Өзбекистан Республикасы Конституциясына өзгерис ҳәм қосымшалар киритилди

Өзбекистан Республикасы Конституциясына өзгерис ҳәм қосымшалар киритилди

Ташкент қаласында Өзбекистан Республикасы Олий Мажлиси Сенатының тоғызыншы улыўма мәжилиси ашылды. Министрлер Кабинетиниң мирәт етилген ағзалары, министрликлер ҳәм мекемелер басшылары, басқа шөлкемлер, ғалаба хабар қураллары ўәкиллери қатнасты. Бул ҳаққында Сенаттың мәлимлеме хызмети хабар бермекте.

Мәжилисти Олий Мажлис Сенатының Баслығы Н.Йўлдашев алып барды.

Сенаторлар жумысты «Өзбекистан Республикасының Конституциясына өзгерислер ҳәм қосымша киритиў ҳаққында»ғы Өзбекистан Республикасы Нызамын көрип шығыўдан баслады.

Конституцияға дүзетиўлер Өзбекистан Республикасы Президентиниң 2016-жыл 21-октябрьдеги «Суд-ҳуқық системасын еледе реформалаў, пуқаралардың ҳуқық ҳәм еркинликлерин исенимли қорғаў кепилликлерин күшейтиў илажлары ҳаққында»ғы Пәрманына ҳәмде 2017-жыл 21-февральдағы «Өзбекистан Республикасы суд системасын түпкиликли жетилистириў ҳәм жумысының нәтйижелигин арттырыў илажлары ҳаққында»ғы Пәрманға муўапық киритилмекте.

Додалаў ўақтында сенаторлар атап өткениндей, Нызам 2017-2021-жылларда Өзбекистан Республикасын раўажландырыўдың бес баслы бағдары бойынша Ҳәрекетлер стратегиясында белгилеп берилген ўазыйпаларды әмелге асырыўға қаратылган принципиал қағыйдалардан ибарат болып, оларда пуқаралардың ҳуқық ҳәм еркинликлерин исенимли қорғаў кепилликлерин кеңейтиў, әдил судлаўға ерисиў дәрежесин, суд ис жүритиўиниң нәтийжелигин ҳәм сапасын арттырыў, талбанларды таңлаў ҳәм судьялар лаўазымларына тайынлаў системасын еле де жетилистириў суд-ҳуқық тараўында алып барылып атырған реформалардың әҳммийетли жөнелислери сыпатында беккемлеп қойылған.

Нызам менен Өзбекистан Республикасы Конституциясының 80, 81, 83, 93, 107, 110, 112-статьяларына тийисли өзгерислер ҳәм қосымша киритилмекте. Усы дүзетиўлерге муўапық Жоқары хожалық суды ҳәм Жоқары суд пуқаралық, жынайый, административлик ҳәм экономикалық суд иси жүритиўи тараўындағы суд ҳәкимиятының бирден-бир жоқары органына - Өзбекистан Республикасы Жоқары судына бирлестирилмекте.

Нызамды додалаў даўамында сенаторлар тәрепинен атап өтилгениндей, суд ҳәкимиятының жоқары органы екеў екени, атап айтқанда Өзбекистан Республикасы Жоқары суды ҳәм Жоқары хожалық судының бар екени, ең алды менен, суд системасын басқарыў функцияларының тәкирарланыўына себеп болып атыр еди, әмелдеги дүзилис бирден-бир суд әмелиятын, хызмет ўазыйпаларының ақылға уғрас бөлистирилиўин тәмийинлеп бермей атырған еди.

Мәжилисте айтылғанындай, қабылланған конституциялық өзгерислер мәмлекетимизде суд системасын еле де терең реформалаў, демократластырыў, әдил судлаўдың нәтийжелигин арттырыў ушын тийкар жаратады.

Бул конституциялық дүзетиўлерге муўапық суд системасында экономикалық ҳәм административлик судлар дүзилмекте. Сенаторлар атап өткениндей, Қарақалпақстан Республикасының, ўәлаятлар ҳәм Ташкент қаласының экономикалық, административлик судларын, сондай-ақ, районлар аралық, район, қала экономикалық судларын ҳәмде район, қала административлик судларын шөлкемлестириўди нәзерде тутыўшы усы конституциялық өзгерислер мәмлекетимизде алып барылып атырған административлик, экономикалық, базар реформаларын суд-ҳуқықый жақтан тәмийинлеў нәтийжелигин арттырыўдың, жеке мүлк ҳуқықын, исбилерменлик жумысын судда исенимли қорғаўдың әҳмийетли факторына айланады.

