Шавкат Мирзиеёв: Халық медицина хызметкерлерине исениўи керек.

Шавкат Мирзиеёв: Халық медицина хызметкерлерине исениўи керек.

Президент ден саўлықты сақлаў тараўы ўәкиллери менен ушрасыўында медициналық хызметлер сапасын жоқарылатыў ҳәм кадрлар таярлаўды жақсылаў ўазыйпасын тапсырды.
Өзбекистан Президенти Шавкат Мирзиёев 2017-жыл 5-январь күни ден саўлықты сақлаў тараўының бир топар алдағы қәнийгелери менен ушрасты, деп хабар берди ЎзА.
«Ден саўлықты саклаў тараўын реформалаў мәмлекет сиясатының ең әҳмийетли бағдарларының бири» деди Шавкат Мирзиёев.
Президент мәмлекетте халықтың ылайық өмир сапасын тәмийинлеў, аналар ҳәм балаларды қорғаў, ҳәр тәреплеме саламат әўладты тәрбиялаў, медициналық хызмет сапасын жақсылаўға қаратылған системалы жумысларды атап өтип, өз шешимин күтип турған машқалаларға толық тоқталып өтти. Тийкарғы дыққатты аўыллық врачлық пунктлери жумысына тийисли мәселелерге қаратты.
«Ерисилген жетискенликлерге қарап отырыў раўажланыў жолындағы ең үлкен тосқынлық», - деди Президент. Ол 2016-жыл сентябрь айы соңында ашылған виртуал қабыллаўханасына келип түскен мүрәжатлардың 7000 нан артығы дәл усы медицина тараўына тийисли екенлигин айтты.
Бүгинги күни аўыллық врачлық пунктлери бирлемши медициналық көриўден өткериў ушын лаборотория анализи қураллары, бир қанша диагностика аппаратлары менен үскенеленгени халық ушын қолайлықлар жаратпақта. Бирақ, медицина үскенелерин пайдаланып билетуғын тәжирийбели қәнийгелер жетерли дәрежеде емес. Айырым шет аймақларда әпиўайы қан тапсырыў ушын район орайына ямаса қалаға барыўға туўра келеди.
Айырым орынларда медициналық көриўден өткериў атына ғана өткерилмекте, деп пикирин даўам етти Президент. Шет аймақларда тәжирийбели қәнийгелер жетиспей атырғаны кадрлар мәселесинде ислениўи керек жумыслар көп екенлигин аңлатады.
Аўыллық врачлық пунктлери азаллы-кеш ислеўи керек. Буның ушын пункт қасынан усы пунктте ислейтуғын врачқа жай салып бериў керек.
Халыққа тез медицианалық жәрдем көрсетиў сапасын жоқарылатыўға қаратылған бир қанша илажлар көрилди. Бирақ, бүгин халық бул хызмет сапасынан ырза деп айта алмаймыз, деди ол. Системаны пүткиллей өзгертиў – заман талабы.
Илажда Өзбекистан Республикасы Президентиниң 2016-жыл 31-октябрьдеги «Халықты дәри-дармақ қураллары ҳәм медицина буйымлары менен тәмийинлеўди еле де жақсылаўға байланыслы илажлар ҳаққында»ғы қарары орынланыўы бойынша алып барылып атырылған жумыслар сын көз-қарастан көрип шығылды.
Буннан соң мәмлекет басшысы ҳаял-қызлар ушын бөлек поликлиника шөлкемлестириў кереклигин мәлим етти. Себеби ертеңги күнимиздиң даўамшыларын саламат етип дүньяға келтириў тийкарынан ҳаялларымыздың ден саўлығына байланыслы деди, ол.
«Ден саўлық тараўы ҳаққында айтқанымызда бир шынлықты естен шығармаў керек: медицина хызметкерлери бизиң саламатлығымыздың сақшылары. Оларға халық исениўи, олар болса халықты исендире алыўы керек», - деп атады Шавкат Мирзиёев.
Қәнийгелестирилген медицина орайлары жумысында да шешимин күтип атырған мәселелер көп. Бар орайлардың ҳәммеси Ташкент қаласында жайласқан. Бул, әсиресе, аўыл халқына анық қолайсызлықлар туўдырады. Қәнийгелестирилген медицина орайлары қәнийгелери орынларға барып халыққа медициналық хызмет көрсетиўи, хирургиялық әмелиятларын өткериўи керек, деди Президент.
Илажда мәмлекет ден саўлықты сақлаў тараўын еле де раўажландырыў, көрсетилип атырылған медициналық хызметлер сапасын халық аралық стандартлар дәрежесине көтериў, жас қәнийгелерди тәрбиялаў процесслерине алдағы билимлендириў технологияларын кең енгизиў, дүньяның жетекши медицина орайлары ҳәм оқыў мекемелери, белгили алымлар ҳәм қәнийгелер менен бирге ислесиўди кеңейтиў ҳәм басқа да әҳмийетли мәселелер бойынша қәнийгелерге анық тапсырмалар берилди.
Фото: ЎзА
скачать dle 10.6фильмы бесплатно



  • 7-01-2017, 13:58 |
  • 348