм мәмлекетлик уйымлар арасындағы нәтийжели пикирлесиўдиң жаңа механизмлерин турмысқа енгизбекте, исбилерменлердиң ҳуқықларын ҳәм нызамлы мәплерин тәмийинлеўге қаратылған мәмлекетлик қорғаўды әмелге асырмақта.

Соның менен бирге, «Исбилерменлик хызметин қорғаў системасын түптен жетилистириў ҳәм прокуратура органлары хызметин оптималластырыў ис-иләжлары ҳаққында»ғы Өзбекстан Республикасы Президентиниң 2019-жыл 15-март күнги ПФ-5690-санлы Пәрманына муўапық Өзбекстан Республикасы Президенти жанындағы Исбилерменлик субъектлериниң хуқықлары ҳәм нызамлы мәплерин қорғаў бойынша ўәкил администрациясының жаңа структурасы тастыйықланып, оған муўапық Ўәкилдиң Қарақалпақстан Республикасы, ўалаятлар ҳәм Ташкент қаласында ис алып барыўшы Бас инспекторы ҳәм жетекши инспекторлары лаўазымлары енгизилди.

Пәрманға тийкар 2019-жыл 1-апрелден баслап исбилерменлик субъектлери хызметинде ѳткерилетуғын тексериўлерди муўапықластырыў ҳәм қадағалаўшы органлар тәрепинен ѳткерилетуғын тексериўлердиң нызамлылығы үстинен қадағалаў ўәкил  тәрепинен әмелге асыралады.

Ўәкилдиң Қарақалпақстан Республикасындағы инспекторлары исбилерменлердиң хуқықларын қорғаў бойынша ѳз ўәкилликлерин әмелге асырыўда:

қадағалаўшы органлар тәрепинен исбилерменлик субъектлери хызметинде тексериўлер ѳткериў тараўындағы нызамшылық талапларына әмел етилиўин қадағалайды;

қадағалаўшы органлардың исбилерменлик субъектлери жумысында тексериўлер ѳткериў хаққындағы буйыртпаларын кѳрип шығады ҳәм олардың тийкарлығын үйренеди (бунда: исбилерменлик субъектлери жумысларында тексериўлерди ѳткериў ушын разылық бериў яки бермеў мәселесин кѳрип шығады, сондай-ақ ѳткерилип атырған тексериўлерди мүддетлерин ҳәм тәртиплерин қадағалайды);

Исбилерменлик субъектлериниң мүрәжатларын кѳрип шығады.

Ўәкил инспекторлары мүрәжатларды кѳрип шығыўда исбилерменлик субъектлериниң ѳз хуқықлары ҳәм нызамлы мәплерин бузып атырған мәмлекетлик органларының ҳәм басқа мәкемелердиң қарарлары, олардың лаўазымлы шахсларының хәрекетлери (хәрекетсизлиги) үстинен берилген шағымларды кѳрип шығады.

Ўәкил инспекторлары исбилерменлик тараўындағы нызамбузыўшылық жағдайлары бойынша қадағалаўшы органлардың айыпкер лаўазымлы шахсларын нызам менен белгиленген тәртипте жуўапкершиликке тартыў шараларын кѳреди.

Өткен қысқа дәўир ишинде исбилерменлик субъектлериниң ҳуқықлары ҳәм нызамлы мәплерин қорғаў барысында бир қанша жумыслар әмелге асырылды.

Ўәкил аппаратының Қарақалпақстан Республикасында жумыс алып барыўшы инспекторлары тәрепинен исбилерменлик субъектлериниң мүрәжатлары кѳрип шығылып нызам ҳүжжетлерине муўапық шешилмекте.

Атап айтқанда, қысқа мүддеттиң ишинде 100 ден аслам мүрәжат еткен исбилерменлердиң бузылған хуқықлары тикленди.

Исбилерменлик субъектлериниң хуқықларын қорғаў барысында қадағалаўшы органлар тәрепинен ѳткерилген 641 жағдайда нызамсыз тексериўлер ѳткерген 11 лаўазымлы шахслар интизамий, 10 лаўазымлы шахслар ҳәкимшилик жуўапкершиликке тартылды.

Мәмлекетлик ҳәкимияты органларының исбилерменлик субъектлерине қарата нызамсыз шығарлыған 7 қарарлары бийкар етилиўи тәмийинленди.

Исбилерменлик субъектлери менен нәтийжели пикирлесиў жолға қойылып, ҳәр ҳәптеде олардың искерлигиндеги машқала ҳәм усыныслары үйренилип, олардың раўажланыўын хошаметлеўге қаратылған нызамшылықты жетелистириў бойынша усыныслар ислеп шығылмақта.

Жуўмақлап айтатуғын болсақ, алып барылып атырған жумыслар исбилерменлик субъектлериниң нызамлы ҳуқық ҳәм мәплерин кепилликли қорғаўга, бул арқалы исбилерменлик хызмети кѳлемин кеңейттириўге, киши бизнес субъектлери ушын қолай шәрт-шараятларды жаратыўға, оларды мәмлекет раўажланыўы жолындағы актив ҳәрекетлендириўши күш сыпатында қәлиплесиўине ҳәм экономикадағы үлесин жәнеде кѳбейиўине хызмет етеди.

 

Б.С.Даулетияров,

Өзбекстан Республикасы Президенти жанындағы

Исбилерменлик субъектлериниң ҳуқықлары ҳәм нызамлы

мәплерин қорғаў бойынша

ўәкил аппаратының Қарақалпақстан Республикасындағы

бас инспекторы

скачать dle 10.6фильмы бесплатно



  • 14-11-2019, 14:52 |
  • 562