Атап айтқанда, ғалаба-ҳуқықый мүнәсибетлерден келип шығатуғын административлик даўларды, сол қатары мәмлекет органларының ҳәрекетлерине ямаса ҳәрекетсизлигине, қарарлары үстинен пуқаралардың, исбилерменлик субъектлериниң берген шағымларын ҳәм мүрәжатлерин көрип шығыўға ҳуқықлы болгған ҳәр қыйлы дәрежедеги административлик судлардың дүзилиси инсанлардың, юридикалық шахслардың нызамлы ҳуқықларын ҳәм еркинликлерин, мәплерин судда қорғаў нәтийжелигин түпкиликли арттырады.

Тийкарғы Нызамымызға киритилип атырған өзгерислерге муўапық суд-ҳуқық системасында жаңа институт - Өзбекистан Республикасы Судьялар жоқары кеңеси енгизилмекте. Бул Кеңес алдын әмелде болған Өзбекистан Республикасы Президенти жанындағы Судьяларды таңлаў ҳәм лаўазымларға усыныў бойынша жоқары тәжирийбели комиссиясын алмастырыўы лазым. Мәжилис даўамында атап өткениндей, бул комиссия зәрүр конституциялық статусқа, жетерлише ҳуқықларға ийе болмаған, бул болса әмелдеги судьялар корпусын қәлиплестириў ислериниң нәтийжелилигине тәсир көрсеткен.

Судьялар жоқары кеңеси дүзилиўи мүнәсибети менен Өзбекистан Республикасы Конституциясы 111-статьясының жаңа редакцияда Судьялар жоқары кеңесиниң конституциялық статусы анық беккемленип қойылған. Өзбекистан Республикасы Судьялар жоқары кеңеси судьялар жәмәәтиниң органы есапланады ҳәм Өзбекистан Республикасы суд ҳәкимияты еркинлиги ҳаққындағы конституциялық принципке әмел етилиўин тәмийинлеўге көмеклесиўи белгилеп қойылмақта. Кеңес баслығы Өзбекистан Республикасы Президентиниң усынысына муўапық Өзбекистан Республикасы Олий Мажлисиниң Сенаты тәрепинен тайынланыўы (Өзбекистан Республикасы Конституциясы 80-статьясының 4-бәнти), Судьялар жоқары кеңеси ағзалары нызамға муўапық Мәмлекет басшысы тәрепинен тастыйықланыўы белгилеп қойылмақта.

Конституция Судьялар жоқары кеңесине кең ҳуқықлар береди. Конституция 93-статьясы биринши бөлеги 14-бәнтиниң жаңа редакциясына муўапық Президент Өзбекистан Республикасы Судьялар жоқары кеңеси усыныснамасына муўапық Президент Өзбекистан Республикасы Судьялар жоқары кеңеси усыныснамасына муўапық ўәлаятлар ҳәм Ташкент қаласы судлары баслықлары ҳәм баслық орынбасарларын, Өзбекистан Республикасы Әскерий суды баслығын лаўазымына тайынлайды ҳәмде лаўазымынан азат етеди.

Ҳәзирги ўақытта Кеңес Өзбекистан Республикасы Президенти менен келисилген ҳалда әскерий судлар, ўәлаятлар ҳәм Ташкент қаласы судлары судьяларын, районлар аралық, район, қала судлары баслықларын ҳәмде судьяларын еркин түрде лаўазымға тайынлайды ҳәм лаўазымынан азат етеди. Соны атап өтиў керек, алдын судьялардың бул тайпалары Өзбекистан Республикасы Президенти тәрепинен тайынланатуғын еди.

Сенаторлар атап өткениндей, Конституцияға суд ҳәкимиятының жумысын түпкиликли жақсылаўға, атағын арттырыўға, судлар дүзилисин жетилистириўге ҳәмде судьяларды таңлаў ҳәм лаўазымларға тайынлаў системасын демократластырыўға қаратылған усы ҳәм бир қанша өзгерис ҳәм қосымшалардың киритилиўи пуқаралар ҳәм исбилерменлик субъектлери ҳуқықлары, еркинликлери, нызамлы мәплери судда исенимли қорғалыўын тәмийинлениўиниң, мәмлекетте нызам үстемлигин, нызамлылықты беккемлеўдиң әҳмийетли факторына айланады. Нызам сенаторлар тәрепинен мақулланды.

Аўдарма: makan.uz
Фото: senat.uz
скачать dle 10.6фильмы бесплатно



  • 29-03-2017, 13:39 |
  • 596