Мәмлекетлик бәсекилик комитети қайтадан шөлкемлестирилди

Мәмлекетлик бәсекилик комитети қайтадан шөлкемлестирилди

Өзбекистан Президентиниң 18-апрельдеги пәрманы менен Меншиклестириў, монополиядан шығарыў ҳәм бәсекиликти раўажландырыў мәмлекетлик комитети Меншиклестирилген кәрханаларға көмеклесиў ҳәм бәсекиликти раўажландырыў мәмлекетлик комитети етип қайта шөлкемлестирилди. Бул ҳаққында ЎзА хабар бермекте.
Пәрман «меншиклестирилген мәмлекетлик мүлки тийкарында жеке мүлкшилик ҳәм исбилерменликти раўажландырыў тараўында мәмлекет сиясатын сапа жағынан өзгертиўди тәмийинлеў, исбилерменлик субъектлерин меншиклестирилгеннен кейин әмелий қоллап-қуўатлаў, сондай-ақ, мәмлекет мүлкинен пайдаланыў нәтийжелигин арттырыў мақсетинде» қабылланды.

Меншиклестирилген кәрханалардың ислеп шығарыў жумысын тиклеў ҳәм нәтийжелигин арттырыў ҳәр тәреплеме кең қоллап-қуўатлаў, сол тийкарда халық дәраматларының турақлы өсиўин тәмийинлейтуғын жаңа жумыс орынларын жаратыў, усы мақсетлерде ўәкилликли мәмлекетлик органлары, финанс ҳәм басқа базар дүзилмелериниң Саўда-санаат палатасы ҳәм жергиликли мәмлекет ҳәкимияты ҳәм басқарыў органлары менен беккем шерикшиликтеги жумысын муўапықластырыў қайта шөлкемлестирилген мәмлекетлик комитеттиң «оғада әҳмийетли ўазыйпасы» деп белгиленген.

Пәрманға муўапық, 2018-жылдың 1-январына шекем турақлы жаңаланып турыўшы:
- салық, статистика ҳәм кадастр органларының мағлыўматлар базасы менен өз-ара электрон байланысты тәмийинлейтуғын тармақлар, аймақлар ҳәм түрли меншиклестириў формалары кесиминде мәмлекет мүлкиниң меншиклестирилген объектлери бойынша мағлыўматлар базасын;
- бос жатырған ҳәм нәтийжесиз пайдаланылып атырған меншиклестирилген объектлер, ислеп шығарыў майданлары ҳәм қурылысы тамамланбаған объектлерден жеке исбилерменликти раўажландырыў ушын пайдаланыў мақсетинде олардың аймақлық реестрлерин;
- жеке бизнести шөлкемлестириў ушын исбилерменлерге усынылып атырған бос жатқан мәмлекет мүлки объектлериниң аймақлық реестрлерин жаратыўы керек.

1-июньннан баслап ҳәр бир районда меншиклестирилген объектлер тийкарында жойбарларды әмелге асырып атырған исбилерменлер ушын кәсип-өнер колледжлериниң имаратларында оқыў сабақларынан бос ўақытта оқыў курслары шөлкемлестириледи.
Жаңадан жумыс баслап атырған исбилерменлерге бизнес-режелер таярлаўда, керекли мағлыўматты алыўда исбилерменлик жумысын жүргизиў менен байланыслы әмелий мәселелерди шешиўде оларға эксперт, ҳуқықый ҳәм мәсләҳат жәрдеми көрсетиў ушын бизнес-инкубаторларды шөлкемлестириў нәзерде тутылған.

Мәмлекетлик комитети еки ҳәпте мүддетте 2017-2018-жылларда Меншиклестирилген кәрханаларға көмеклесиў бойынша «жол карталары»н ислеп шығыў ҳәм әмелге асырыў илажлары бағдарламасын таярлаўы керек.
Комитет жанындағы Мәмлекет мүлкин меншиклестириўден түскен қаржылар фонды тийкарында Меншиклестирилген кәрханаларға көмеклесиў фонды шөлкемлестириледи.

Фото: И. Бабажанов
скачать dle 10.6фильмы бесплатно



  • 19-04-2017, 10:00 |
  • 314